2 LII NDAI 2
2
Da pa-payema hahangu la pawulu wànya na Umana i MIRI
(1 Hang. 5:1-18)
1I Hanganji Halomu nabota-yaka la pa-pahada-nya na Umana i MIRI, dàngu hau uma hanganji nduma wikina nyuna. 2Ndumana nuna na-dundilu-ya na tau 70.000 ma-palaü-nja da pawulu wànya na uma, tau 80.000 ma-kahebi watu la ma-palindingu dàngu tau 3.600-da da manduru da ma-hamata-ya na paràma.
3I Halomu na-pangàndi-nya langu i Hiràmu, hanganji Tiruhu, “Màlawa nu ka ta-panjonjangu la danggangu hama tuna dàngu i Ndautu, na amanggu bau danggangu lai nyuna ai kajuu Limbanongu pawulu wànanya na uma hanganji-na. 4Nàhu wulu-nggunya hau uma ngia pa-lumungu na pa-patudangu ndumana la patembi wànya i MIRI na Alanggu. La Uma nuna nyungga dàngu na rayatu-nggu napa malumu-nya Nyuna ba mawàngu patunu dupa dàngu ngara mambii kati, dàngu la pawotu mànunya roti pa-payema-nya Nyuna. La uma nunamai napa mawotu kameti maraku patunu nimbihu mbaru dàngu rudungu, nimbihu lodu Hangahu, lodu remi Wulangu Bidi dàngu da lodu - lodu hawiangu da pa-pahinggilu la patembi wànya i MIRI na Alama. Nadu, ba mbàda wuangu-naka Nyuna pareta ka dawunda-ya nuna paraï tau Ihirailu lundu nu - nu. 5Na parinju-nggu ka màtawa na Umana i MIRI na pawulu-nggu napa ka uma ma-mangarangu-ya, nadu na Alama nyuma ba marihi mangarangu-maya welingu la pa-alangu la nggi bia. 6Tàka làti duna nda ningua haàtu ma-duluku pawulu-nya Uma i Ala, nadu na nggubulu-na na manggawa awangu manda najaru nggailaru-na nda na-jàmungu-a na nggailaru-na ka ngia pa-ngiangu-na Nyunaya. Nu ba tuna na Umana i MIRI pamàka pawulu-nggu tuda-anaka ka ngia patunu-nya dupa i Ala! 7Jiaya nu, màla àru kau paràha-nggama haàtu tau mapingu pa-huratu dàngu namàpi paràma àmahu rara, àmahu bara, parunggu, bàhi dàngu napingu-mbu pa-tinungu tera kawuru, mbaü atu, dàngu rara. Napa nyuna ka naràma pahama dànja da ma-màpihu la pa-karàmaku da pambàda pindina na amanggu i Ndautu da maninja la Yahunda dàngu la Yeruhali. 8Kupi-manja ba jia ndàbaha da mini punggu ai la tanamu nyumu umbu ba dapingu-ma papunggu ai, jia-duya màta kau pangàndi-nggama, màtu - màtu ai kajuu dàngu ai nitu Limbanongu. Napa nyungga ka ku-dundilu-ha da tau lai nyungga la pa-pambapa dànja da tau lai nyumu, 9ka da-payemangu pada - danguma ai. Nadu na Umana i MIRI na pawulu ba wànggu lupangu-ma ka ma-hawiru-ya la pa-bokulu bàdi. 10Ka datuu bàlangu da taumu nyumu, napa ka ku-pangàndi-nggau dua ngia ngara uhu nggàndumu, nimbihu-da maràngga 2.000 tòngu, angguru 400.000 litaru, tàka mina haitungu 400.000 litaru.”
11Ba na-papaya nuna na huratu-na i Hanganji Halomu, i Hanganji Hiràmu na-pangàndi-nya huratu i Hanganji Halomu tuna yia na lingu-na, “Paraï ruku mbuha-nanya i MIRI na banjaru-na, Nyuna na-wotukau nyumu pa-hanganji. 12Pa-wotungu-ya i MIRI Ala Ihirailu, na ma-padika-nya na awangu dàngu na tana! Nyuna mawua-nya haàtu ana i Ndautu na ma-kanjupu manggàna-na dàngu na mambana halimu kotuna, dàngu madangu papina, na mawuku-ya la pawulu-nya na Umana i MIRI dàngu na uma hanganji nduma wikina nyuna. 13Pa-karia-nya yiana na huratu ku-paràha-nya na haàtu mini mahupu pingu dàngu na mamàpi pa-karàmaku na ma-tamungu Huràmu. 14Na inana welina la kabihu Ndàngu, tàka na amana tau Tiruhu-ya. Nyuna napingu pa-pandoi malanja - malanja àmahu marara, mabara, parunggu, bàhi, watu dàngu ai. Nyuna napingu pa-tinungu tera kawuru, mbaü atu, dàngu rara, dàngu tera linangu-mbu. Màtu - màtu paràma pa-huratu, napingu pa-pandoi tundunya na hada pakarai bianda. Màta nyuna ka paràha-nya paràma dànja ba jia ndàbaha da mamàhi pa-karàmaku lai nyumu, dàngu anguda da tau da mambàda ràma paràma lai Hanganji Ndautu na amamu. 15Nyuma duma patia-manjaka nu da pa-pangàndi-mu da dua ngia ngara uhu nggàndumu, da angguru dàngu da mina haitungu da pambàda ràndimu. 16Napa nyuma ka mapunggu-ka ai kajuu welingu la ma-palindingu la Limbanongu, pajàngapu-nja danguda da ràka pawàngu ba wàmu, hàla napa ka mahondu-ha tuha rakitu, ka ma-pamili-ha la tehiku lundu tàka la Yopi. Welingu lai nu napa nyumu kau palaü-njaka la Yeruhali,” wànanya.
Na pakiringu pa-pahada-nya na Umana i MIRI
(1 Hang. 6:1-38)
17I Hanganji Halomu na-patumbu-ya na diha nggubulu (sensus) la nduma tau tàka da ma-engangu la Ihirailu, hama tuna na pawàna i Hanganji Ndautu na amana. Nu ka pi-nanyaka ba tau 153.600-ya na tau nàmu na maninya. 18Da tau 70.000 welingu lai nyuda na-patanggu-nja la pa-palaü-nja da pawulu wàngu uma, tau 80.000 matanggu kahebi watu la ma-palindingu, dàngu tau 3.600 ma-hamata-ya dàngu ba la papida nyudaya nuna na paràma.
@LAI 1995 Indonesian Bible Society (Lembaga Alkitab Indonesia)