PANGERANGU 10
10
Na lii panau-papekangu-na i Halomu
1Yiada-haka da lii panau-papekangu-na i Halomu:
Na ana na ma-manggàna jiaya na pa-bokulu eti wàna na amana;
na ana na manduba, na-pahanduka-ya na eti inana.
2Da pawulu da pa-ngalangu wàngu pa-lapingu nda pautu wàngu-aha;
hauyai duna na luri tànji ba jiaya na ma-pamara.
3I MIRI nda jia màta-ananya pa-rimbangu na tau hàmu;
tàka Nyuna napabe - betanya na tau akatu
ka àmbu nangala-nya na parinju-na.
4Na tau mamayau jiangu-ma napa ba namila;
na tau ma-maràna jiangu-ma napa ba nawulu.
5Na tau ma-manggàna na-pauhingu ihi paraïna la rehina,
na tau na ma-katuda-ma-a la rehi kalàmitu ihi paraï, pa-makiàngu-nanya wikina.
6Na tau hàmu napa na-ngalangu kanyuru.
Na mbana eti na-pakambelingu la kareuku tau akatu.
7Na ngera namuha da tau hàmu jiaya na kanyuru,
tàka na tau akatu parengga marombangu-ya.
8Na tau pingu na-mbuhangu pa-kataku lii panaungu;
na tau na manduba kareuku-na, na-njàrangu.
9Na tau tànji, na-mambiru na lurina;
na tau panyonga angu jiangu-ma ba pinya.
10Nggamu makàpi-nya na ma-tubangu, patumbu-nanya maharui;
nggamu ma-paita-nya njalana na anguna la ngaba, wuku-nanya na luri hàmu.#Na hau pa-haleli ndai: nggamu ... luri hàmu; na lawiti Imbarani-na, nahili belinya na ndalaru 8b la ndalaru yiana.
11Na kareuku tau hàmu, na-pawiti-nya na luri pa-ohangu,
tàka la hambeli kareuku tau akatu, na-kawiningu na eti iraku.
12Na pa-umbingu na-patumbu-ya na pa-pahànggangu wàngu;
na mbuhangu najàma-nja da njala mbuu ndàbada.
13Na tau na ma-dàkatu kanandingu-na natiki kare - reuku manggàna;
na tau nduba ràka-mana ka ràmbahu-ya.
14Na tau manggàna na-pauhingu papingu wàngu;
jàka na-kareuku na tau nduba, pa-yepingu-nanya hanggàmaru.
15Da pawulu wàngu naopa-nya na tau wulu,
na mila tanjàriku na-pamija-ya na tau mila.
16Jàka wundaya na mahàmu, na wundana jiaya na luri pa-ohangu;
jàka wundaya na manjala, na-pawiti-nya na njala marihi dangu.
17Nggamu ma-ihili-nya na hàngga nàrungu jiangu-ma naluri hàmu,
nggamu ma-pajurangu papeka njalana ninya la hanggàmaru.
18Na tau ma-kawini-nya na karaü eti, tau kambàliku-ya.
Na tau ma-bobaru-ya na pa-pulungu, tau ndubaya.
19Na-pabonjangu padangu na pa-banjarungu, bonjangu-mananyai pa-tabunggahu na ànda ma-hanggangu la njala;
na tau na-maroputu-ya na làmana tau manggàna-ya.
20Na kareuku tau hàmu, beri àmahu bara weli wingungu-ya;
na kanandingu tau akatu nda na-palingu-a.
21Na kareuku tau hàmu, jiaya na kanyuru nduma tau dangu;
na ndubana na tau nduba pameti-nanya wiki-maana.
22Ruku kanyuru-na i MIRI-ma-a hi nawulu na tau;
ruku mbangatu paràma nda peku bonjangu-ada da pawulu wàngu.
23Na tau nduba na-mbuhangu pawunda njala;
na tau manggàna na-rinjungu pahimbu-ya na kaminaku.
24Na tau kunduhu eti nangala-nya na parinju-na;
na tau akatu nangala-nya nggàraya na padira mangàdatu-na.
25Jàka na-làndahungu na ngilu mbangatu, munangu-ma-ananya na tau akatu;
tàka na tau tànji jiapa mànu-maya na kapingatu-na.
26Àmbu palewa-duya na tau mayau, ba patumbu bia-nanya na ma-karaü,
hama tuna na kadoha ma-pamayilu ngàndu jàka ndia kutu epi ma-pamalara mata.
27Tembi-yawa i MIRI, napa namandai na lurimu;
na tau akatu nameti ba ndedi jiaya na rehina.
28Na monungu-na na tau hàmu na-pawiti-nya na-paohangu-na;
na monungu-na na tau akatu nda ningua ihina.
29Na tau tànji naopa-nya paraïna i MIRI,
na tau akatu pa-patàlaru-ya.
30Na tau kunduhu na-mambiru hàmu na lurina;
na tau akatu nda nangia-anya na tana kangeha-na.
31Na tau kunduhu na-pabanjaru wàngu kareuku manggàna;
na tau akatu pabita-nya na ngaruna.
32Na kareuku tau kunduhu na-pahàmu eti;
na kareuku tau akatu na-pahidu mànuha da eti.
@LAI 1995 Indonesian Bible Society (Lembaga Alkitab Indonesia)