MA-PABOBARUNGU 9
9
1Nuda mbuu ndàbada ku-kanandi pahàmu-nja. I Ala na-paloku-ya na luri tau hàmu dàngu na ma-manggàna, jiapa ka na-pakilitungu jàka ndia na-pambuhangu. Nda ningua mapinya jàka nggàra manjadi la rehi malamiri. 2Deningu-na na-pahama na urana mbutana na tau: Na tau pa-deningu hamangui na tau iraku, na tau hàmu hamangui na tau akatu, na tau yarahu hamangui na tau ma-iraku, na tau mawotu kameti maraku hamangui na mandia. Na tau hàmu nda narihi paura-a welingu la tau njala, na tau na ma-harangu hama biana dàngu na tau na manda bihu pa-harangu. 3Ba tuna, na-pahama na urada nyuda mbuu ndàbada. Nuna nu jia-duyaka na pa-hawinangu hama tunambu mbuu ndàbana na manjadi la pinu tana yiana. La ngala lurina nambinu-nya akatu na eti tau, dàngu kanjupu nduba-mbuya na kanandingu-na. Hi jia tàka harabànda bia-nanya hupu njàpu lurina.
4Tàka ba talànga ni-inyapa na luri,
la rehi nu ningupa pa-monungu.
Ka nda narihi pa-ohangu-a na ahu na maluri
welingu la hinga na mameti?
5Na tau luri nda jia nda pi-ananya ba nedi-nanya-padua paraï hupu njàpu lurina,
tàka na tau mameti nda nggàra-a papina.
Ndumana nyuna nda ningua wundana jàka ndia limbana,
dàngu pa-marombangu-yaka na tamuna.
6Na mbuhangu-na, na karaü etina hamangui na pambuha toluna,
mbutada nuda dameti karia-nya nyuna.
Nda nggàra-apa ngera papiti-na
la mbuu ndàba manjadi la pinu tana yiana.
7Màla, nganguwa nyumu dàngu mbaha etiwa,
unungu mbaha etiwa wai anggurumu.
Màtangu nda jia wàna-a i Ala,
tàka na-patunju-kiyapa.
8Màta ka na-hawewa dàngu ka na-pandewa na matamu.
9Pàda-nyawa na luri dàmunya na papaha pambuha-mu
la ngala lurimu na ma-kahewa-na,
na pawua-nanggau i Ala la pinu tana.
Pàda mànu-nyawa nimbihu lodu jiapa ka nda na-palingu-kai.
Nadu nawunda jàramu ba didi-aya nuna.
10Ràma-hawa mbuu ndàba da wai ngabamu wàngu mbutana na àtalu-mu.
Nadu ngeru ba nda ningu-apa kanandingu jàka ndia paràma.
Nda ningua papingu wàngu jàka ndia manggàna la pangia tau meti.
Dàngu lai nukau napa uhanggangu ningu.
11Hili ningupa paita-nggu la pinu tana yiana:
nda tau ma-àtalu papalai-a matalu mànu la parimbu,
nda tau maparii-a matalu mànu la pa-hànjalangu.
Na tau manggàna nda naingu-ana nahunggu-na paràma-na.
Dàngu na tau màhi nda naingu ngalangu-na pawulu wàngu.
Dàngu mbutana da mahupu mapingu nda naingu-ana na-hamboka-da.
Nadu nggamu biaya peku-nggàna-nanya kàba ura.
12Na tau nda napi-anya pirangu na tàka na rehina.
Hama tuna ma-hawurungu makàna la hiru dàngu hama tuna iyangu makàna la jala,
tuna numbu na tau ba nanggàna-ya tàparu
la rehi panda mbutingu.
Na kanandingu rukuna na manggàna dàngu na nduba
13Ninya yiana na hau ngerangu na ma-patotukungu jàka nggiki hamana na tau ba na-pawili-nya na manggana: 14Ninya hauna na parai kudu ma-hakudu-ana na tau lai nu. La hau na lodu mai-nanyaka na haàtu hanganji bokulu pa-hànjalu-ya na paraingu nuna. Na-nggupulu-ya dàngu na-ehingu pa-nyungguru-ya na kangeli-na. 15La paraingu nuna ninya na haàtu tau mila na ma-manggàna. Na-ngalangu nyuna pa-pamara-ya nuna na paraingu. Tàka rukuna ba namila, narengga maromba-nya tau na hàmuna dàngu nda haàtu-mbupa ma-pangàda-nya nyuna. 16Ba tuna na-padeningu na paniinggu, ba narihi na manggàna welingu la kapàru. Jiapa-kai ba tuna, na manggàna tau mila nda pa-pawili-anya. Da kareuku-na nda paeti-wa-ndoku-anja.
17Narihi hàmupa ba pa-tingingu kareuku mandangu tau pingu
welingu la warana na haàtu maningu kawahangu la honga tau ànga.
18Narihi lingupa na manggàna welingu la madàka,
tàka na ha-kambàtiku wai wora na-paruha wai huhu hau wurungu.
@LAI 1995 Indonesian Bible Society (Lembaga Alkitab Indonesia)