Baruki 3
3
1“Oho Mulena ya Maata Kaufela, Mulimu wa Isilaele, moya o mwa manyando ni pilu ye zielehile, cwale se li itilelela ku wena. 2Oho Muñ'a Bupilo, u lu utwe, mi u lu shwele makeke kakuli lu ku foselize. 3Wena u mwa lubona lwa hao kamita kono luna lu nze lu shwa nako ni nako. 4Mulena ya Maata Kaufela, Mulimu wa Isilaele, u utwe tapelo ya luna, Maisilaele ba ba se ba bata ku shwa, luna bana ba ba ba ku foselize mi ba si ka utwa linzwi la Muñ'a Bupilo, Mulimu wa bona, mi kikabakaleo lu tahezwi ki bumai. 5U si ke wa hupula bufosi bwa bo kukw'a luna, kono u hupule maata a hao ni libizo la hao. 6Kaniti luli ki wena Muñ'a Bupilo, Mulimu wa luna, mi lu shukezwi ku lumbeka wena, Muñ'a Bupilo. 7U lu file likute mwa lipilu za luna kuli lu ku kuteke ni ku lu tiisa kuli lu ku lapele. Lu lakaza ku ku lumbeka mwa butanga bwa luna, kakuli mwa lipilu za luna, lu se lu felisize bumaswe bwa bo kukw'a luna ba ba ku foselize. 8A ku lu talime Mulena kacenu, lu sa li mwa butanga, mo u lu hasanyelize sina batu ba ba maswe, ba ba hanilwe, kabakala bumaswe kaufela bwa bo kukw'a luna, ba ba ne ba hanile Muñ'a Bupilo wa luna.”
Butali ni liswanelo za Isilaele
9 #
Mash 4.20-22
Isilaele, teeleza kwa litaelo
ze pilisa!
U utwe, mi u itute se si taluswa
ki zibo ya niti.
10Isilaele, kikabakalañi ha u li
mwa naha ya lila za hao?
U ya u supalela mwa naha i sili.
11U ikabela bumaswe ni ba ba shwile,
ni ku balelwa hape ku ba ba shwile.
12Ki kabakala kuli u siile siliba
sa butali.
13Kabe n'o zamaile mwa nzila
ya Mulimu,
n'o ka pila ka kozo kuya kuile.
14Ziba ko ku na ni butali, maata,
ni kutwisiso,
mi u itute ko ku na ni mazazi
a mañata, ni bupilo,
ko ku na ni liseli la meeto ni kozo.
15 #
Job 28.12, 20 Kono ki mañi ya fumani butali
ko bu inzi?
Ki mañi ya keni mwa ndu ya bufumu
bwa hae?
16Cwale ka nako ye,
bazamaisi ba macaba ba kai?
Ba kai ba ba ne ba luile nihaiba
lifolofolo za mwa naheñi?
17Ba kai ba ba ne ba kona ku laela
linyunywani za lihalimu ni ku li busa,
ba ba kubukanyize gauda ni silivela
ye sepilwe hahulu ki batu,
mi bufumu bwa bona ne bu si na palo?
18Ba kai likwala ba ba ne ba tokomela
ku eza lika ze komokisa hahulu
ka silivela?
19Ba shwile. Ba mwa mabita!
Ba bañwi ba ngile libaka za bona.
20Masika a manca a pila mi a taza
lifasi ka nako ya ona.
Kono mikwa ya ku ba ni zibo
ki yona ye ne ba si ka ziba.
21Ha ba si ka utwa linzila
za ku ba ni butali.
Nihaili bana ba bona
ha ba si ka ziba se siñwi
ka za butali.
Ba kwahule hahulu ni nzila
ya ku ya ku bona.
22Ha ku na se ne si utwahalile
ka za butali mwa Kanana.
Ha ku na se ne si bonahalile
ka za bona mwa Temani.
23Bana ba Hagare ba ba bata ku ziba
za butali bwa lifasi,
balekisi ba Midiani ni Tema,
ba ba bulela ka linguli ni batalifi,
ha ku na wa ku bona ya zibile
mo bu fumanelwa butali,
kamba ku fumana nzila ye bu zamaya.
24Isilaele, mbyumbyulu ki ye tuna
cwañi!
Puso ya Mulimu ki ye tuna hahulu.
25I kai ni kai, mi ha i feli.
26 #
Sim 6.4; But 14.6 Ku yona ne ku pepezwi batu
ba ba maata,
ba ba ne ba tumile hahulu kamita,
ba batelele hahulu, ba ba ziba hande
za ndwa.
27Ba, ha ba si ka ketwa ki Mulimu.
H'a si ka ba zibisa kunutu ya zibo.
28Ba shwile kabakala ku tokwa butali,
mi ba bulailwe ki bukuba bwa bona.
29Ki mañi ya kile a ya kwa lihalimu
mi a y'o swala butali,
a y'o bu zwisa mwa malu,
ku bu tisa fafasi?
30Ki mañi ya kile a sila liwate
mi a y'o bu fumana,
a bu leka ka gauda ye nde hahulu
mi a bu tisa?
31Ha ku na ya ziba nzila ye ya
ku bona,
mi ha ku na ya kona ku fumana
mo bu zamaya.
32Kono Yena feela ya ziba linto
kaufela, wa bu ziba.
U bu sweli ka ngana ya hae.
U tiisize lifasi kuya kuile,
mi u li talize ka lifolofolo za mahutu
a mane.
33U lumela liseli, mi la ya.
H'a li biza li mu utwa ka sabo.
34Linaleli li benya li tabile
ka linako za zona.
H'a li biza za alaba. Li li,
“Ki luna ba.”
Li benyeza Mubupi wa zona ka tabo.
35Ki yena ye li Mulimu wa luna.
Ha ku na yo muñwi ya ka likanyezwa
ni yena.
36U zibile nzila ya butali kaufela,
mi u i file mutang'a hae Jakobo,
ni Isilaele ya latiwa hahulu.
37Mi cwale u bonahalisize butali
mwa lifasi
mi bu pila mwahal'a batu.
Цяпер абрана:
Baruki 3: Lozi09
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Lozi Interconfessional Bible, Catholic Edition © Bible Society of Zambia, 2009.