Baruki 2
2
1“Cwale Muñ'a Bupilo u latelezi katulo ya hae y'a n'a bulezi ku luna, kwa baatuli ba luna ba ba ne ba busa Isilaele, kwa malena ni bazamaisi ba luna, kwa batu ba Isilaele ni ba Juda. 2S'a ezize Muñ'a Bupilo mwa Jerusalema ha si si ka be sa ezahala mwa lifasi kaufela. Ze kaufela li lumelelana ni se ne si ñozwi mwa Mulao wa Mushe. 3Kaufel'a luna lu fitile fa ku ca bana ba luna, yo muñwi a ce mwan'a hae wa mushimani ni yo muñwi a ce cwalo mwan'a hae wa musizana. 4Fahalimw'a zeo u ba neezi mwa maata a mibuso kaufela ye lu potolohile kuli ba swabiswe hahulu ni ku haniwa ki macaba kaufela a fakaufi ni bona, a lu hasanyelize ku ona. 5Bakeñisa kuli ba be babusi, ba ipumana ba li batanga, kakuli ne lu foselize Muñ'a Bupilo, Mulimu wa luna, ka ku sa mu utwa.
6“Ku luka ki kwa Mulena Mulimu wa luna, kono luna lu swanelwa ki maswabi a matuna o lu na ni ona kacenu sina a n'a bile teñi ku bo kukw'a luna. 7Likozi kaufela ze ne li bulezwi ki Mulimu ku luna, cwale li se li ezahalile. 8Mi nihakulicwalo, kaufel'a luna ha lu si ka lika ku tabisa Muñ'a Bupilo ka ku hana litaelo za lipilu za luna ze maswe. 9Cwalehe, Muñ'a Bupilo n'a litezi nako ye lukela ya ku lu tiseza manyando ka yona, kakuli Muñ'a Bupilo u lu kutiseza se si lukela likezo za luna ka ku sa eza z'a lu laezi kaufela. 10Mi hape ha lu si ka teeleza ku z'a n'a lu laezi ili kuli lu latelele milao y'a n'a lu tomezi.
Tapelo
11“Mi cwale, Muñ'a Bupilo wa Isilaele, ki wena ya zwisize batu ba hao mwa naha ya Egepita ka lizoho la hao le li maata, ka liponiso ni limakazo, ka maata a matuna ni ka mukwa o komokisa hahulu ili ku tumisa libizo la hao le li sa zibahala ni kacenu. 12Lu fosize, mi lu bile ba ba si na tumelo. Muñ'a Bupilo, Mulimu wa luna, lu tuzi milao ya hao kaufela. 13U felise bunyemi bwa hao ku luna kakuli lu ba banyinyani hahulu mwa licaba z'o lu hasanyelize ku zona. 14Muñ'a Bupilo, u utwe tapelo ya luna ni kupo ya luna. U lu lukulule kabakala libizo la hao le li kutekeha mi u lu eze ka musa wa hao kuli ba ba lu hapile ba bone maata a hao. 15Lifasi kaufela li ka ziba kuli ki wena Muñ'a Bupilo, Mulimu wa luna, kakuli Isilaele ni baikulu ba hae ba zibahala kuli ki batu ba hao.
16“Muñ'a Bupilo, u lu talime, u li mwa sibaka sa hao se si kenile, mi u lu hupule. 17Lu talime, Muñ'a Bupilo, mi u hupule bafu bao, mioya ya bona i zwisizwe mwa mibili ya bona. Ha si bona ba ba sa ku lumbeka ni ku ku latelela, Muñ'a Bupilo. 18Mutu ya imezwi ki manyando, ya zamaya a ikinamezi, a na ni moya o swabile, ki yena ya lukela ku ku lumbeka, Muñ'a Bupilo, ni ku ku latelela ka swanelo.
19“Ha lu itingi fa misebezi ya bo kukw'a luna ni ya malen'a luna ha lu ku kupa ka buikokobezo, wena Muñ'a Bupilo, Mulimu wa luna. 20Batili, kakuli u tisize bunyemi ni buhali bwa hao ku luna sina mo n'o sepiselize ka batanga ba hao bona bapolofita, ha ne ba ize, 21#Jer 7.34; 27.10-12 Muñ'a Bupilo u li, ‘Mu ikokobeze, mi mu koze ku mulena wa Babilona, mi mu ka ba mwa naha ye ni file bo kukw'a mina. 22Kono mwendi ha mu na ku utwa linzwi la Muñ'a Bupilo, ni ku koza ku mulena wa Babilona. 23Fohe, ni ta kuzisa milomo ya tabo kaufela, ya banyali ni banyaliwa, mwa minzi ya Juda ni mwa mikwakwa ya mwa Jerusalema, mi naha kamukana i ka kutela ku ba lihalaupa feela le li si na batu!’
24 #
Jer 8.1-2
“Kono ha lu si ka mamela linzwi la hao ni ku koza ku mulena wa Babilona. Kikabakaleo u ezize s'o n'o sepisize ka batanga ba hao bona bapolofita, kuli masapo a mulen'a luna ni a bo kukw'a luna a ka pumbulwa mwa mabita a ona. 25Ki niti, n'a latezwi mwa lizazi ni mwa silami sa busihu. Mi batu ba shwa ka manyando a sabisa, ka tala, ka lisabule, ni ka matuku. 26Kabakala bumaswe bwa mba ya Isilaele ni ya Juda, Tempele ya libizo la hao i sinyehile kacenu.
27“Kono nihakulicwalo, Muñ'a Bupilo, Mulimu wa luna, u lu pilisize ka mukwa o swanela bunde ni lilato la hao. 28#Mul 28.58, 62 N'o lu sepisize cwalo ka mutang'a hao Mushe ha u mu laela ku ñola Mulao fapil'a bana ba Isilaele, ha u li, 29‘Haiba mu sa utwi linzwi la ka, buñata bo butuna hahulu bo bwa batu, kaniti bu ka fukuzwa ku ba palo ye nyinyani feela mwahal'a macaba mo ni ta ba hasanyeza. 30Na ziba hande kuli batu ba ha ba na ku utwa kakuli ki liñañeli. Kono mwa naha mo ba ta luiwa ba ta y'o li hupula kamukana. 31Ba ka lumela kuli ki na Muñ'a Bupilo, Mulimu wa bona. Ni ta ba fa lipilu ni ku ba fa ngana ya ku utwa. 32Ba ta opela lipina za ku ni lumbeka mwa naha mo ba ta y'o luiwa, mi ba ta hupula libizo la ka. 33Ha ba sa na ku ba liñañeli hape, kono ba ta hupula se ne si tahezi bo kukw'a bona ba ba ne ba foselize Muñ'a Bupilo, mi ba ka tuhela bumaswe bwa bona. 34Cwale ni ta ba kutiseza mwa naha ye ne ni sepisize ka buitamo ku Abrahama, Isaka ni Jakobo, mi ba ta ba bañi ba yona. Ni ta ba atisa mi ha ba na ku fukuzeha. 35#Jer 32.38-40 Ni ta eza ni bona bulikani bo bu sa feli. Ni ta ba Mulimu wa bona, mi bona, ba ta ba batu ba ka. Mi ha ni sa na ku leleka batu ba ka ba Isilaele hape mwa naha ye ni ba file.’
Цяпер абрана:
Baruki 2: Lozi09
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Lozi Interconfessional Bible, Catholic Edition © Bible Society of Zambia, 2009.