Mateu 10
10
Baapositola ba lishumi ka ba babeli
(Mar 3.13-19; Luk 6.12-16)
1Jesu a biza balutiwa ba hae ba lishumi ka ba babeli, mi a ba fa maata a ku leleka mioya ye maswe ni maata a ku folisa matuku ni makulanu kamukana. 2Ki wo mukoloko wa mabizo a baapositola ba lishumi ka ba babeli. Wa pili ki Simoni ya bizwa Pitrosi, ni munyana'a hae Andreasi, Jakobo ni munyan'a hae Joani ili bana ba Zebedea. 3Ki Filipi ni Bartolome, Tomasi ni Mateu mutelisi, Jakobo mwan'a Alfea ni Tadea. 4Ki Simoni Mukanana, ni Judasi Isikariota, ili yena ya kile a beteka Jesu.
Jesu u luma ba lishumi ka ba babeli
(Mar 6.7-13; Luk 9.1-6)
5Jesu a luma batu bao ba lishumi ka ba babeli, ka litaelo ze, a li, “Mu si ke mwa ya kwa manaha a balicaba kamba mwa munzi ufi ni ufi o mwa naha ya Samaria. 6Kono mu ye sihulu kwa lingu ze latehile za sicaba sa Isilaele. 7#Luk 10.4-12 Mu ye, mu kutaze, mu li, ‘Mubuso wa Lihalimu u s'o li fakaufi!’ 8Mu folise bakuli, mu zuse ba ba shwile, mu folise ba mbingwa, mi mu leleke mioya ye maswe. Mu filwe feela, mu sa lifi, cwale mu fane feela ni mina, mu sa libeleli ku lifiwa. 9Mu si ke mwa lwala mali a gauda, a silivela, kamba a kopa mwa lipokoto za mina. 10#1 Bakor 9.14; 1 Tim 5.18 Mu si ke mwa lwala mufaho ha mu li mwa musipili, kamba ku lwala hembe ya bubeli, kamba makatulo, kamba mulamu. Mubeleki u lukela ku fiwa s'a tokwa.
11“Ha mu fita mwa munzi, kamba mwa munzinyana, mu kene mwateñi, mu bate ya ka tabela ku mi amuhela, mi mu ine ku yena ku fitela ha mu funduka. 12Ha mu ka kena mwa ndu, mu bulele, mu li, ‘Kozo i be ni mina.’ 13Haiba batu ba ba mwateñi ba mi amuhela, tumeliso ya mina ya kozo i ine ku bona, kono ha ba sa mi amuheli, tumeliso ya mina mu i kutise. 14#Lik 13.51 Mi haiba mu fita mwa ndu kamba mwa munzi mo ba sa mi amuheli kamba ku teeleza ku ze mu bulela, mu funduke, mi ha mu zwa, mu tutule maluli a kwa mahutu a mina. 15#Mat 11.24; Sim 19.24-28 Luli na mi bulelela kuli, ka Lizazi la Katulo, Mulimu u ta shemuba hahulu batu ba Sodoma ni Gomora ku fita batu ba munzi wo!
Manyando a ka taha
(Mar 13.9-13; Luk 21.12-17)
16 #
Luk 10.3
“A mu bone! Ni mi luma sina lingu mwahal'a maakanyani. Hakulicwalo, mu be ni butali sina linoha, mi mu ishuwe sina maiba. 17#Mar 13.9-11; Luk 12.11-12; 21.12-15 Mu tokomele kakuli batu ba ka mi tama ni ku mi isa kwa likuta, mi ba ta mi shapa mwa masinagoge a bona. 18Mu ka zekiswa fapil'a babusi ni malena kabakala ka, ili kuli mu kone ku bulela Litaba ze Nde za Mulimu fapil'a bona ni fapil'a balicaba cwalo. 19Ha ba ta mi zekisa, mu si ke mwa bilaela ka se mu ka bulela, ni kuli mu ka si bulela cwañi. Mu ta fiwa se mu ka bulela ka yona nako yeo. 20Kakuli ha si mina ba ba ta bulela kono ki Moya, o zwa ku Ndat'a mina, o' ta mi bulelisa.
21 #
Mar 13.12; Luk 21.16 “Batu ba ta bulaisa banabahabo bona, mi bashemi ba ta eza cwalo kwa bana ba bona. Bana ba ta lwanisa bashemi ba bona ni ku ba bulaisa. 22#Mat 24.9, 13; Mar 13.13; Luk 21.17 Batu kaufela ba ta mi toya kabakala ka. Kono ya ka tundamena, mane ku isa kwa mafelelezo, u ka piliswa. 23Ha ba mi nyandisa mwa munzi o muñwi, mu sabele ku o muñwi. Ni mi bulelela niti, ni li, ‘Ha mu na ku feza musebezi wa mina mwa minzi kaufela ya Isilaele, na, Mwan'a Mutu, ni si ka fita kale.’
