2 HAMUILU 13
13
I Àmunungu dàngu i Tamàru
1I Àpuhalomu anana i Ndautu, ninya na anawini-na na ma-manandangu, Tamàru-ya na tamuna. I Àmunungu, na anana i Ndautu la papaha haàtu-na, mataru nda uku-nanya i Tamàru 2dàngu na-patikingu pa-katuda angunya. Tàka nuna manda hidaya nadu i Tamàru ba ndedi ràka ma-mangoma-ya ndedi uku nyuna la pa-panggolu dàngu tau mini. I Àmunungu na-kanandi-nya padua nuna hi lupa nahidu wànya.
3I Àmunungu ningu ariyaa-na na mambana màhina, Yunandàpu-ya na tamuna, anana i Himia ayana i Ndautu. 4I Yunandàpu na-paàra-nya i Àmunungu, “Umbu kudu, nggikina nyumu hiu biti mànu tumu nu nimbihu lodu? Nggàra ehimu?” wànanya.
Nahema i Àmunungu, “Nyungga ku-mataru-nya i Tamàru erina i Àpuhalomu, na angunggu paluhu,” wàna.
5Nanapa-ya i Yunandàpu lai nyuna, “Nuna nu namuda-a! Mahuru-wa la ngia pa-katuda-mu ba hama tuna mahidu-kau. Jàka namai na amamu pa-tadalu-kau, kau paniinya, ‘Ama, puli àrunya i Tamàru ka namai ka nawua-ngga pangangu. Jàka kuita-ya nyuna ba na-manahu pangangu lai yiahu, pekuna nyungga pangangu,’ ka wàmunya,” wànanya. 6Tunaka nu i Àmunungu mahuru-nanyaka la ngia pa-katuda-na, ba hama tuna mahidu-ya.
Ba namaika i Hanganji Ndautu pa-tadalu-ya, napanii dànya na amana i Àmunungu, “Ama, puli àrunya i Tamàru ka namai dàngu ka naràma-ngga pangangu lai yiahu la tuba ngia paita-nggunya, ka pekuna ba kungangu,” wàna.
7Tunaka nu i Ndautu pangàndi-nanyaka langu i Tamàru la uma hanganji, “Lua la umana na ayamu i Àmunungu, kau paloku-nya pangangu nyuna,” wànanya. 8Ka lua-nanyaka i Tamàru lai nu, natàka-nya i Àmunungu ba mahuru-na padua la ngia pa-katuda-na. I Tamàru napiti hawutu kanguta, hàla hi na-paloku-ya na kanguta la hanggana i Àmunungu ka handara-nya. 9Hàla ba na-paluhu-yaka nuna na kanguta welingu la làja hi na-pajàma-nya pangangu. Tàka i Àmunungu nda nabihu pangangu. Napanii, “Paràha-nja ka daluhu ndàba welingu lai yiahu!” wàna. 10Ba naluhu hàlaka na tau welingu la kurungu nuna panii dàna-nyaka i Tamàru, “Ngàndiha da kanguta lai yiahu, la ngia pa-katuda-nggu dàngu kau pahoba-ngga!” wàna. Na-patundungu i Tamàru. 11Tàka i Tamàru ba na-pajola-nyaka kanguta, hi puta-maana-nya paraïna i Àmunungu, “Eri, mai kau katuda angungga!” wànanya.
12“Aiha, màtangu aya!” hi wàna na bidi kawini. “Àmbu pambana-duka la pawunda-ya na ma-iraku tungu nu! Na matungu nu ndedi ninguma mawunda-ya la Ihirailu. 13Jàka tunaka nu, la nggini-kaka nyungga ba ku-kawini ninya na matanggu? Hamanai nyumu wikimbu jia-mayai dumu ba na-paaka-nggau tau la Ihirailu. Nahàmu ningupa kau panii dànya na hanganji, napa na-patunju-ma duna ka kunjadi papaha-mu nyumu,” wànanya. 14Tàka nyuna i Àmunungu nda nabihu patundu-nya nuna, ka ba narihi kapàru-pa duna, puta-madua-nanya na erina, hi lupa na-rumbaku-ya.
