PANGERANGU 11
11
1I MIRI na-karaü-nya eti na tau na ma-hukutu palapingu
na ma-hukutu pa-deningu nahàmu-nya eti.
2Na tau ngànjangu, napa pa-pawawa-ya;
na tau karàda eti ma-manggàna-ya.
3Na tau hàmu nalonda-ya paraï huri tànjina;
na tau ma-mbuhangu pa-kambàliku, na-palàjaru-ya kambàliku-na.
4Jàka hangganya na meti, da pawulu wàngu nda da-pawilingu-apa;
namara na lurimu jàka na-kunduhu na etimu.
5Na ànda lurina na tau hàmu na-pandidaru-ya tànjina,
tàka na tau akatu na-luaya la pa-làjaru.
6Na tau tànji namara ba na-kunduhu etina;
na tau panda wai, na-hanjubulu ruku manganga etina.
7Jàka nameti na tau akatu, nameti-mbu na monungu-na;
monungu kapàru wiki nda ningua linguna.
8Na tau maili lurina na-hinggilu welingu la handuka;
na tau akatu na-ngalangu pabetangu.
9Na pa-banjarungu tau akatu pa-tàlaru wànguya;
na kaminaku tau hàmu pamara wànguya.
10Na-mangarangu na paraingu jàka na-ngalangu paluri wàngu na tau tànji;
na-paoingu na rayatu jàka nameti na tau akatu.
11Na kanyuru-na na tau tànji na-panggaju-nya na paraingu;
na kareuku tau akatu na-paruha-ya.
12Na pawawa-ya na tau hawiangu pawunda tau ndubaya;
na tau ma-paeti, nda jia nggàra-a patiki-na.
13Na ma-bobaru kareuku nda pa-deningu nda ningua pakàpi-na,
tàka na tau paràka pawai, pekuna la pa-kàpingu palakara.
14Na-taweharu na banjaru jàka nda ningu liku uru;
hama huka danguda da ma-panaungu, hama huka danguna na mambiru.
15Na njanji la patanggu mbayaru wuta tau hawiangu pa-hanggàmaru wànguya;
narihi hàmupa àmbu tama koru-duya nuna ka peku mambiru.
16Na kawini na ma-mambiru panggolu na-ngalangu tembi;
na tau mbana eti na-pauhingu pawulu wàngu.
17Na tau hàmu eti pautu-nanya wikina;
na tau mbana eti parunggi-nanya wikina.
18Na utuna na tau akatu, kamàla utu-aya,
na utuna na tau mawunda mahàmu jiaya na utu ma-palangatàkangu.
19Nggamu ma-paandu la pawunda mahàmu, napa naluri pa-ohangu;
nggamu ma-patidungu pawunda ma-akatu, hanggangu-nanya la meti.
20I MIRI na-karaü-nya eti na tau na ma-akatu etina,
tàka nambuha-nya na tau manda ningu nyurana.
21Na tau akatu lupangu-ma na-ngalangu hukungu;
na tau hàmu jiangu-ma napa namara.
22Na manandangu-na na kawini nda paeti
hamana na tawuru marara la uru wei.
23Na rinju etina na tau hàmu na-patàkangu mànu mahàmu,
tàka na pamonu-na na tau akatu, jiaya na mbenima-a.
24Ningu tau na ma-mbuhangu pa-wuangu, tàka na-bonjangu pawulu,
ningu ma-mbuhangu pa-pananjarungu ma-bonjangu pamila.
25Na tau na mawua pa-dangungu, napa nabundu làndangu,
na tau na ma-mbuhangu pa-pandulangu, pandula-mbuya napa.
26Nggamu ma-pabundungu uhu nggàndumu, naràtu-nya tau,
tàka na tau na madangga-nya, na-ngalangu wotungu.
27Nggamu ma-maràna pawunda mahàmu, nahàmu-nya tau;
nggamu mahimbu ma-akatu, napa nanggàna-ya harui.
28Nggamu ma-hamela wàngu pawulu-na, napa namunju hama tuna ruu ai meti;
na tau maili lurina napa na-hanggebaru hama tuna bidi kalunga.
29Na tau na ma-kubaru-ya na kuru umana, napa da-mbulangu hàla da maninja.
Na tau nduba napa nalumu-nya na tau manggàna.
30Na tau maili lurina na-lànyapu na lurina;
na tau ma-manggàna na-bonjangu na makiku-nya.
31Jàka na-ngalangu-madu himbalu-na la pinu tana na tau hàmu,
jiangu-maka duna napa ba na-ngalangu hukungu na tau akatu dàngu na mawunda manjala.
@LAI 1995 Indonesian Bible Society (Lembaga Alkitab Indonesia)