MA-PABOBARUNGU 8
8
1Kanjupu hàmu-aya na tau manggàna.
Napinya hemana mbuu ndàbana.
Na manggàna na-pahamemu mbaha etiya,
hi na-tawelahu mànu na matana.
Karadaku-nya na hanganji
2Patutu-manya jàka na-wuangu pareta-na na hanganji,
dàngu àmbu àtalu pa-ràndingu biamu lai Ala.
3Na hanganji àtalu wàngu biana etina,
jàka nda na nggàna la etina, rihi hàmu maraunya.
4Na-paluangu limana na hanganji ba pa-mahumbarungu-ya;
nda ningua matoru mbeni papanda-ya!
5Na tau na-makaradaku-nya na-mambiru dàngu na lànyapu;
na tau paeti napinya na rehina dàngu nggiki hamana ba karadaku la hanganji.
6Nduma mbuu ndàbana ningu rehina dàngu pata mehana,
tàka hakudu-ana na pa-jàngapu-nda!
7Nda haàtu-a mapinya jàka nggàraya na urana na manedi-nya,
dàngu nda ningua mapanii hahanya jàka nggàraya na manjadi ngeru.
8Nda haàtu-mbu ma-ngalangu papàtu-ya jàka ndia ma-ngalangu pa-pakanduli-nya na rehi metina.
Nuna nu pa-udulungu panda peku hinggilungu-ya,
nda peku mara-ana welingu lai nu,
jiapa-kai ka nawàngu wulu aka dàngu màhina.
Na tau na ma-mànangu dàngu na ma-akatu
9Yiana mbuu ndàbana kuita-ya ba ku-hamata-ya mbuu ndàbana na manjadi la pinu tana. Talànga handàka-na na tau nawàngu kawaha-na ka pa-hanggàmaru-ya na anguna. 10Mbàda ita-nggunya ba nameti dàngu ba taninya na tau akatu. Tàka ba nabeli na tau welingu la retina, dawotu-nya nyuna la paraingu ngia pawunda-na ma-akatu. Ba tuna, nuna nu kahewa-mbuna.
11Ka nggikina hi dira mudaya nawunda-na ma-akatu na tau?
Rukuna ba nda palu wuanya hukungu.
12Jiapa ka hangahu ma-akatu pawunda-na na haàtu tau njala,
pa-daingu luri biana dàngu namalai-mbu na lurina.
Nakàli panii wàngu na tau, na ma-mangàdatu-nya i Ala,
jiangu-ma namuda ndàba na lurina.
13Tàka pàku na tau akatu nadangu na handuka pahunggu-na.
Na lurina narengga làpahu hama tuna ninuya.
Napa nameti kanguraku
ba nda na-mangàdatu-nya i MIRI, kàli wàda.
14Ba tuna nuda mbuu ndàbada panii ma-kakòlulu-ya.
Tàngaru biaya, nggàraya na manjadi la pinu tana:
Ningu tau manundu pa-hukungu hama tuna tau katadaku,
ningu tau akatu pa-palimbangu hama tuna tau manundu.
Ba tuna, nunambu kahewa-ma-ana.
15Na pa-pambulunggu la kanandingu-nggu tuna yia, na tau lupangu-ma bàdi na-hawola.
Nadu la lurina la pinu tana
nda ningua hili hau mbaha eti ndumana, didi-ma-ayaka na ngangu, na ngunungu dàngu na hanggela na hawola.
Nuna-ma-ayaka na papàda-na la wunda njilina,
la lurina na pawua-nanya paraïna i Ala.
16Ba ku-pamukarungu pangala-nya na manggàna, dàngu hamata-nggunya mbuu ndàbana na manjadi la pinu tana yiana, ka jàngapu-dunggu-nyaka, jiapa-kai ka taràma lodu rudungu dàngu nda ana hangahu-nda, 17nda tatoma-a la papinya na pawunda-na i Ala. Jiapa ka nggiki hama pamukarungu-nda, nda jia manyàmu-andanya. Na tau paeti, kupinya wàna, tàka làti duna nda napi-anya.
@LAI 1995 Indonesian Bible Society (Lembaga Alkitab Indonesia)