MA-PABOBARUNGU 6
6
1Hili ninyai na paita-nggu na manda tubangu na matika pa-parodukungu la pinu tana yiana. 2Talànga handàka i Ala nawua-nya na haàtu tau pawulu wàngu, tembi dàngu banda malanja, hi lupangu nda hili nggàra-apa parinju-na. Tàka nda na-pahia-anya paraïna i Ala la papàda-nja nuda mbuu ndàba da pawua-nanya. Tàka pàku na tau panda tandana, jia niyai na mapàda-nja nuda da pawulu wàngu. Ba tuna nuda mbuu ndàbada kahewa-ma-ana dàngu pa-hawina wànguya. 3Jiapa ka hangahu-da da anana na haàtu tau dàngu ka namalai na lurina hi dira kaweda-ya, tàka jàka nda napàda-nya na pa-ohangu dàngu ka nda patani pahàmu-nya, pa-namutu-nya na kanandingu-nggu nyungga, narihi hàmupa na ngerana na haàtu ana rara na madedi meti welingu la tau nuna. 4Nadu na ana rara nuna nda napanii-wa-anya na-dedina na nda dedina; laku-nanya la ma-kapàtangu, hàlaka paluu marombangu-maya. 5Ndedi na itangu mata lodu, dàngu ndedi na-jàngapu-ya nggàraya na luri, hi lupa peku tanggunggulu dàngu mambiru-na. 6Nuna narihi hàmupa welingu la tau na maluri dua ngahu ndaungu, tàka ndedi handàka-ma na-pàdangu pa-ohangu. Ka nda hau ana na ngia pa-hanggangu-da nyuda pa-kadua-da?
7Ba naràma na tau mbulungu ka nganguma-a, tàka nda naera la pahoda-ya. 8Ba tuna, nggàra-yaka na utuna na tau pingu ba pamenja-nya dàngu na tau nduba? Hili nggàra nggunana jàka nahàmu hurina na tau mila la honga luri panggolu? 9Nuda mbuu ndàbada kahewa-ma-ana hama tuna ba pa-mukarungu pa-kehangu ngilu. Narihi hàmu jàka ta-panudangu wàngu ngga - nggàra mangunda welingu ba tarinju mànunya na marihi dangu.
10Mbuu ndàba na maninya, mbàda ni ndai-manyaka. Tapinya ba nda peku-ana na tau papanda-ya na tau na marihi-nya pa-àtalu. 11Hama huka mandaina papanda-ya hama huka nda linguna na kareuku-na, tàka nda ana nggàra-a utuna. 12Nggiki hama peku pinanya paraï tau jàka nggàraya na marihi pahàmu lai nyuna la lurina na ma-dànggitu dàngu na manda lingu, na mali hàmbu beri ninuya? Nggiki hama jàngapu-nanya paraïna haàtu tau jàka nggàraya na manjadi la pinu tana yiana la taliu metina?
@LAI 1995 Indonesian Bible Society (Lembaga Alkitab Indonesia)