15Tàka ba hàlaka patuna nu nyuna i Àmunungu hi karaü nda uku-nanya eti i Tamàru, nu na karaü-nanya eti naliru lànga-nyapa làti na mbuha-nanya la kawunga-na. Napanii dànya na erina, “Luhu!” wànanya.
16Nahema i Tamàru, “Yi ha, kanii hi tumu nu aya? Jàka uyauluka nyungga, na akatu-mu nu na-bokulu-pa#Talànga wanguna na-njenjangu ningu-mapa: uyauluka ... na-bokulu-pa. welingu la akatu patumu kawai!” wànanya.
Ba tuna i Àmunungu nda na-talinga-anya. 17Paau-ma-ananya na papalewa wikina, hi na-paràha-nya, “Karia-nya nana na tau kawini la hambeli, dàngu kuhiya na pindu!” wànanya. 18Ka tundu-nanyaka na pareta nuna na papalewa-na.
I Tamàru nahau kalembi pahàlangu malai lima.#kalembi pahàlangu malai lima; jàka ndia: kalembi pahàlangu ma-kanjupu manandangu. La rehi nuna#Talànga wanguna na-njenjangu ningu-mapa: La rehi nuna; Imbarani: ngaü. da ana maràmba kawini da mandedi mangoma dapaki tuda nu. 19Nyuna i Tamàru natunya aü na katiku-na, hi na-bàriku-ya na kalembi pahàlangu-na, hi nalaku dàngu panggàbi kadua mbapa-nanya lima na matana pa-kariangu hiina. 20Ba naita-yaka paraïna i Àpuhalomu, paàra-nanyaka, “Nggikina, rumbaku-nanggau i Àmunungu? Kandiiwa eri, àmbu hili kanandi-dunyapa. Nyuna aya-munya, jia àmbu panii-duya nuna lai ngga - nggamu,” wànanya. Ka pa-hinggilu-nanyaka wikina i Tamàru la umana na ayana i Àpuhalomu, kanjupu hawina-ya dàngu ringu langu-nanya.
21I Hanganji Ndautu ba narongu-ya na rukuna nuna, lalu hàngga mbana etiya. 22I Àpuhalomu paumbi-nanyaka i Àmunungu dàngu nda nahili bihu-apa papanii dànya kiringu ba na-rumbaku-ya i Tamàru, na erina.
I Àpuhalomu ba natungu kiringu
23Palàngangu-ka dàmbu ndaungu mbabu-nanyaka i Àpuhalomu ba na-nggutingu wulu mbimbi la Mbaàlu-Hanjuru, la lihi paraingu Epuraïmu, nadunda hàla-manja da ana maràmba. 24Na-hurungu lai Hanganji Ndautu hi napanii-nya, “Ama, nyungga patumbu-nggunya mbabu nggutingu wulu mbimbi. Màla àru kau luambu la mbabu nuna hamanai ba hapajia-ha da ama bokulu la uma hanganji,” wàna.
25Tàka nahema na hanganji, “Ndia-a ha ananggu, nadu jàka malua hàla-maka pa-handuka-manggau nyumu-duka,” wànanya. I Àpuhalomu parukangu-mananya pa-dàhiku-ya, tàka na amana daingu-mana ba nda nabihu pa-kikungu. Jia-aya ba nawàngu pa-kanyuru-nya.
26Ka panii-nanyaka i Àpuhalomu, “Jàka tuna nu puli àrunya na angungu paluhu, i Àmunungu ka nalua karia-nggama,” wàna.
