PANGERANGU 21
21
1Hama tuna ba na-paloku-ya na wai luku i MIRI, ka na-lulungu kikunya na pambuha-na Nyuna,
tuna numbu ba na-kapipi-ya na-kanandingu hanganji.
2Nimbihu-na pawunda tau talànga wanguna ma-tubangu-ha la kanandingu wikina,
tàka i MIRI duna na ma-patanda-nya na pawuku etina.
3Na pawunda mamola dàngu ma-tubangu narihi liyapa na etina i MIRI
welingu la mbuu ndàbada da hunggu maraku.
4Na tau akatu nanjala,
ba na-kuaha duya paraï abungu dàngu ngànjangu-na.
5Na pa-pakakangu la eti tau ma-maràna nangàndi bundungu;
na pawunda nggànggatu na-patàka-nya na kawawaku.
6Da pawulu pangala wàngu kaputingu
darengga mbulangu dàngu dangàndi-ya na tau la lambongu reti.
7Na tau akatu nda na-mbuhangu panunju-ya na uku;
na-pamayila-ya paraï mbana eti wikina.
8Na tau na manjala, na-pawiki - wikitungu na àndana;
na tau na mahàmu na-patutungu mànu na lurina.
9Ngiangu la kabihu hindi narihi hàmupa
welingu ba ngia kahau uma dànya na papaha ma-mbuhangu pa-pahànggangu.
10Na tau akatu narinju mànungu pawunda-ya na ma-akatu;
nggamu biaya na tau nda ninguma pamila-na eti.
11Jàka hukunya na tau paakangu, nanjadi lii papekangu la tau manda ndàmangu.
Jàka hàngga nàrunya na tau paeti, na pa-bonjangu pa-manggàna.
12I Ala Mahupu-mola napinya nggàraya na matumbu la uma tau katadaku.
Napa na-patiri nggubulu-nja nyuda hi da-tàlaru.
13Nggamu manda bihu parongu-ya na pa-ngodungu tau manda patoma lurina
nda pa-patingi-anya napa jàka nyuna wiki na makarai pa-ndulangu.
14Ka pa-wadaru-ya na mbeni dàngu na ma-karaü,
wua winingu bia pawua juangu.
15Jàka palaku-ya na mamola nambaha eti na tau hàmu,
tàka na tau akatu napa na mangàdatu.
16Na tau manda kikunya na huri luri tau paeti,
lupama natàka la pangia tau meti.
17Na tau na ma-mbuhangu paluri mànu la mahàmu, pa-daingu japuna na lurina;
na tau na ma-mbuhangu paluri borakungu nda na-ngalangu-a pawulu.
18Jàka nahuku-nya na lii panggolu i MIRI,
na ma-hanggàmaru nda tau hàmua tàka na tau akatu duna.
19Narihi hàmupa ba ngiangu la maràda telangu,
welingu ba ndàdiku dànya na papaha na ma-mbuhangu pa-kambunguku dàngu na makàli mbeni.
20Na tau manggàna daingu luri mbokaru dàngu wuluna;
tàka na tau nduba duna na-hiru hàruha da banda da malanja-na.
21Jàka nggamuya na ma-pamukarungu ka na-hàrangu na mamola dàngu na paaï pa-namungu,
nangala-nya na peku hàmu, na tembi dàngu na malai luri.
22Na tau na mamàhi na-duluku pawàhi paraingu padai tanatara ma-kaborangu;
na-nyungguru-ha da tindingu da pamonu-da.
23Ka hinggilu-nya na harui,
pananjarungu bàdi la kareuku.
24Na tau ngànjangu dàngu majangga etina
na-mbuhangu pa-paakangu anguna dàngu na-katadaku.
25Na tau mayau na manda mbuhangu paràma;
pameti-nanya wikina wàngu parinju etina.
26Na-kanjupu-ya na lodu ba na-kanandi-nya
jàka nggàraya na parinju-maana.
Hauyai duna, na tau na ma-kunduhu lurina
na-wuangu pada - danguma.
27I MIRI nda nambuha-anja da hunggu maraku tau akatu,
ri - rihi jàka nawotu wànja pawuku manda hàmu.
28Na pa-hakahiingu-na na tau kambàliku nda pawai-aya;
tàka na panii tau mapi hàmunya nggi - nggikina na palakara jiaya napa na pa-kataku.
29Na tau tànji napi hàmungu wikina;
na tau akatu nda napingu pa-makia.
30Nda ningua pingu, halimu kotu jàka ndia manggàna
mamàka la pa-torungu la hanggana i MIRI.
31Jiapa ka pamàtu wànya njara pabera na pabera,
na ma-kawuku-ya na talu jiaya i MIRI.
@LAI 1995 Indonesian Bible Society (Lembaga Alkitab Indonesia)