PANGERANGU 20
20
1Na paunu pa-maüku wàngu paànga wànguya dàngu pa-kariwatu wànguya.
Nduba-nanya na tau na ma-unungu lundu maüku-na.
2Na hànggana na hanganji beri kangaüku hingaya;
na tau na mawuda-ya na hànggana pa-hanggàmaru-nanya wikina.
3Mbulungu tau nduba-a na ma-mbuhangu pa-palumungu;
na huri pa-wotungu jiaya na wiliru-nya na pa-lumungu.
4Na tau tungu woka mamayau nda naràma-aya na wokana la rehi ràmana;
la hupu njàpuna, la rehi muti nda nggàra-a ihina na tanana.
5Na wini eti tau beri hamana na wai humuru ma-lumbungu;
tàka napeku pataku-ya tau maningu eti diha kanandingu.
6Nadangu na tau na mapeka wikina ba angu lànggiya,
tàka harui la pahunggu tau ma-tuturu langatàka.
7Da-utungu da ana da ma-amangu
tau hàmu dàngu na ma-kunduhu lurina.
8Jàka na mandapu la kanjàka patandangu ngera na hanganji,
peku ita ndàba-nanya na ma-akatu.
9Ningu nu tau mapanii,
“Naili-ma duku na etinggu, ku-pahàla-maka welingu la njala,” mapeku la pawàna?
10Na timbangu dàngu na pa-hukutu wàngu na ma-palapingu
nda nambuha-anya paraïna i MIRI.
11La pawunda-na na haàtu ana ta-ngalangu papinya
na hàmu dàngu natànji ihu na hurina hi ndia.
12Da kahilu parongu wànguha hamanai da mata paita wànguha,
pa-kadua-da pa-padika-na i MIRI-ha.
13Na tau ma-mbuhangu pa-mahuru, lupangu-ma na hadànjalu la mila.
Na tau ma-maràna paràma, ningu pangangu danguna.
14Na tau na makei, na-kayeku bàti mànunya na mbotuda da wili.
Tàka ba nahàla-ka pakei, na-bokului na etina ruku wili pangala-na.
15Da kareuku papingu wàngu,
darihi pa-wilingu-pa welingu la àmahu marara dàngu la itangu mbaraliangu.
16Nggamu ma-mbuhangu patanggu duku wutangu tau hawiangu,
ràka-mana jàka pitiha da manguna la pa-pamàndu wànya na paràndi-na.
17Da pawulu pangala wàngu pa-lapingu, dalàngga la pakiri-na,
tàka la malamiri beri hama karunggu watuha ba pàdanja.
18Na-hàrangu na pawuku rukuna ba timbangu;
jia ba tuna àmbu parukangu-du jàka nda pakaka pa-hàmungu.
19Na tau na ma-mbuhangu papulu-nya na tau hawiangu, nda na-ngalangu-a pa-kawini-nya na pa-kàpingu;
àmbu panggolu dàdunya na tau malalu dangu kareuku-na.
20Na tau na maràtu-nja da ina amana, napa na-molungu na lurina
hama tuna palita mambàda la rudungu kapàtangu-ya.
21Da pawulu wàngu da parengga ngalangu,
na-lohangu la hupu njàpuna ba nda kanyuru-aha.
22Àmbu himbalu wànya akatu na ma-akatu;
pawaiwa lai MIRI, ba Nyuna duna ma-pandulangu.
23Na timbangu dàngu na watu timbangu pa-lapingu
nda nambuha-anya paraïna i MIRI.
24I MIRI na mambàda kawuku-ya na ànda lurina na tau yia la pinu tana;
tuna nu duka hi nda natama la kanandingu-na na tau na ruku ànda luri wikina.
25Kanandi hàmu-pàkunya ba ndedipa uràndinya kameti maraku i MIRI.
Talànga wanguna upekadu halaera la lodu malamiri.
26Na hanganji ma-manggàna napi-manya nggamuya na tau akatu;
napa nahuku-nja dàngu nda pa-aïngu.
27Na papàda eti tau pinu tana harii welingu lai MIRI-ya
na ma-handaraku-nya nggubulu-na na eti dalu.
28Jàka na-pareta wàngu pa-namungu, pa-tutungu dàngu molana na hanganji,
na pa-daingu paningu kuaha-na.
29Da bidi tau pa-maratangu-nguha rukuna na pariida,
dàngu pa-humbarungu-ha da ma-kaweda ruku lunggi uwangu-da.
30Talànga handàka na mapuri mapaita na-podahu-ya na akatu,
tàka hi na-paili-ya na eti tau.
@LAI 1995 Indonesian Bible Society (Lembaga Alkitab Indonesia)