MA-PABOBARUNGU 1
1
1Da kareuku la mbuku yiana welida lai Ma-tanjiku Kanandingu na anana mini i Ndautu, na mahilu-ya i Ndautu pa-hanganji la Yeruhali.
2Napanii i Ma-tanjiku Kanandingu: Mbutana mbuu ndàbana kahewa ju - jua-ma-ana dàngu nda ningua linguna! Kahewa-ma-ana na luri mbuu ndàbana nda ningua ihina. 3Taràma la ngala lurinda, lundu mihi wai hanggobungu-nda. Tàka, nggiyaka na ihina na pa-hamemu wànda? 4Wudaku wànaka na handalaru, molungu-nanyaka na handalaru, tàka na pinu tana nda na-pajilungu-a. 5Nahunga-mapa na mata lodu dàngu natama-mbupa. Dàngu njilina nabeli-ya la pangia-na, hàlaka hi nahili hunga beli. 6Na-hapuputu hu luru na ngilu, hàlaka hi na-hapuputu hu dia; na-kapili punjilu, hàlaka hi nahili beli. 7Mbutada da luku da-lulungu la tehiku, tàka nda nambinu ndokua na tehiku. Na waina nabeli la katiku luku, tàka hi nahili lulungu beli. 8Mbuta-naka nuna hoda bia-ndanyaka dàngu dira matiki-ya nuna na hodanda. Da matanda nda dira ndokuda pa-tàngaru; da kahilu-nda nda ana mahobi-da pa-patingingu. 9Nggàraya na mambàda njadi, napa nahili njadi beli. Nggàraya na pambàda wunda, napa pahili wunda beli-mayai. Nda ana nggàra-a mabidi yia la pinu tana. 10Ningu mapanii, “Tàngaru yiana mabidi-ya!” wàna. Tàka nuna nu mbàda ninyaka duna ba ndedi tadedi. 11Napa na tau nda nanamu-ayapa na manjadi la rehi na ma-làpahu. Tuna numbu na manjadi la rehi na nàhu dàngu la rehi manàmu-nya, napa nda na-pangàda-anyapa paraï da tau la rehi na manàmu-nya.
Na pambàda denina i Ma-tanjiku Kanandingu
12Nyungga, i Ma-tanjiku Kanandingu, ma-pareta la Yeruhali ba hanganji Ihirailu-ka. 13Kita-mananya na etinggu pa-manginjiru-ya dàngu pa-papeka-nya mbuu ndàba na manjadi la pinu tana yiana.
Na uranda pa-panduma-nanda i Ala kanjupu pa-hawina wànguya. 14Mbàda ita-nggunyaka mbuu ndàbada da pawunda tau la pinu tana yiana. Tubangu, wàmuwa mbuu ndàbada nuda kahewa-ma-ada, hama tuna na pa-mukarungu pa-kehangu ngilu. 15Na ma-kaleka nda peku patànji-aya, dàngu na manda ninya, nda peku diha-aya.
16Kupanii la etinggu, “Nyungga duku ku-manggàna, kanjupu rihika pa-manggàna welingu la mbuu ndàba da tau ma-pareta la Yeruhali ma-mangilu-ngga nyungga. ku-kangutungu padangu ihina na manggàna dàngu papingu wàngu,” wànggu. 17Ba tuna kita-mananya na etinggu la papinya na pahilitu-na na pingu dàngu na nduba, na manggàna dàngu na kambànga. Tàka na ma-lohangu nyungga duku hama tuna ma-kehangu ngiluka. 18Nadu hama huka danguna na manggàna-nda, hama huka mangginggitu-na na etinda. Hama huka danguna na papinda, hama huka dangu-manai na handuka-nda.
@LAI 1995 Indonesian Bible Society (Lembaga Alkitab Indonesia)