Napaya na hanganji, “Ndia-a nggàra palua-na nyuna,” wàna. 27Tàka ba pa-dàhiku pangalangu-mananya i Àpuhalomu, ka lupa puli-duna-nyaka i Àmunungu nyuna i Ndautu hamanai mbuu ndàbada da anana mini la palaku karia-nya i Àpuhalomu.
[Hàla i Àpuhalomu pa-yemangu-nanyaka pangangu mbabu ailulu.]#[Hàla i Àpuhalomu ... ailulu.]; na kareuku yiana nda nianya la Huratu Matua hilu Imbarani, tàka papiti welingu la pa-haleli la hilu Yunani-ya. 28Nawua-nja pareta da atana, “Itàngaru pa-hàmungu, jàka na-maüku-ka i Àmunungu paraï pa-unungu angguru, napa ka ku-kamujuru-nggaika kai pameti-ya. Àmbi mangàdatu-du. Nyungga duku matanggu hemaya na rukuna nuna. Pa-torungu-ma bai hada ngàndingu, àmbi kanodaru-du!” wàna. 29Nyuda da tau ata danunju-maya na pareta-na i Àpuhalomu, hi da-pameti-ya i Àmunungu. Ba daita-yaka nuna paraï da anana i Ndautu hawiangu kali - liti-madua-danjaka da mbanggalu-da hi dapalai.
30Ba talànga nàhu-injapa la ànda ba dabeli, ninguka tau mapanii-nya i Ndautu, “I Àpuhalomu na-pameti hàla-haka da ana hanganji – nda hili ningu haàtu maluri!” wàdanya. 31Na-hadangu na hanganji hi na-bàriku-ha da pakina, paraï pa-hawina, hi na-tanggilungu la tana. Mbuu ndàbada da panggawi-na jia-mayai duda ba da-bàriku-ha da pakida. 32Tàka i Yunandàpu anana i Himia ayana i Ndautu, hi napanii, “Tamu umbu, àmbu hawina dàngu àmbu patanda-dunya ba mbàda meti hàla-daka da ana maràmba. Jiaya i Àmunungu-a duna na mameti, ba lohangu-mananya, ba jiaya nyuna-maka na pawuku-na i Àpuhalomu, kandai rumbaku-nanya i Tamàru, na erina. 33Jia ba tuna àmbu waiduya na mapanii, ba dameti hàla-maka da ana maràmba, jiaya i Àmunungu-a duna na mameti,” wàna.
34Ba talànga tunaka nu nyuna i Àpuhalomu mbàda palai-naka.
Da tau madaiya na uma hanganji-na i Ndautu, da-itangu tau dangu ma-kamburungu welingu la palindi weli nàmuda la Horunaïmu.#Talànga wanguna na-njenjangu ningu-mapa: weli nàmuda la Horunaïmu; Imbarani: welingu la kajiana. Ka lua-nanyaka papanii-nya na hanganji hi na-wàlahu-ya nuna na paita-na.#Na hau pa-haleli ndai: Ka lua-nanyaka ... nuna na paita-na. 35Hàla i Yunandàpu hi napanii-nya i Ndautu, “Jia-madu-haka nàmu da ana maràmba! Deningu hama tuna ba wànggu kawai,” hi wàna. 36Hina-maapa nahàla papanii, tama-madua-danyaka da anana i Ndautu la kurungu. Pakiringu-danyaka pahii, tàka i Ndautu dàngu da ata-naka dahii hawina hàla.
37-38Nyuna i Àpuhalomu lelingu-nanyaka la uma hanganji-na na hanganji la tana Nggehuru, lai Tàlumai anana i Amihuru. Nyuna engana lai nu tailu mbua ndaungu. Mandai langatàka i Ndautu ba na-hawina-nya i Àmunungu, 39tàka i Ndautu ba na-làpahu-ka na pa-hawina wànanya i Àmunungu, lalu mbana rinju-nanya i Àpuhalomu.
@LAI 1995 Indonesian Bible Society (Lembaga Alkitab Indonesia)