1 HAMUILU 3
3
Ba na-pawuwangu wikina i MIRI lai Hamuilu
1Nu la rehina nu, i Hamuilu anakeda bia-yapa ba nalumu-nya i MIRI, ba na-tanara-ya paraïna i Eli. La rehina nu ana talànga-ma-ana hi ningu lii langu dàngu harii mata welingu lai MIRI. 2La hau na rudungu, i Eli na mambàda kaweda nàkapu dàngu na matika papoki, talànga katuda-na la kurungu-na, 3tàka i Hamuilu katuda-nanya la lihi Pàti Pa-ràndingu-na i MIRI, daa la Maü tera Matua. Ba ndedipa na-pabarahu dàngu da palita roka bia-danyapa, 4i MIRI na-paaunya i Hamuilu, hi nahema i Hamuilu, “O ama!” hi wàna. 5Tunaka nu palai-nanyaka ba nalua tomaya i Eli hi napanii, “Nggàraya ama? Nggikina hiu paaungga?” wànanya. Tàka nahema i Eli, “Nda kupaau-anggau hi ananggu, katuda beliwa,” wànanya. Ka lua-nanyaka i Hamuilu pa-katuda beli.
6-7Tunaka nu i MIRI nahili paaunya i Hamuilu, tàka nyuna nda napi-anya ba i MIRI na mapaau-nya, ba ndedi na-handàkangu-du i MIRI papanii dànya nyuna. Jia-duyaka hi na-hadangu, hi nalua tomaya i Eli hi na-paàra-nya, “Nggàraya ama? Nggikina hiu paaungu?” wànanya. Nahema i Eli, “Nda kupaau-anggau hi ananggu; katuda beliwa,” hi wànanya.
8Na pa-pandilungu wàna i MIRI napaau-nya i Hamuilu, ka hadangu-nanyaka hi nalua tomaya i Eli hi napanii, “Nggàraya ama? Nggikina hiu paaungu?” wànanya. Nu hina-duka i Eli hi napàda-nya ba i MIRI na mapaau-nya nuna na anakeda. 9Jia-duyaka hi napanii-nya i Hamuilu, “Katuda beliwa, jàka nahili paaunggau, màta kau panii, ‘Paniiwa MIRI, patingingu-manggunya duku atamu,’ ka wàmu,” wànanya. Ka lua-nanyaka i Hamuilu la ngia pa-katuda-na.
10Tunaka nu ka mai-nanyaka i MIRI, hi na-ndolaku lai nu, hàla hi nahili paaungu, “Hamuilu, Hamuilu!” wànanya. Hi nahema i Hamuilu, “Paniiwa dou MIRI, patingingu-manggunya duku atamu!” wànanya.
11Ka panii-nanyaka i MIRI lai nyuna, “Napa Nyungga kutuya na hangia manda najaru la tau Ihirailu, hi lupa nimbihu-na na tau na marongu-ya napa nambingu wànya. 12La lodu nuna pa-langatàka-nggunyaka Nyungga napa na pambàda pangàdu-nggunya na kuru umana i Eli weli la pakiri-na lundu na njàpuna. 13Mbàda panii-manggu-nyaka nyuna,#Na hau pa-haleli ndai: Mbàda panii-manggu-nyaka nyuna; na hilu Imbarani-na jàka haleli-ya: napa kupanii-nya nyuna, wàna. napa na kuru umana ba pa-hukungu-ya lundu nu - nu, nadu rukuna da anana ba da-pakalana-ka Nyungga. Napi-manja i Eli da njalada da anana, tàka nyuna nda nahàngga-anja. 14Jia-duyaka nu hi kuhara-nya na kuru umana i Eli, da njalada nyuda lalu bokulu-da, nda napeku-a la pa-podahu wànja kameti maraku jàka ndia pawotu hangia - hangia-kai lupa lundu nu - nu,” wànanya.
15Hàlaka nu katuda beli-nanyaka i Hamuilu, tàka la mbaru hadangu-nanyaka, hi na-bunggahu-ha da pindu Umana i Miri. Na-mangàdatu papanii-ya nuna na harii mata lai Eli, 16tàka i Eli hi napaau-nya, “Hamuilu, ananggu,” wànanya. Nahema i Hamuilu, “Ou ama,” hi wàna.
17Ka paàrangu-nanyaka i Eli, “Màla nggàra-yaka na papeka-nanggau i MIRI? Wàlahu hàla biaya lai nyungga. Jàka ningu paana pahini-mu, jiangu-ma napa ba nahuku-nggau i Ala,” wànanya. 18Ka peka hàla-nanyaka i Hamuilu lai Eli. Nda hili ningu hau pa-pahini-na. Tunaka nu ka panii-nanyaka i Eli, “Ka ba MIRI-maya duna, Nyuna biaka duna ka nawànya jàka nggàraya na mahàmu ba wàna,” wànaka.
19Ka matua - tua-nanyaka i Hamuilu. I MIRI hangera-nanya-padua dàngu mbuu ndàbada da papanii-na i Hamuilu na pahàra langatàka-manja. 20-21Jia-duyaka na pakiri-na mbuu ndàbana na banjaru Ihirailu welingu la tana nuna nggubulu-na da-pajia-ya ba wunanguna i MIRI-ya i Hamuilu. Nimbihu biana jàka napanii i Hamuilu, na-patingingu-ma mbuu ndàbana na banjaru Ihirailu.
Naingu-manapa i MIRI na-paitangu-na wikina la Hilu, la ngia pa-kawunga pa-itangu-na wikina lai Hamuilu, dàngu ba napanii dànya.
@LAI 1995 Indonesian Bible Society (Lembaga Alkitab Indonesia)