Mateu 9
9
Jesu u folisa ya omelezi luñañali
(Mar 2.1-12; Luk 5.17-26)
1Jesu a longana mwa sisepe, a kutela mwabuse bwa lisa, mi a ya kwa munzi wa habo. 2Ba mu tiseza mutu ya n'a omelezi luñañali, a lobezi fa bulobalo bwa hae. Jesu h'a bona butuna bwa tumelo ya batu bao, a li ku ya n'a omelezi luñañali, “Tiya pilu, mwan'a ka. Libi za hao li swalezwi!”
3Cwale, Baluti ba bañwi ba Mulao ba hupula mwa lipilu, ba li, “Mutu yo, u nyefula Mulimu!”
4Jesu n'a zibile mihupulo ya bona, mi a li ku bona, “Mu hupulelañi mihupulo ye maswe cwalo? 5Kana se si bunolo ki ku bulela kuli, ‘Libi za hao li swalezwi,’ kamba ku bulela kuli, ‘Yema, u zamaye?’ 6Ni ta mi bonisa kuli na, Mwan'a Mutu, ni na ni maata a ku swalela libi mwa lifasi. Cwale ni bulelela mukuli yo kuli, ‘Yema! U nge bulobalo bwa hao, mi u ye kwa hae.’ ”
7Mukuli a zuha, mi a ya kwa hae. 8Batu kaufela ha ba bona cwalo ba saba, mi ba lumba Mulimu ka ku fa maata a cwalo kwa batu.
Jesu u biza Mateu
(Mar 2.13-17; Luk 5.27-32)
9Jesu a zwa fo, mi ha n'a nz'a zamaya cwalo a bona mutelisi ya n'a bizwa Mateu, a inzi mwa ofisi ya hae. A li ku yena, “Ni latelele!”
Mi Mateu a yema, a mu latelela.
10 #
Luk 15.1-2
Jesu ha n'a ca lico mwa ndu ya Mateu, batelisi ba bañata ni baezalibi cwalo ba t'o ina fa tafule hamoho ni yena ni balutiwa ba hae. 11Bafalisi ha ba bona cwalo, ba buza balutiwa ba hae, ba li, “Kikabakalañi muluti wa mina h'a ca ni batelisi ni baezalibi cwalo?”
12Jesu a ba utwa, mi a li, “Ba ba pila hande ha ba tokwi ñaka. Ba ba mu tokwa ki ba ba kula. 13#Mat 12.7; Hos 6.6 A mu zamaye, mu y'o bata taluso ya taba ye, ‘Ha ni bati litabelo za lifolofolo, kono ni bata musa.’ Kakuli ha ni si ka t'o biza ba ba lukile, kono ni til'o biza baezalibi.”
Puzo bakeñisa ku itima lico
(Mar 2.18-22; Luk 5.33-39)
14Cwale balutiwa ba Joani Mukolobezi ba taha ku Jesu mi ba mu buza, ba li, “Kikabakalañi, luna ni Bafalisi ha lu itimanga lico hañata, kono balutiwa ba hao, bona, ha ba ezi cwalo ni hanyinyani?”
15Jesu a ba alaba, a li, “Kana mu hupula kuli ba ba memilwe kwa sinawenga ba ka swaba munyali h'a nz'a sa inzi ni bona? Batili! Kono nako i ka taha munyali h'a ka zwiswa ku bona. Fohe kihona ba ka itima lico.
16“Ha ku na mutu ya ka lukela simanahani se sinca fa siapalo sa kale, kakuli simanahani seo si ka pazula siapalo, mi lisuba li ka ekezeha ku fita pili. 17Mi hape, ha ku selwi waine ye nca mwa lihwana za kale. Ha ku ka ezwa cwalo, lihwana li ka pazuha, mi waine i ka suluha ni lihwana li ka sinyeha. Waine ye nca i selwa mwa lihwana ze nca, mi ka nzila ye cwalo, waine ni lihwana za bulukeha hande.”
