YUHUA 13
13
Da ngaba tana da pawàhi pa-malamiringu
1Nàhu kaweda halawàla-mana-nyaka i Yuhua. Napanii i MIRI lai Yuhua, “Kaweda-munyaka, Yuhua! Na nyuna dadangu-mapa da ngaba tana da pawàhi bàdi: 2nggubulu-na na ngabana na Pilitingu dàngu na Nggehuru, 3dàngu nggubulu-na na ngabana na Awi hanggangu hu luru. (Na ngabana welingu la Luku Hikuru la padira Mehiru lundu la padira Ekurungu la mbara dia, nggubulu-da nu ngaba banjaru Kanaàngu-mahapa; tàka da hanganji Pilitingu da-ngiangu la Nggaha, Àndutu, Àhakelungu, Nggàta dàngu Ekurungu). 4Dàngu lupangu pawàhi-mayapa nggubulu-na na ngabana na Kanaàngu dàngu na Miara (na mangu banjaru Hindungu), lundu la Apiku la padira ngaba tana Amori; 5na pangalangu-na na ngaba tana banjaru Nggembàlu dàngu nggubulu-na na ngabana la Limbanongu hanggangu la pahunga lodu, piti welingu la Mbaàlu-Nggàtu la luruna na Palindi Herumungu, pangalangu lundu la ànda ma-hanggangu la Hamàtu. 6Jia ndàba mbuya nggubulu-na na ngaba tanada da tau Hindungu, da ma-ngiangu la ngabana na ma-palindingu la henaku-da da palindi la Limbanongu dàngu na paraingu Mihireputu-Maimu,” wàna. “Mbuu ndàbada nuda da banjaru kuwàngga-ha napa, la rehi bera-daha nyuda paraï banjaru Ihirailu,” wàna. Napanii pangalangu i MIRI lai Yuhua, “Lupangu upabe - berinya bàdi nuna na tana la banjaru Ihirailu ka tana mangu-danya, hama tuna na pambàda panii-nggunggau la hupu liinggu. 7Ba tuna, pabe - beri-nyawa nàhu na tana la hiwa mbua kabihu hawiangu la banjaru Ihirailu papohu-nya na beri mandua-na na kabihu Manahi, ka tana mangu-danya nuna.”
Ba paberi-nya na tana la pahunga loduna na Luku Yorundangu
8Da kabihu banjaru Rumbingu dàngu Nggàtu dàngu na beri mandua-na na kabihu banjaru Manahi mbàda ngalangu-daka tana ndumada welingu lai Muha na atana i MIRI; nu na tana la pahunga loduna na Luku Yorundangu. 9Na tana ngabada nyuda nahanggau-nya na Arowiru (la hingi Lolangu Luku Àrunongu), dàngu na paraingu la padua-na nuna na lolangu, jia ndàba-mbuya nggubulu-na na ngabana la ma-ndidaru dita welingu la Mandemba hanggangu la Ndimbungu 10na pangalangu-na na-paràpangu lundu la padira tana ngaba Amungu, papohu-nja mbuu ndàbada da paraingu da pa-kawaha wungana i Hihungu na hanganji Amori, na ma-mandapu la Hehimbungu. 11Na ngabana la Nggiliatu, na ngaba la winggiru-na na Nggehuru dàngu Maaka, dàngu nggubulu-na na Palindi Herumungu, dàngu nggubulu-na na ngabana la Mbahàngu lundu la Hàlaka. 12Na ngaba tanada nyuda na-hanggau-mbunya na ngaba tana pa-kawaha-na i Hanganji Onggu, na tau Repayimu#Repayimu: Tàngaru-ya la 12:4. panjàpu wàda ma-katangu pareta la Àhitaròtu dàngu la Endirei. Mbàda pakàku-nahaka i Muha da banjaru nuda dàngu nawàngga-ha paluhu welingu la ngaba tanada. 13Na nyuna da ma-ngiangu la Nggehuru dàngu Maaka nda dawàngga paluhu-aha paraï tau Ihirailu; ndàdiku-mada-nyapa la Ihirailu.
14Na kabihu Lewi nda da-ngalangu-a tana ndumada welingu lai Muha. Mbàda panii-naka i MIRI lai Muha, na nduma kabihu Lewi ba jiaha da ma-welingu la kameti maraku patunu la ngia pa-maraku ndumana i MIRI Ala Ihirailu.
