YUHUA 12
12
Da hanganji pa-pakàku-na i Muha
1Na ngabana la Yorundangu la pahunga lodu, piti welingu la Lolangu Luku Àrunongu kandekalu la Lolangu Yorundangu lundu tuna marauna la Palindi Herumungu la mbara dia, mbàda wàhi-danyaka dàngu mbàda mandapu-danyaka tau Ihirailu. Tau madua-ha da hanganji pa-pakàku-da. 2Na haàtu Hihungu-ya na tamuna, hanganji Amori ma-mandapu la Hehimbungu-ya. Na ngaba kawaha-na nu na hanganji nahanggau-nya na beri mandua-na na Nggiliatu: nu piti welingu la Arowiru (la hingi Lolangu Àrunongu), dàngu na paraingu la padua-na nuna na lolangu lundu la Luku Yambuku-ya na marauna la padira ngaba tana Amungu; 3dàngu nahanggau-mbunya na ngaba Lolangu Yorundangu la pahunga loduna, piti welingu la Tàma Nggalilia hanggangu hu luru lundu la Mbetu-Yehimutu (la pahunga loduna na Tehiku Meti), pangalangu la ma-pahuru melingu la wawa Palindi Pinggàhu.
4Na hanganji haàtui na pa-pakàku-da da tau Ihirailu jiaya i Hanganji Onggu la tana Mbahàngu, na ma-mandapu la Àhitaròtu dàngu la Endirei. Jiaya nyuna na haàtu na kamuti banjaru Repayimu.#Repayimu: Na banjaru Repayimu jiaya na ma-bokulu jangga hama milimungga. 5Na ngaba kawaha-na nahanggau-nya na Palindi Herumungu, Hàlaka, nggubulu-na na Mbahàngu lundu la ngabana la Nggehuru dàngu Maaka-ya na marauna; dàngu nahanggau-mbunya na beri mandua-na na Nggiliatu, na marauna lundu la ngaba kawaha-na i Hanganji Hihungu-ya la paraingu Hehimbungu.
6Nudaha da hanganji tau madua da pa-pakàku-da i Muha dàngu banjaru Ihirailu. Tàka na tanada nuda da hanganji nawua-ya la kabihu Rumbingu, Nggàtu dàngu na beri mandua-na na kabihu Manahi paraïna i Muha, na atana i MIRI, ka tana mangu-danya.
Da hanganji pa-pakàku-na i Yuhua
7Da hanganji pa-pakàku-da i Yuhua dàngu banjaru Ihirailu jiaha mbuu ndàbada da hanganji la patama loduna na Luku Yorundangu, piti welingu la Mbaàlu-Nggàtu la Lolangu Limbanongu pangalangu lundu la Palindi Kamuluku mbara luru lihina la Endumu. Na ngabana lai nu napabe - berinya i Yuhua la kabihu - kabihu banjaru Ihirailu ka tana mangu-danya. 8Na ngabana yiana nahanggau-nya na ngaba ma-palindingu, na ngaba ma-pa-karahangu la patama lodu, na Lolangu Yorundangu dàngu da karaha tandula-na, da ma-pa-karahangu la pahunga lodu, dàngu na ngaba maràda telangu la mbara luru. Da ngabada lai nu jiaha da pangia wungangu-da da banjaru Heti, Amori, Kanaàngu, Perihu, Hewi dàngu Yembuhu. 9-24Da hanganji pa-pakàku mbuu ndàbada tailu kambulu haàtu-da; jiaha da hanganji-da da paraingu patiki pa-ndàkingu: Yeriku, Aï (lihina la Mbetilu), Yeruhali, Hemburungu, Yàramutu, Lakihu, Enggulungu, Nggehiru, Ndembiru, Nggendiru, Hòruma, Aràtu, Lipuna, Andulàmu, Makenda, Mbetilu, Tapua, Hepiru, Apiku, Laharungu, Mandungu, Hahuru, Himurungu-Merungu, Àkahàpu, Taanàku, Manggindu, Kendihu, Yòkuniamu (la Kàramilu), Ndòru (la hingi tehiku), Nggoyimu (la Nggalilia) dàngu Tiràhu.
@LAI 1995 Indonesian Bible Society (Lembaga Alkitab Indonesia)