PANGERANGU 31
31
Na panaungu nduma maràmba
1Yiada-ha da kareuku da patiki-na na inana na Lemualu na maràmba Maha ndumana na anana,
2“Dou na ananggu, na wuranggu, pa-paana-nggu na hemana na hamayangu-nggu. Nggàra bàdi papanii-nggunggau? 3Àmbu pambuta-ya na àtalu-mu jàka ndia àmbu hàbaru-dunya da pariimu la kawini. Mbàda danguka maràmba ma-kanabu ruku kawini. 4Ngàdaya ha Lemualu! Na unungu angguru dàngu na malumbangu paunu ma-maüku nda ràka-ana la hanganji. 5Nadu, jàka na-unungu ma-maüku na maràmba, nambula-nya na uku dàngu nda na-ihili-anya na nduma tau lamanga. 6Da paunu ma-maüku jiaha da ndumada nyuda da ma-mangonangu dàngu da ma-hawina. 7Hi da-unungu ka peku maromba-danya na milada dàngu na handuka-da.
8Kahiri-hawa nyuda da manda peku pa-kahiri wikida. Opa-nyawa na ngera mbuu ndàbana na tau manda payatangu. 9Parukangu-ma ndumada nyuda dàngu njadiwa hakimu ma-padeningu. Opanya na ngaba tau mila dàngu tau pa-kapidihu,” wàna.
Na papaha na ma-nggàhungu
10Na papaha na ma-nggàhungu nda namuda la pahunggu-ya;
narihi pawilingu-pa welingu la itangu mbaraliangu.
11Na mini leina nda nggàra-a majapu-nya,
ba namonu-dunya nyuna.
12Nda ana wunda-mana manjala hanggangu la mini leina;
la ngala lurina nawunda mànunya mahàmu.
13Na-maràna pa-pauhingu rami dàngu ruu ihi mbimbi
hi na-karinggatu paràma ba na-tinungu.
14Na-palaüngu pangangu welingu la mamarau,
hama tuna na pawàda da kapalu danggangu.
15Na-hadangu la mbaru hada rudungu la pa-paloku-nja pangada da ihi kuru umana,
dàngu hi napabe - berinja paràma da-papalewa-na.
16Nahimbu hau woka, hi nadingi-ya;
napoka hau woka angguru welingu la pangala wikina.
17Na-hawanjiru wikina
la paràma pa-mbangatungu.
18Napinya pa-wilingu-da mbuu ndàba da paràma-na;
lupa la padua-ka rudungu ba naràma.
19Na-ndataru lulu kamba
hi na-tinungu hinggi.
20Nda na-kutuhu-a la manda patoma lurina;
nahàmu-nya eti na tau makarai-ya pa-ndulangu.
21Nda na-mbimbitu-anya na tàkana na wula maringu,
ba mbàda ningu hahangu-duka kalembi mamitu nduma ihi umana.
22Nyuna wiki ma-hikungu topu lata wihina;
da pakina tera linangu rara atu ma-kanjupu pa-wilingu-ha.
23Na leina tau hungaya –
haàtu liku uruya la honga liku uru paraingu.
24Na-pandoi paki dàngu boru bànggi
hi nadangga-nja la tau danggangu.
25Nyuna pa-mahumbarungu-ya dàngu patembi-ya;
dàngu nda na-mbimbitu-anya na lodu na manàmu-nya.
26Na-mandangu na paniina;
na-manggàna na kareuku-na.
27Na-maràna mànu ba naràma
dàngu na-hamata-ya na pa-patoma wàna na ihi umana.
28Na-pawili-nya paraï da anana,
dàngu nawotu-nya paraïna leina.
29“Dadangu da kawini hàmu,”
“tàka nyumu murihi halawàla-pa pahàmu welingu lai nyuda mbuu ndàbada,” wàna na leina.
30Na mata ma-hawelaru nda pawai-aya dàngu na manandangu napa nanjàpu;
tàka na kawini ma-karadaku-nya i MIRI ràka-mana ba na-ngalangu wotungu.
31Palimba-nya na hàmu-naka;
nyuna kawini ràka patembi-ya la nggi - nggini!
@LAI 1995 Indonesian Bible Society (Lembaga Alkitab Indonesia)