Baruki 1
1
Baruki ni Majuda mwa Babilona
1 #
Jer 36.4
Ki a manzwi a buka ye n'e ñozwi mwa Babilona ki Baruki, mwan'a Neria wa Mahaseya, ya n'a pepile Zedekia wa Hasadia, mwan'a Hilikia. 2U i ñozi ka silimo sa buketalizoho, ka lizazi la busupa la kweli, ili ka nako ya ku hapwa ni ku ciswa kwa Jerusalema ki Makalade.
3 #
2 Male 24.8-17
Baruki a bala manzwi a buka ye ka ku tumusa linzwi. A balela Jekonia mwan'a Joyakimi, mulena wa Juda, ni batu kamukana ba ba ne ba til'o utwa manzwi h'a balwa. 4A balela kwa batompehi, bana ba malena, manduna ni batu kamukana, ba ba kutekeha ni batu feela, ba mwa Babilona ba ba pila kwatukw'a Nuka ya Sudi. 5Ha ba utwa manzwi ao, ba lila, ba itima lico mi ba lapela ku Muñ'a Bupilo. 6Ba kopanya mali a mañata ka mo ne ba konela kaufela. 7Ba a lumela kwa Jerusalema ku muprisita Joyakimi, mwan'a Hilikia wa Shalume, ni baprisita ba bañwi hamoho ni batu kaufela ba ba ne ba ina ni yena mwa Jerusalema.
8Ka lizazi la bulishumi la kweli ya Sivani n'e li Baruki ya n'a kutisize libyana za mwa ndu ya Muñ'a Bupilo, ze ne li zwisizwe mwa Tempele, ku li kutiseza mwa naha ya Juda. Libyana zeo n'e li mikeke, likomoki ni linkwana za silivela ze ne li ezizwe ka taelo ya Zedekia mwan'a Josia, mulena wa Juda. 9N'a li ezisize ka nako yeo Nebukadenezare, mulena wa Babilona, n'a zwisize Jekonia hamoho ni bana ba malena, likwala, manduna kaufela ni batu feela mwa Jerusalema, ku ba isa kwa Babilona.
10Cwale ba mu ñolela, ba li, “Lu mi lumela mali ao kuli mu lekise linto za litabelo za ku cisa ni za swalelo ya libi, ni insense. Mu lukise ni litabelo, mi mu li ezeze fa katala ka Muñ'a Bupilo, Mulimu wa luna. 11Mu lapelele Nebukadenezare mulena wa Babilona, ni mwan'a hae Belishazare, kuli ba be ni bupilo bo butelele, bo bunde. 12Mu lapele hape kuli Muñ'a Bupilo a lu fe maata ni kutwisiso ye nde, ili kuli lu te lu pile hande mwa silelezo ya Nebukadenezare mulena wa Babilona, ni mwan'a hae Belishazare, ni kuli ba lu tabele. 13Hape mu lu lapelele ku Muñ'a Bupilo, Mulimu wa luna, kakuli lu mu foselize, mi bunyemi ni buhali bwa Mulimu ha bu si ka be bwa zwa ku luna. 14Ka ku feleleza u bale buka ye, ye lu ku lumela, ka ku pahamisa linzwi, mi mu ipulele libi za mina patalaza mwa ndu ya Muñ'a Bupilo ka lizazi la mukiti ni ka nako ya mazazi a tomilwe a mikopano.”
Buinyazo bwa libi
15Mu li, “Ku luka ki kwa Muñ'a Bupilo, Mulimu wa luna, kono maswabi a siyalezi ku luna, luna batu ba Juda ni bañi ba Jerusalema. 16Hape maswabi a siyezi kwa malen'a luna, bana ba malena, kwa baprisita ni bapolofita mane ni ku bo kukw'a luna. 17Ki kabakala kuli lu fosize fapil'a Muñ'a Bupilo. 18Ha lu si ka mu mamela ni ku teeleza linzwi la hae h'a lu bulelela kuli lu latelele milao ya hae y'a lu tomezi. 19Ku zwa ka lona lizazi leo Muñ'a Bupilo a zwisize bo kukw'a luna mwa naha ya Egepita ku fitela kacenu le, ne lu sa kuteki Muñ'a Bupilo, Mulimu wa luna. Ne lu sa sepahali ku yena ka ku sa mamela manzwi a hae. 20#Mul 28.15-68 Kikabakaleo lu tahezwi ki likozi ni manyando a n'a bulezwi ki Muñ'a Bupilo, ka mutang'a hae Mushe muta a zwisa bo kukw'a luna mwa Egepita ku lu fa naha ye nde hahulu ye, ye na ni mabubela a mabisi ni linosi, ili ona manyando e lu bona kacenu. 21Bakeñisa ku utwa manzwi kamukana a bapolofita b'a n'a lu lumezi, ha lu si ka mamela linzwi la Muñ'a Bupilo, Mulimu wa luna, kono mane yo muñwi ni yo muñwi u latelezi mo i mu isa pilu ya hae ye maswe, mi lu yaulukezi kwa ku sebeleza milimu i sili, ni ku eza ze sa tabisi Muñ'a Bupilo, Mulimu wa luna.
Цяпер абрана:
Baruki 1: Lozi09
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Lozi Interconfessional Bible, Catholic Edition © Bible Society of Zambia, 2009.