2 HAMUILU 12
12
Na lii pangàndi-na i Natàngu dàngu na halaera-na i Ndautu
1Hàlaka nu i MIRI hi na-palewa-ya i Wunangu Natàngu la palua tomaya i Ndautu. I Natàngu nalua lai nyuna hi napanii-nya, “Ninja da tau madua da ma-ngiangu la hau paraingu, na haàtu nawulu tàka na haàtu namila. 2Na mawulu dangu banda hapina dàngu mbimbina, 3tàka na mamila ana heu-maana na ana mbimbina, pakei-nanya. Nuna na ana mbimbi narada-nya, hi lupa na bokulu la umana ba na-parànja matua karia-nja da anana. Na ana mbimbi nuna nangangu welingu la pangana nuna na tau, màlai ba na-unungu la kaba waina nyuna, dàngu na-katuda-ma la babana, na kababa-na hama tumana na anana kawini. 4La hau na lodu nuna na tau wulu na-tàkanya ariyaa-na. Na mawulu nda narupu-a mbimbi jàka ndia hapi wikina ka na-manahu-nya na ariyaa-na. Tàka napiti ni-maaya na ana mbimbina na tau mila, hi na-paloku-nya pangaa wàna na ariyaa-na,” wàna.
5-6Narongu-yaka nuna i Ndautu nambeni wànya nuna na mawulu, hi napanii, “Kanjupu mbana eti-duya nuna na tau wulu! Parongu-na i MIRI na maluri na tau nuna lupangu na-pambatu wundangu bàdi patunya hiluna nuna na ana mbimbi hàla ka huku pameti-ya!” wàna.
7Nanapa-ya i Natàngu, “Nyumu-maka na Tamu umbu na tau nuna! Dàngu yiana-yaka na paniina i MIRI, Ala Ihirailu, ‘Nyumu kutukau hanganji la Ihirailu dàngu ku-pamara-kau welingu lai Haulu. 8Na pa-hanganji-na dàngu da papaha-na i Haulu ku-pakata-nggaunja lai nyumu, langatàka nyumu kutukau hanganji la Ihirailu dàngu Yahunda. Làti jàka hada nda datoma, jiangu-mapa duku ba kuhilu wuanggau hama danguda. 9Nggikina nyumu hiu lànjanja da pareta-nggu? Nggikina hiu wundaya nuna na ma-akatu? I Uria bau paràhangu pa-pameti-ya la pa-kangaburungu; bau kabainya hi lupa na-pameti-ya tau Amungu, hàla hi mumàngi-nya na papaha-na! 10Karia-na ba ndau manundu lai Nyungga dàngu bau pitiya na papaha-na i Uria, napa la nimbihu wàla wuamu handalaru-handàdiku ni - ningu-maka napa mameti paraï pa-pameti-ya. 11Harangu-manggu-nyaka napa ba kupali-nggau ura pàda na ma-pawelingu la kuru uma wikimu. Napa kupiti-ha da papaha-mu la hangga matamu, hi kuwua-ha la tau hawiangu na ma-katuda angunja la hambila maharii. 12Nyumu dumu bau wunda kangunguhu manjàla, na belingu-na napa Nyungga duku ba ku-wàlahu pa-handaraku-ya na pa-himbalu-nggunya la hangga nggubulu Ihirailu,’ ” wàna.
13Nanapa-ya i Ndautu lai Natàngu, “Njala-manggu-nyaka nyungga lai MIRI,” wàna.
Nahema i Natàngu, “Mbàda jàma-mana-nggauka i MIRI, Tamu umbu; jia ba tuna nda jia meti-amu. 14Na nyuna ba ngaha-muka pa-paaka-nya i MIRI, bau tuya na matuna nu, na anamu na mabidi dedi napa nameti,” wàna. 15Hàlaka beli-nanyaka duna i Natàngu la umana.
Na metina na anana mini i Ndautu
Na anana mini i Ndautu na-pahabola-na i Mbàtihemba, na pameti wàruna i Uria, hidu-nanya, na hiduna ma-pawelingu lai MIRI-ya. 16Ka hamayangu-nanyaka i Ndautu lai MIRI ka pekuna ka na-mandangu na ananggu wàna. Nyuna na-puaha dàngu nimbihu rudungu na-katuda lundu hariina la lata pangia-na. 17Ba hapajia-ha da ama bokulu la uma hanganji dalua tomaya la pa-pamanda-nya ka na-hadangu ba wàda, tàka natipa-maaha dàngu nda nabihu-a paangu ngangunja nyuda. 18Pa-làngangu hau minggu meti-nanyaka nuna na anakeda, tàka da atana nda datoru mbeni la papanii-nya. Hi tuda nu, “Jiapa ba naluri-pa na anakeda, nda nabihu-mbu na hanganji pahema jàka tapanii dànya. Ka manaü-ama-naika duna nàhu ba nameti-ka na anana! Nda tapi - pinya napa hi nahuda biaka wikina!” wàda.
