YUHUA 20
20
Da paraingu ngia pamara
1Tunaka nu paràha-nanyaka i Yuhua i MIRI 2ka tuna yia napanii-nanja da tau Ihirailu, “Mbàda panii-nggunyaka i Muha la hupu liinggu ka napanii-nggainya rukuda da paraingu ngia pamara, nu da paraingu ngia papalai ninguna na tau ka na-handera, hi kahiri-ya. Nàhu pindiwa paraingu tungu nu. 3Na tau na ma-pameti tau dàngu nda wuku-nanya, peku palaina la paraingu nuna ka namara welingu la tau ma-patikingu patuu kiringu lai nyuna. 4Pekuna nyuna papalai la hau paraingu la hongada nuda da paraingu, hàla, ka nalua la pangia ma-timbangu la pindu bokulu-na nuna na paraingu, tunaka nu ka na-pakaloka-nja da liku uru lai nu ba hapajia-ha, jàka nggàraya na mambàda tumbu. Ka pahia-danyaka nyuna napa patama-nya nuna na paraingu paraï da nuda da liku uru, dàngu dawua-nya pa-ngiangu ngia pa-ndàdiku ka peku ndàdiku ninguna lai nu. 5Jàka nayaulu patàka-nya lai nu paraïna nu na tau ma-patikingu patuu kiringu, àmbu dawua-duya paraï da mangu paraingu nu la tau na ma-patikingu patuu kiringu. Lupangu daopa-manya bàdi nyuna, nadu ba nda wuku-ana duna pa-pameti tau dàngu nda ruku karau-nanya etimbu na tau nuna. 6Peku ndàdiku-na nyuna la paraingu nuna lundu hàla pa-patanda-nya ngerana la hangga madangu, dàngu lundu nameti na Ratu Bokulu la rehi nu. Hàlaka nu, hina-duka hi peku belina la kotaku wikina nuna na tau na ngia paweli-na ba napalai, wàmunja,” wàna.
7La ngaba patama loduna na Luku Yorundangu na banjaru Ihirailu daheka-nja da paraingu patiki pa-ndàkingu, ka paraingu ngia pamara-ha: na Kendihu la ma-palindingu Nàputali la Nggalilia, na Hikimu la ma-palindingu Epuraïmu; dàngu na Hemburungu la ma-palindingu Yahunda. 8La ngaba tana pahunga loduna na Luku Yorundangu la pada dita na maràda wara la pahunga loduna na Yeriku, daheka-nja ka paraingu ngia pamara-ha, da paraingu patiki pa-ndàkingu: na paraingu Mbehiru la ngaba tana Rumbingu, na paraingu Ramutu la Nggiliatu la ngaba tana Nggàtu, dàngu na paraingu Nggolàngu la Mbahàngu, la ngaba tana Manahi. 9Nudaha mbuu ndàbada da paraingu ngia pamara da pa-hekangu nduma nggubulu-na na banjaru Ihirailu dàngu nduma nimbihu-na na tau hangàdangu ma-ndàdiku la pahiku-da nyuda. Nimbihu-na na tau ma-pameti tau dàngu nda wukuna, pekuna ka kahiri-ya la paraingu nuda welingu la yaulu-nanya tau ma-patikingu patuu kiringu lai nyuna; nda peku-ana la pa-pameti-ya jàka ndedi pa-patanda-nya ngerana la hangga madangu.
@LAI 1995 Indonesian Bible Society (Lembaga Alkitab Indonesia)