MA-PABOBARUNGU 5
5
1Kanandingu pàku ba ndedi kareuku, dàngu àmbu rengga pa-njanjingu lai Ala. Nyuna la awangu-ya tàka nyumu la pinu tana-kau, ba tuna pa-nanjarungu la kareuku-mu. 2Hama huka hawina, hama huka pekuna la pa-manggadipangu manda hàmu. Hama huka kareuku padangu, hama huka pekuna pa-kareuku nduba. 3Ba tuna, jàkau pa-njanjingu lai Ala, pahàra parengga-manya. Nda nambuha-anya na tau na ma-pahada ma-ndubangu. Ba tuna, pahàra-nya na njanjimu. 4Nahàmu ningupa àmbu pa-njanjingu welingu ba ndau pahàra-nya na njanjimu. 5Àmbu na-panjala-dukau kareuku wikimu, hiu panii leranya na ratu na malumu-nya i MIRI, ba hanjàliru-munya bau pa-ràndingu. Ka nggikina hiu tuya na pambeni wàna i Ala hi na-pamija-ha da ihi paràma-mu? 6Hama tuna ba dadangu da manggadipangu da manda ningu ihingu, tuna numbu ba nadangu na kareuku manda ningu linguna. Tàka na nyuna mangàdatu-nyawa i MIRI.
Na luri kahewa-ma-ana
7Àmbu hangàtaru-du jàkau itangu tau maningu kawahangu ma-kapidihu tau mila, nawàhi-ha da ngerada dàngu nda na-panduma-nja mamola. Nimbihu-na na panggawi na-kahiri-ya paraï mangia ditanya dàngu pa-kadua-da na-kahiri-ha paraï marihi jangga panggatu-na.
8Na lurina na hanganji na-monungu ihi wokambu.
9Na tau na mabu - bulana la ndui, nda napeka-a dirana la ndui; na tau na mabu - bulana la malanja nda napeka-a dirana la utu. Mbuu ndàbada kahewa-ma-ana. 10Hama huka dangu pawulu-na na haàtu tau hama huka danguna na tau pawua-na pangangu. Nda ningua utu ndumana na mamangu-nja, na papina jiaya na wulu-ma-ana. 11Na haàtu tau maràma talànga wànguna nda natoma na pangaana, tàka jiangu mangandu-na na katuda-na. Tàka hauya, na mawulu dira danguha da pawulu-na, hi nda peku katuda-na paraï pa-nggidiku eti.
12Ningu pa-hawina wàngu paita-nggu la pinu tana: Na haàtu tau na-pauhingu malanja ndumana la rehi njaka. 13Tàka paraï pa-hanggàmaru da-mbulangu nu da malanja, hi nda ningu-apa pa-kangeha-nanja da anana. 14Tadedi dàngu kalulu-nda; tuna numbu ba ta-taluru-nya na pinu tana, ba nda nggàra-a pangàndi-nda welingu la ihi paraï-nda. 15Nuna kanjupu pa-hawina wànguya! Tabeli hama tuna ba ta-pamaingu. Dira matiki ba ya - yàhunda payàpa ngilu, ka nggàra-yaka na linguna? 16La ngala lurinda takada - dàmaku la kapàtangu, ninda la handuka, la nggidiku, la mbeni dàngu la hidu eti.
17Nu pidunggu-nyaka na marihi hàmu ndumanda nyuta, jiaya na ngangu, na ngunungu dàngu la papàda-nja da ihi paraï-nda la ngala lurinda na ma-dànggitu pawua-nanda nyuta paraïna i Ala; nuna-yaka na uranda. 18Jàka na-ngalangu pawulu wàngu dàngu malanja welingu lai Ala na haàtu tau, dàngu hi pahia-nya la papàda-nja nu da pawulu-na, lupangu duka bàdi na-pamalangungu dàngu ka napàda-nya mbuu ndàba da ihi paraï-na. Nuda nu pawua-na i Ala-mbuha. 19I Ala na-pabundu-nya hawola na etina na tau nuna, tàka hi nda na-nggidiku la pa-pangàda-nya na dànggitu lurina.
@LAI 1995 Indonesian Bible Society (Lembaga Alkitab Indonesia)