2 LII NDAI 3
3
1I Hanganji Ndautu mbàda padai-mana-nyaka ka wuluya na Umana i MIRI la Yeruhali la Palindi Moria la ngia pawari puruhu uhu nggàndumu manguna i Arauna tau Yembuhu. Na hadangu-na na Umana i MIRI na-pakiri-nya paraïna i Hanganji Halomu 2la wulangu padua wàna la ndaungu papatu wàna ba na-pareta. 3Na nunjuna na Uma dua kambulu pihu metiru-na, tàka na ndàbaru-na hiwa metiru-na. 4Na nunjuna na kuru hanamba hamana na ndàbaru-na na Uma, nu ba hiwa metiru-na. Na janggana lima kambulu patu metiru-na. La kuruna nuna na kurungu patapu wàngu àmahu rara ihi mbangi-nanya. 5Na kuru bokulu patungu kapambalu ai kajuu Limbanongu-ya hi mangu patapu wànya àmahu rara ihi mbàngina pa-huratungu pingi wola dàngu pa-huratungu nggàmbaru nggili bàhi. 6Na hanganji na-pamananda-nya nuna na Uma, ba nawànya watu mata tawuru mana - nandangu dàngu àmahu rara da pangàndi welingu la tana Pàrawaïmu. 7Jia-mahai da àmahu rara nuda na patapu wànanja da dindina na Umana i MIRI, da patenga-na, da pàlaku pinduna dàngu da pindu - pinduna. Da dindina na-huratu-nja nggàmbaru patau awangu.#patau awangu: Tàngaru-ya la kalokatu hilu. 8Na kurungu mbara dalu na pa-patamungu “Rowa Mahupu Matua” na nunjuna hiwa metiru-na tàka na ndàbaru-na, hiwa metiru-na, hama-mana na ndàbaru-na na Umana i MIRI. Dua kambulu tòngu àmahu rara patapu wànja da dindina na Rowa Mahupu Matua Meha 9dàngu 570 nggaràmu àmahu rara pa-pandoi paku. Da dindida da kuru - kurungu mangia dita patapu-mbuha wàngu àmahu rara.
10-13Na hanganji na-paràhangu pa-pandoi dàmbu kahala hada patau awangu welingu la palala, hàla hi tapu wànja àmahu rara, patuu pa-lihingu-ha la Rowa Mahupu Matua hanggangu la tuba pindu. Nimbihu-da da patau awangu maràngga dua mbàlama ruu kàpada, nimbihu ruu kàpa 2,2 metiru malaida. Ba da-tawàlahu da ruu kàpada da pa-jonggaru da hupuda la padua rowa, tàkaka da hupu - hupu hauda da-maràngga jonggaru dindingu la kalai la kawana. Ba tuna ba da-tawàlahu da ruu kàpada hiwa metiru-mada hamana na ndàbaru-na na rowa. 14Ndumana na Rowa Mahupu Matua pa-pandoi-manya tera dimbana welingu la tera linangu dàngu hili hau tera ma-kawuru, ma-mbaü atu dàngu marara. Na tera dimba nuna pa-huratungu-ya nggàmbaru patau awangu ba pa-mananda-nya.
Da andu parunggu bokulu dua mbungu
(1 Hang. 7:15-22)
15Na hanganji na-pahadangu andungu dua mbungu da janggada hapungu - hapungu 15,5 metiru-da hi natuha la hanamba Umana i MIRI. Nimbihu-da nuda da andungu ningu tubuku-da da ma-2,2 metiru janggada. 16La kapuka-da nuda da andungu da-pamananda wànya lulu parunggu pa-jilungu dàngu hangahu mbua wua njalima parunggu. 17Da andungu nuda pa-pahadangu la kalai la kawana pindu tama la Umana i MIRI; la mbara luru Yakingu,#Yakingu: Na tamu yiana hama linguna na kareuku hilu Imbarani, “Nyuna (i Miri Ala) na ma-paundungu,” wàna. wàdanya, tàka la mbara dia Mbowàhu,#Mbowàhu: Na tamu yiana hama linguna na kareuku hilu Imbarani, “ruku àtalu welingu lai Nyuna (i Miri Ala),” wàna. wàdanya.
@LAI 1995 Indonesian Bible Society (Lembaga Alkitab Indonesia)