19Ba naita-haka i Ndautu da atana ba dawàngu pa-kanguruku, pàda-nanyaka ba nameti-ka na anana. Ka paàra-nanjaka, “Tubana ba nameti-ka na anakeda?” wàna.
“Tubana, Tamu umbu,” hi wàdanya.
20Ka hadangu-nanyaka i Ndautu welingu la lata pangia-na, hàla hi nalua paihu, hi nahaiya na lunggina, hi na-panjilungu pakina. Tunaka nu laku-nanyaka pa-lumungu la Umana i Miri. Hàlaka nu ka beli-nanyaka la uma hanganji, hi nakarai pa-payema-nya pangangu; ka ngangu-nanyaka. 21Ba daita-yaka nuna paraï ba hapajia-ha da atana hi dapanii dànya, “Nyuma nda ma-hàmburu ndoku-akau Tamu umbu. Ba naluri-pa na anakeda, nyumu Tamu umbu hanimu bau puaha dàngu bau hawina-nya, tàka ba nameti pàku-ika na anakeda, hadangu-munyai nyumu Tamu umbu la pangangu!” wàdanya.
22“Wua,” hi wàna i Ndautu. “Tubana ba ku-puaha dàngu ba ku-hawina ba naluri-pa na anakeda, na pa-kanandi-nggu, Raï-ai duna napa hi namila-angga eti i MIRI hi najàma-nya na anakeda paluri wànggu duku. 23Tàka nàhu ba meti-nanyaka, nggàra lingu-naipa ba ku-puaha pangalangu? Jia màkanggu-kaka pa-paluri beliya? Napa ngeru ba laku-madu-nggunyai duku la ngia paninya, tàka nyuna nda peku-anapa la pabeli lai nyungga,” hi wànanja.
Na dedina i Halomu
24Tunaka nu i Ndautu hi na-panggaüru-ya na etina i Mbàtihemba, na papaha-na, hi na-katuda angunya. Ka habola-nanyaka na anakeda mini i Mbàtihemba, Halomu wàna i Ndautu ba natunya tamuna. I MIRI nambuha-nya nuna na anakeda 25hi na-palewa-ya i Natàngu patunya tamuna, Yendiya#Yendiya; na tamu yiana la hilu Imbarani, “nambuha-nya paraïna i MIRI.” wànanya, nadu ba pambuha-na i MIRI-ya.
I Ndautu ba nawàhi-ya na Ramba
(1 L Nd. 20:1-3)
26La rehi nuna jiapa-mayapa i Yuàpu ba na-kangaburu-ya la Ramba, na parai puhu pareta tana Amungu, dàngu mareni wàhi-ama-nanyaka. 27Ka palewa-nanyaka tau lai Ndautu, la pa-paihi-nya, “Mbàda kangaburu-nggunyaka la Ramba, dàngu kuwàhi-yaka na ngia pa-pahàmu-na wai. 28Nàhu màla àru Tamu umbu kau pauhi-nja da tanatara-nda da marihi, hàla ka nyumu wiki ma-pairungu la pa-kangaburu ka panyàku-ya nuna na paraingu. Hi tuna nu, napa nda ningu-apa tau mapanii ànga, ba nyungga mawàhi-ya nuna na paraingu,” wàna. 29Ka pauhi hàla-nanyaka mbuu ndàbana na tanatara-na i Ndautu, hi nalaku la Ramba, ka kangaburu-nanyaka hi natalu-ya. 30I Ndautu napiti-ya na tubuku àmahu rara la katiku-na na hanganji-da,#hanganji-da; jàka ndia: na marapu tau Amungu na ma-tamungu Milikumu. hàla hi na-patàmbaku-nya la katiku wikina nyuna. Na tubuku nuna na mbotuna ràkangu 35 kiluna, na patungu watu mata tawuru ma-manandangu. I Ndautu nangàndi padangu malanja pa-rambangu lai nu la paraingu. 31Hinggilu-nai nu na tau mangia-nya na paraingu na-karia-nja, hi na-paràha-nja pangàndi nggarangganji, kataka tana bàhi, kataka punggu, hi na-paràha-nja paràma#Talànga wanguna na-njenjangu ningu-mapa: na-paràha-nja paràma; Imbarani: nali karia-nja. la ngia pa-pandoi watu rara. Na matuna nu, jia-mayai na pawàna la mangia-nja da paraingu Amungu hawiangu. Hàlaka nu i Ndautu dàngu nggubulu ndàbana na tanatara-na beli-danyaka la Yeruhali.
@LAI 1995 Indonesian Bible Society (Lembaga Alkitab Indonesia)