2 HAMUILU 9
9
I Ndautu dàngu i Mepimbohitu
1La hau na lodu i Ndautu na-paàrangu, “Ningupa ihu tau maluri la kuru umana i Haulu ai? Jàka ningu, ku-mbuhangu patunya mahàmu lumuna i Yunatàngu,” wàna.
2La kuru umana i Haulu ninya na haàtu na tau la kaheli, na tamuna Himbaya, hi da-paràha-nya palua lai Ndautu. Hi na-paàrangu na hanganji, “Jia-kauka nyumu i Himba?” wànanya.
“Deningu-na, Tamu umbu,” hi wàna.
3Tunaka nu na hanganji hi na-paàra-nya, “Ningupa nu tau maluri la kuru umana i Haulu? Nyungga ku-mbuhangu patunya pahàmu wàngu hama tuna na pambàda ràndinggu lai Ala,” wàna.
Nahema i Himba, “Ninyapa na anana i Yunatàngu, haàtu-na. Nyuna na-kanjiku,” wàna.
4“Nggiya nyuna?” hi wàna na hanganji.
“La Londimbàru, la umana i Makiru anana i Amialu,” hi wàna i Himba. 5Ka paràhangu-nanyaka na hanganji papaau-nya na anana i Yunatàngu.
6Nuna na anana i Yunatàngu Mepimbohitu-ya na tamuna. Ba natàka-ka, hi na-patika patembi-ya i Ndautu. I Ndautu napanii dànya, “Mepimbohitu,” wànanya, nahema, “Ou Tamu umbu,” wàna.
7Napanii i Ndautu, “Àmbu mangàdatu. Nyumu napa ku-milanggau eti lumuna i Yunatàngu, amamu. Mbuu ndàbada da tanana na bokumu i Haulu, kuwua beli-nggauha napa, dàngu kau padai pangalangu pangangu la uma hanganji,” wànanya.
8I Mepimbohitu nahilu patika hi napanii, “Nggàra-aka duku manda palingu! Nggikina hi tu-inaka na hàmumu lai nyungga?” wàna.
9Tàka na hanganji hi na-paaunya i Himba na tau la kaheli-na i Haulu, hi napanii-nya, “Mbuu ndàbada da pa-bànjalu-na i Haulu dàngu kuru umana, wua-ngguhaka la umbuku-na na Tamu umbumu yiana. 10Nyumu dàngu na anamu hamanai da ma-pambapa dànggau màta kai ràmaya nuna na tana ndumana na kuru umana na Tamu umbumu i Haulu dàngu na ihina nuna na tana kau wuanja ka na-patoma wàngu na lurida. Na nyuna i Mepimbohitu màta-nyaka ka nangangu mànu la uma hanganji,” wànanya. (I Himba ningu tau hakambulu malima-ha da anana mini dàngu hi tau dua kambulu-ha da tau la kaheli.)
11Nahema i Himba la hanganji,#Na hau pa-haleli ndai: hanganji; Imbarani: nyungga. “Mbuu ndàbana na pareta-mu Tamu umbu napa ku-paloku hàla-maya duku,” wàna.
Jia-duya i Mepimbohitu hi nangangu la uma hanganji, hama tuna da ana wikina na Hanganji Ndautu. 12I Mepimbohitu ninya na anana, Mikaya na tamuna. Mbuu ndàbada da angu kuru umana i Himba tau la kaheli-na i Mepimbohitu-ha. 13Tuna nuduka i Mepimbohitu na maruha ndàba wihina ba dua mbunguda ba na-engangu la Yeruhali dàngu ba nangangu mànu la uma hanganji.
@LAI 1995 Indonesian Bible Society (Lembaga Alkitab Indonesia)