YUHUA 18
18
Ba paberi-nya na rihina na tana panjanji-na i MIRI
1Ba na-panyàku-yaka paraïna banjaru Ihirailu na tana panjanji-nanja i MIRI, pauhi-nanyaka la Hilu nggubulu-na na banjaru Ihirailu, hi da-pahada-nya na Uma Tera Ngia Paninya i MIRI. 2Pihu-dapa da kabihu banjaru Ihirailu da mandedi ngalangu tana ndumada. 3Ba tuna, napanii-nya na banjaru Ihirailu i Yuhua, “Lundu pirangu-mapa bàdi bai patiangu, tàka hi imangu palua pa-mandapu-nya na tana pawua-nanggai i MIRI, na Alada da boku la mangilu-mi? 4Pindiwa tau matailu welingu la nimbihu kabihu. Napa ku-palewa-ha nyuda panjada-nya nggubulu-na yiana na tana, ka da-hukutu-ha da padira-da da ngaba tana pambuha-da la pamangu-nja. Hàlaka nu, ka damangu pabeli lai nyungga. 5Napa pabiwa kapihu ngiangu-ya nuna na tana. Napa na Yahunda na-padaingu la ngaba-mana duna la mbara luru, tàka i Yuhupu la ngaba-mana duna la mbara dia. 6Nggambaru-maha da lola padira-da nuda da tana da mapihu ngiada kai mangu pawua-nggaha nyungga. Napa nyungga kuwàngu patunya undi#wàngu patunya undi: Tàngaru-ya la 14:2. ka pi wànya na pa-panduma-nanggai nyimi paraïna i Ala. 7Didiya na kabihu banjaru Lewia napa na manda ngalangu tana ndumada angumi nyimi, nadu na ndumada nyuda jiaya la panjandi ratu duda la palumu-nya i MIRI. Tàka jàka jiaha da kabihu banjaru Nggàtu, Rumbingu dàngu Manahi pahunga lodu, mbàda ngalangu-madaka duda ndumada la pahunga loduna na Yorundangu. Mbàda wua-nanjaka nuna na tana paraïna i Muha, na atana i MIRI,” wàna.
8Ka wua-nanjaka nyuda lii kaloka i Yuhua hama tuna yiana na patiki pa-ndàkingu, “Luawa kai njadanya nggubulu-na yiana na tana dàngu nggàmbaru-ya da padira-na; hàlaka nu kai mangu pamai beli lai nyungga. Napa nyungga kutungu undi yiahu la Hilu keha ka pi wànya jàka nggàraya na pa-panduma-nanggai nyimi paraïna i MIRI,” wàna. Ba dangala-nyaka nuna na lii kaloka welingu lai Yuhua, lua-danyaka panjada-nya nuna na tana. 9Danjada-nya nggubulu-na nuna na tana, hi da-tulihu-ha da padira-da nuda da tana da mapihu ngiada dàngu da-tulihu-mbuha da paraingu da maninja lai nu. Tunaka nu beli-danyaka lai Yuhua la Hilu. 10Ka tungu-nanyaka undi i Yuhua keha ka pi wànya jàka nggàraya na pa-panduma-nanja nyuda i MIRI. Hàlaka nu maràngga wua-nanjaka tana ndumada da nimbihu kabihu, da mandedi ngalangu tana paraïna i Yuhua.
Na ngaba tana pa-panduma-nya na kabihu Mbanyamingu
11Na kawunga pa-beringu jiaya na tana ndumada da biliku kabihu Mbanyamingu. Na ndumada nyuda jiaya na maninya la henaku tana kabihu Yahunda dàngu tana kabihu ana umbuku-na i Yuhupu. 12Na padira mbara diana na tanada nyuda, napiti welingu la Luku Yorundangu, hi namangu pa-kandekalu la ma-pakarahangu la diana na Yeriku, tunaka nu hi na-hanggangu la patama lodu ba nawàngu palii ningu la ngaba ma-palindingu hi lundu la maràda telangu Mbetu-Awingu-ya na marauna. 13Nahili pangalangu nu na lola padira hanggangu la ma-pakarahangu la luruna na Luhu (Mbetilu ba wàdanya), hi namangu pa-kamburungu la Ataròtu-Andaru, la palindi mbara luruna na Mbetu-Horungu Mbara Luru. 14Welingu la patama loduna nuna na palindi, na-wikitungu hu luru nu na lola padira-na na tana hanàhu-na la Kiriyàtu-Mbaàlu (nu na Kiriyàtu-Yiaarimu). Na Kiriyàtu-Mbaàlu mangu kabihu banjaru Yahunda-ya. Nunaya na lola padira-na la patama lodu nuna na tana. 15Da lola padira mbara luru napiti welingu la hupuna na Kiriyàtu-Yiaarimu na pangalangu la mata wai - mata wai Mei-Nipitua, 16tunaka nu na-kamburungu la ma-pahuru melingu la wawa palindi la papana na Lolangu Hinumu, la hupu mbara diana na Lolangu Repayimu. Hàlaka nu hanàhu-na hu luru nu na lola padira ba nawàngu pali ningu la Lolangu Hinumu, la mbara luruda da karaha palindi la tana Yembuhu, hanàhu-na la Eni-Ronggilu, 17hàla, hi na-wikitungu hanàhu-na hu dia la Eni-Hemihu, hi na-pangalangu la Nggalilutu la papana na pa-kandekalu Andumimu. Hàlaka nu hi na kamburungu la Watu Mbohàngu nu na lola padira (i Mbohàngu anana i Rumbingu-ya), 18hi namangu palii ningu la diada da karaha palindi ma-papapangu dàngu na Lolangu Yorundangu, tunaka nu na hili kamburungu nu la lolangu, 19ba nawàngu palii niha da karaha diana na palindi Mbetu-Honggula, hi la hupu diana na Tehiku Metiya na kanjupungu ningu, la mananga-na na Luku Yorundangu. Nunaya da padira mbara luru. 20Na Luku Yorundangu jiaya na padira-na la pahunga lodu. Tuna nu da padira-na na tana pawua-nja da biliku la kabihu Mbanyamingu ka damangu-nya.
21-24Da paraingu da pamangu-da nu da biliku la kabihu Mbanyamingu, hakambulu dàmbuda da paraingu papohu-nja da ndeha la winggiru-da jiaha yiada: na Yeriku, Mbetu-Honggula, Emiku-Kehihu, Mbetu-Aramba, Hemaraïmu, Mbetilu, Haawimu, Para, Òpura, Keparu-Haamunai, Òpuni, dàngu na Nggemba. 25-28Jia-mbuha da hakambulu patu mbua paraingu da patiki pandàkingu yiada papohu-nja da ndeha la winggiru-da: na Nggimbiungu, Rama, Mbaerutu, Mihipa, Kepira, Moha, Rekimu, Yiripeyilu, Tarala, Njela, Elipu, Yembuhu (nu na Yeruhali), Nggimbia dàngu Kiriyàtu-Yiaarimu.
Nudaha da tana pawua-nja da biliku la kabihu Mbanyamingu ka damangu-nya.
@LAI 1995 Indonesian Bible Society (Lembaga Alkitab Indonesia)