Na ngaba tana pa-panduma-nya na kabihu Rumbingu
15Hawiangu welingu la tana panjanji-na i MIRI la banjaru Ihirailu mbàda wua-nanjaka da kalibaru la kabihu Rumbingu paraïna i Muha, ka tana manguda nyudaha. 16Na ngaba tanada nyuda na-hanggau-nya la Arowiru (la hupu Lolangu Àrunongu) dàngu na paraingu la padua-na nuna na lolangu lundu la nggubulu-na na ma-ndidaru dita la winggiru-na na Mandemba; 17na Hehimbungu-mbu dàngu mbuu ndàbada da paraingu la ma-ndidaru dita nuna: nu na Ndimbungu, Mbamutu-Mbaàlu, Mbetu-Mbaàlu-Miungu, 18Yahàhu, Kendimutu, Mapàatu 19Kiriyataïmu, Hipuma, Heritu-Hahahàru nu la pinu tunduna la lolangu. 20Mbetu-Piuru, da karaha-na na Palindi Pinggàhu, dàngu na Mbetu-Yehimutu. 21Na pangalangu-na jia ndàba-mbuha mbuu ndàbada da paraingu la ma-ndidaru dita, dàngu nggubulu-na na ngaba kawaha-na i Hihungu, na hanganji banjaru Amori, na ma-mandapu la Hehimbungu, yia la mangilu-na. Mbàda pakàku-nahaka paraïna i Muha, nyuna dàngu da ma-pareta la Mindiangu-mbu, nu: i Ewi, i Rekimu, i Njuru, i Huru dàngu i Remba. Mbuu ndàbada nuda da ma-pareta mbàda pareta-danyaka nuna na tana la wawana i Hanganji Hihungu. 22La hongada da tau pa-pameti-da da tau Ihirailu, nimbunya i Mbiliamu anana i Mbeuru, na mini manyura. 23Na Luku Yorundangu jiaya na padira patama loduna na ngaba tana kabihu Rumbingu. Nudaha da paraingu dàngu da ndeha da pawua-nja da kalibaru la kabihu Rumbingu, ka tana manguda nyudaha.
Na ngaba tana pa-panduma-nya na kabihu Nggàtu
24Hawiangu welingu la tana panjanji-na i MIRI la banjaru Ihirailu, mbàda wua-nanjaka da kalibaru la kabihu Nggàtu paraïna i Muha, ka damangu-nya. 25Na ngaba tanada nyuda na-hanggau-nya na Yaehiru dàngu mbuu ndàbada da paraingu la Nggiliatu dàngu na beri mandua-na na ngaba tanana na banjaru Amungu lundu la Arowiru-ya na marauna la pahunga loduna na Ramba; 26na ngabana la Hehimbungu lundu la Ramàtu-Mipàhu dàngu Mbetonimu, dàngu na ngabana la Mahanaïmu lundu la padira Londimbàru, mbuu ndàbada nuda jia ndàba-maha la ngaba tana nduma kabihu Nggàtu. 27La Lolangu Yorundangu, na ngaba tana kabihu Nggàtu na-hanggau-nya na Mbetu-Haràmu, Mbetu-Nimura, Hukutu dàngu na Hapungu nu na ngaba tana tuda marihi pa-kawaha-na i Hanganji Hihungu la Hehimbungu. Na padira patama loduna na ngaba tana Nggàtu jiaya na Luku Yorundangu lundu la tana Nggalilia-ya marauna hu dia. 28Nudaha da paraingu dàngu da ndeha da pawua-nja da kalibaru la kabihu Nggàtu ka tana manguda nyudaha.
Na ngaba tana la pahunga loduna na Luku Yorundangu pa-panduma-nya na kabihu Manahi
29Hawiangu welingu la tana panjanji-na i MIRI la banjaru Ihirailu mbàda wua-nanjaka da kalibaru la beri mandua-na na kabihu Manahi paraïna i Muha, ka damangu-nya. 30Da padira tana ngabada nyuda na toma la Mahanaïmu, papohu-nya nggubulu-na na Mbahàngu – nu na nggubulu ngaba kawaha-na i Onggu na hanganji Mbahàngu, dàngumbu da nomu kambulu kotaku-na i Yairu la Mbahàngu. 31Na pangalangu-na papohu-nya na beri mandua-na na ngabana la Nggiliatu, pa-karia-nya na Àhitaròtu dàngu na Endirei, nu da madàmbu-da da parai puhu pareta ngaba kawaha-na i Hanganji Onggu la Mbahàngu. Mbuu ndàbana na ngabana lai nu pawua-njaha da beri mandua-da da kalibaru ana umbuku-na i Makiru, na anana i Manahi.
32Tuna nu na pawàna i Muha ba na-paberi-nya na tana la pahunga loduna na Yeriku, la hapapa Luku Yorundangu, nu ba ninya la ma-ndidaru Muapu. 33Na nyuna na kabihu Lewi nda ana hakudu-ma tana pangala-da welingu lai Muha. Mbàda panii-nanjaka nyuda i Muha, na nduma pawua-nja nyuda jiaha da ma-welingu la maraku da pawotu lai MIRI na Ala Ihirailu.
@LAI 1995 Indonesian Bible Society (Lembaga Alkitab Indonesia)