Baruki 4
4
1 #
Litu 24.23
Ye ki buka ya milao ya Mulimu,
ili Mulao o sa feli kuya kuile.
Ba ba u buluka ba pila.
Ba ba u fulalela ba shwa.
2Kuta, Jakobo, u t'o u buluka.
Mwa mafume a ona, u fumane nzila
ye ku isa kwa liseli.
3U si ke wa fa maata a hao
ku yo muñwi.
U si ke wa fa litukelo za hao
kwa sicaba si sili.
4Isilaele, lu fuyauzwi.
Se si tabisa Mulimu si sinulezwi luna.
Linonge za Jerusalema
5Mu tiye pilu, mina batu ba ka,
mina ba ba pilisa kamita
libizo la Jakobo.
6Ne mu lekisizwe kwa macaba,
kono n'e si ku mi yundisa.
7Ne mu halifisize Mulimu.
Kikabakaleo ne mu tuzwi ki lila
za mina,
kababakala kuli ne mu nyemisize
mubupi wa mina,
ka ku ezeza mioya ye maswe litabelo,
isiñi Mulimu.
8Ne mu libezi Mulimu wa kamita
ya mi utile.
Hape ne mu swabisize Jerusalema
ya mi hulisize.
9Kakuli h'a bona mu welwa
ki bunyemi bwa Mulimu, a li,
“Mu teeleze, mina ba ba bapani
ni Sione.
Mulimu u ni tiselize maswabi a matuna.
10Ni boni bana ba ka ba bashimani
ni ba basizana
ha ba iswa kwa butanga,
ili ba ba atuzwi ki ya Maata Kaufela.
11Ne ni ba hulisize ka tabo.
Ka mioko ni ka maswabi,
na ba bona ha ba funduka.
12Ufi ni ufi ku mina
a si ke a ikuhumuseza na,
mbelwa ya siilwe ki ba bañata cwalo.
Ni shwa bulutu kabakala bana ba ka
tota,
ba ba fulalezi Mulao wa Mulimu.
13Ne ba sa lati ku ziba litaelo
za hae,
kapa ku latelela likelezo za hae,
kamba ku latelela mikwa ya buiswalo
ka ku ya ka litaelo za hae ze lukile.
14“Mina ba ba bapani ni Sione,
mu tahe kwanu!
Ni mi hupulise za butanga bwa bana
ba ka ba bashimani ni ba basizana
bo ba atulezwi ki ya Maata Kaufela.
15U ba tiselize sicaba sa kwahule
ku t'o ba lwanisa,
ili sicaba sa libangoki se ne si bulela
puo i sili,
ba ba si na likute kwa macembele
kamba ku ba ni makeke kwa bana.
16Ba nga bana ba mbelwa
ba bashimani b'a n'a lata hahulu.
Ba mu siya a li nosi feela,
a sinyehezwi ki bana ba hae
ba basizana.
17“Haili ka na, bana ba ka,
ni ka kona ku mi tusa cwañi?
18Yena ya mi tiselize likozi zeo,
ki yena ya kona ku mi lukulula
kwa lila za mina.
19A mu zamaye, bana ba ka,
mu ikele!
Ni swanezi ku siyala mwa maswabi
ni li nosi.
20Ni tubuzi liapalo za nako ya kozo,
mi ni apezi liapalo za ku itapelela
ka maswabi.
Ni ta itilelela ku ya Maata Kaufela
mwa bupilo bwa ka kamukana.
21“Mu tiye pilu, bana ba ka.
Mu lapele ku Mulimu.
U ta mi lamulela ku ba ba mi
nyandisa, ni kwa lila za mina.
22Kakuli ni talimezi ya Maata Kaufela
kuli a mi lukulule,
mi ni tahezwi ki tabo ye zwa
ku Ya Kenile,
ka musa o mu tuha mu fumana
ku Mupilisi wa mina ya kamita.
23Ka maswabi ni ka mioko,
ni mi talimezi ha mu funduka,
kono Mulimu u ta mi kutiseza ku na
ka tabo ni nyakalalo kuya kuile.
24Sina ba ba bapani ni Sione
mo ba bonela manyando a mina
a butanga,
kihona mo ba tuha ba t'o mi bonela
mu lukuluzwi ki Mulimu,
ya ta ikenya mwa maata a matuna
ni kanya ya Mulimu ya Kamita?
25Bana ba ka, mu tiye lipilu ka buhali
bwa Mulimu bo bu mi tahezi.
Mu nyandisizwe ki sila sa mina,
kono cwale mu ta bona
mo si ta sinyehela,
mi mu ta si hatikela ka mahutu.
26Bana ba ka ba ba latiwa ba zamaile
mwa linzila za matulungundu,
ba sotezwa ki lila ze situhu
sina mutapi wa lingu.
27“Mu tiye lipilu bana ba ka,
mu lapele ku Mulimu.
Yena ya mi tiselize manyando a,
u ta mi hupula.
28Sina ha ne mu keluhile ku Mulimu
ka tato ya mina,
cwalehe, mu kutele ku yena
mi mu mu bate ka tata luli.
29Sina mw'a mi tahiselize likozi zeo,
kihona mw'a ta mi piliseza
ni ku mi fa tabo ye sa feli.”
Sepo ya Jerusalema
30U tiye pilu, Jerusalema!
Yena ya ku file libizo leo,
u ta ku omba-omba.
31Ba ba ku ezize maswe kaufela,
ni ku itumela ka ku wa kwa hao,
ba ta nyanda.
32Manyando a ta kenela minzi
mo ne ba luilwe bana ba hao.
Butata bu ta kenela munzi o n'o amuhezi
bana ba hao ba bashimani.
33Kakuli sina ha ne ba tabisizwe
ki ku wa kwa hao,
mi ne ba itumezi ka ku shandauka
kwa hao,
ba ka swaba cwalo ka ku nyandiswa
kwa bona.
34Ni ta ba amuha tabo ye zibahala
mwa minzi ye tumile.
Buikuhumuso bwa yona bu ta fetuha
sililo.
35Mulilo o zwa ku ya Maata Kaufela
u ta ba cisa ka nako ye telele,
mi mioya ye maswe i ta pila ku bona
ka lilimo-limo.
36Jerusalema, u talime kwa upa,
u bone tabo y'a ku tiseza Mulimu.
37Bona, bana b'o n'o talimezi
ha ba funduka, ki ba, ba kuta.
Ba t'o kopana ku zwa kwa upa ni wiko,
ba kutele kwa hae
ka taelo ya Ya Kenile,
ba nze ba itumela ka maata a Mulimu.
Цяпер абрана:
Baruki 4: Lozi09
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Lozi Interconfessional Bible, Catholic Edition © Bible Society of Zambia, 2009.