Mwan'a nduna wa Mujuda ni musali ya n'a sweli kwa liapalo za Jesu
(Mar 5.21-43; Luk 8.40-56)
18Jesu ha n'a sa ba bulela zeo, kiha ku taha nduna wa Mujuda. A t'o kubama fapil'a hae, mi a li, “Mwan'a ka wa musizana kihona a sa z'o shwa hona fa, kono u tahe, u t'o beya lizoho la hao fahalimw'a hae mi u ka pila.”
19Jesu a yema, mi a mu latelela ni balutiwa ba hae.
20Musali yo muñwi, ya n'a kulile mweya lilimo ze lishumi ka ze peli, kih'a taha kwamulaho wa Jesu, mi a t'o swala kwa mungundo wa siapalo sa hae. 21N'a bulela mwa pilu, a li, “Haiba ni ka swala feela kwa siapalo sa hae, ni ka fola.”
22Jesu a itemuna, a mu bona mi a li, “Tiya pilu, mwan'a ka! Tumelo ya hao i ku folisize.” Mi ka yona nako yeo musali a fola.
23Cwale Jesu h'a fita kwa ndu ya nduna, a bona ba ba ne ba opela lipina za maswabi ni ba ba ne ba filika-filika. 24A li ku bona, “A mu zwele kwande, kaufel'a mina! Musizana h'a si ka shwa. U lobezi feela!” Kaufel'a bona ba kala ku mu sheununa. 25Batu ha ba se ba zwiselizwe kwande, Jesu a kena mw'a n'a lobalizwe musizana, a mu swala kwa lizoho, mi musizana a zuha. 26Taba yeo ya tuma mwa silalo seo kaufela.
Jesu u folisa batu ba libofu ba babeli
27Jesu h'a zwa mo, libofu ze peli ba mu latelela. Ba huwa, ba li, “U lu utwele butuku, Mwan'a Davida!”
28Jesu ha s'a keni mwa ndu, libofu ba taha ku yena. Jesu a ba buza, a li, “Kana mwa lumela kuli na kona ku eza cwalo?”
Ba alaba, ba li, “Eni, Mulena!”
29Cwale Jesu a ba swala fa meeto, mi a li, “Ku ezahale ku mina sina mo mu lumelela!” 30Mi meeto a bona a tutubuluha. Jesu a ba laela ka tata, a li, “Mu tokomele kuli taba ye i si ke ya zibwa ki mutu.”
31Kono ba ya, mi ba y'o hasanya litaba za Jesu mwa naha.
Jesu u folisa simumu
32Ba sa z'o funduka feela, kwa tiswa ku Jesu mutu ya n'a sa koni ku bulela kakuli n'a na ni moya o maswe. 33Jesu a sa z'o leleka moya wo, simumu a kala ku bulela. Batu kaufela ba komoka hahulu, ba li, “Ha lu si ka be lwa bona nto ye cwalo mwa Isilaele!”
34 #
Mat 10.25; 12.24; Mar 3.22; Luk 11.15 Kono Bafalisi ba li, “Ki mulen'a mioya ye maswe ya mu fa maata a ku leleka mioya yeo!”
Jesu u shwela batu makeke
35 #
Mat 4.23; Mar 1.39; Luk 4.44 Cwale Jesu a zamaya a potela minzi ni minzinyana. A luta mwa masinagoge a bona, a bulela Litaba ze Nde za Mubuso wa Mulimu, mi a folisa batu kwa matuku ni makulanu a mifuta-futa. 36#Lipa 27.17; 1 Male 22.17; 2 Lita 18.16; Ezek 34.5; Zak 10.2; Mar 6.34 H'a bona buñata bwa batu, a ba shwela makeke, kakuli ne ba katezi, ba zielehile, ba swana sina lingu ze si na mulisana. 37#Luk 10.2 Cwale a li kwa balutiwa ba hae, “Kutulo ki ye tuna luli, kono bakutuli ki ba banyinyani. 38Kabakaleo, mu lapele muñ'a kutulo kuli a lume bakutuli ba bañata ku t'o kutula.”
Цяпер абрана:
Mateu 9: Lozi09
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Lozi Interconfessional Bible, Catholic Edition © Bible Society of Zambia, 2009.