24 #
Luk 6.40; Joa 13.16; 15.20 “Ha ku na mulutiwa ya fita muluti wa hae. Ha ku na mutanga ya fita mulen'a hae. 25#Mat 9.34; 12.24; Mar 3.22; Luk 11.15 Ku lukile, mulutiwa h'a ka swana ni muluti wa hae, ni mutanga h'a ka swana ni mulen'a hae. Haiba muñ'a ndu a ka bizwa Beelzebule, lubasi lwa hae lu ka bizwa ka mabizo a maswe ku fita leo!
Ya swanezi ku sabiwa
(Luk 12.2-7)
26 #
Mar 4.22; Luk 8.17 “Hakulicwalo, mu si ke mwa saba batu! Se si kwahezwi kaufela si ta kwahululwa, mi kunutu kaufela i ta zibahala. 27Se ni mi bulelela mwa lififi, mu si bulele mwa liseli. Se mu utwile kwa mukunda, mu si bulele mu nze mu yemi fa lituwa za mandu. 28Mu si ke mwa saba ba ba bulaya mubili, ba sa koni ku bulaya moya, kono mu sabe Mulimu, ya kona ku bulaya hamoho mubili ni moya mwa lyangalilo. 29Kana ha ku lekiswi litaha ze peli ka ngwee i liñwi? Nihakulicwalo, ha ku na nihaili taha i liñwi feela ye ka wela fafasi Ndat'a mina a sa lati. 30Haili ka mina bo, mane ni milili ya kwa litoho za mina i balilwe kamukana. 31Cwalehe, mu si ke mwa saba. Mina mu ba butokwa ku fita litaha ze ñata!
Ku lumela Kreste fapil'a batu ni ku mu latula
(Luk 12.8-9)
32“Mutu kaufela ya ka lumela patalaza kuli ki wa ka, ni na, ni ka mu eza cwalo ku Ndate ya kwa lihalimu. 33#2 Tim 2.12 Kono mutu kaufela ya ka ni latula fapil'a batu, ni na, ni ka mu latula cwalo fapil'a Ndate ya kwa lihalimu.
Ha ku si ka tiswa kozo. Ku tisizwe sabule
(Luk 12.51-53; 14.26-27)
34“Mu si ke mwa hupula kuli ni tisize kozo mwa lifasi, batili. Ha ni si ka tisa kozo, kono ni tisize sabule. 35#Mika 7.6 Ni tezi ku t'o fapanya bana ni bo ndat'a bona, bana ba basizana ni bo m'a bona, basali ni makwenyan'a bona ba basali. 36Mi lila za mutu i ta ba bona banahahabo luli.
37“Mutu kaufela ya lata hahulu ndat'ahe kamba m'ahe ku fita na, h'a ni swaneli. Ya lata hahulu mwan'a hae wa mushimani kamba wa musizana ku fita na, h'a ni swaneli ni yena. 38#Mat 16.24; Mar 8.24; Luk 9.23 Ya sa lwali sifapahano sa hae ni ku ni latelela, h'a ni swaneli. 39#Mat 16.25; Mar 8.35; Luk 9.24; 17.33; Joa 12.25 Mutu kaufela ya ta lika ku babalela bupilo bwa hae u ka sinyehelwa ki bona, kono ya ka sinyehelwa ki bupilo bwa hae kabakala ka u ka bu fumana.
Mipuzo
(Mar 9.41)
40 #
Mar 9.37; Luk 9.48; 10.16; Joa 13.20 “Mutu kaufela ya mi amuhela, wa ni amuhela ni na. Ya ni amuhela, u amuhela cwalo ni yena ya ni lumile. 41Ya amuhela mupolofita wa Mulimu kakuli ki mupolofita wa Mulimu, u ka fumana mupuzo o lukela mupolofita ya cwalo. Ya amuhela mutu ya lukile kakuli ki ya lukile, u ka fumana mupuzo o lukela mutu ya lukile. 42Kaniti na mi bulelela kuli mutu kaufela ya ka fa nihaiba komoki ya mezi a bata ku yo munyinyani wa balutiwa ba ka, kabakala kuli ki mulutiwa wa ka, luli u ta fumana mupuzo wa hae.”
Цяпер абрана:
Mateu 10: Lozi09
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Lozi Interconfessional Bible, Catholic Edition © Bible Society of Zambia, 2009.