1 HAMUILU 2
2
Na hamayangu-na i Hana
1Ka hamayangu-nanyaka i Hana,
“I MIRI na-pahawola-ya na etinggu;
na pawunda-na na-panggaüru-ya na hamangu-nggu.
Hamemu-nggunyaka ba kuyiki-ya na papanggu,
nadu ba ndula langatàka-mana-nggaka i MIRI.
2Nda ningua ma-matua hamana i MIRI!
Didi-aya Nyuna na ma-pakahiri.
3Pànja-nyawa na panii abungu kakòlulu-mu!
Jiaka-nyawa na kareku ngànjangu-mu!
Nadu i MIRI ba Ala Mahupu-pinguya;
na mahuku ndàbanya na pawunda tau.
4Mbata-nanyaka na tandai pana ma-kaborangu,
ba tuna parukangu-nanyaka pa-kapàru na ma-mangonangu.
5Na tau na mambihu la kawunga-na làti
ba da-bundungu da pangangu,
nàhu tau tanggu ràma-ayaka
ka kuana ngalangu pangangu ba wàna.
Na tau na ma-rimbangu àmangu làti,
nàhu nahoda-yaka ba nda nanjaka-nya pangangu.
Na kawini papaha na mambuta làti hamemu-nanyaka,
tau mapihu-haka da ana pa-paana-na.
Tàka na ina na madangu anana pa-dunjakungu-ya,
hi màtanya pa-kariku.
6I MIRI na ma-pameti,
Nyunamai na ma-paluri.
La parai tau mameti na-papuru-nya na tau,
tàka Nyunamai na mawotu beliya welingu lai nu.
7Ningu tau pa-pawiti-na ka namila,
tàka ningumai pa-pawiti-na ka nawulu.
Ningu tau pa-pawawa-na,
tàka ningumai pa-pajangga-na.
8Welingu la handuka na-wulaku-ya na tau nda ningu bandangu,
welingu la mayila na-pahàla-ya na tau na maànga.
Nyuda napa angu maràmba dangu-haka,
dàngu hi panduma-nja pa-katangu mambotu.
Na latana na tana manguna i MIRI-ya,
la pinuna hi na-pahada-nya na pinu tana.
9Na tau manundu na-mànjaku mànu
daa la lumbu pa-maüngu-na i MIRI.
Tàka na ma-akatu napa namija mau
la kapàta wuru yila.
Na màka wiki nda patika-a pamonu-nya,
na kapàru tau nda patalu wàngu-aya.
10Da muhuna i MIRI napa daluju làjaru,
da-mangàdatu; ba na-kanduruku welingu la awangu Nyuna.
I MIRI napa na-patanda-nya ngera
na pinu tana nggubulu-na,
tàka hi nawua-nya kuaha bunjuku
na hanganji na papindi-na,” wàna.
11Ka beli-nanyaka i Elikana dàngu kuru umana la Rama, tàka i Hamuilu, na anada, ndàdiku-nanyaka la Hilu la palumu-nya i MIRI, ba na-tanara-ya paraïna i Ratu Eli.
Da anana i Eli
12Da anana i Eli lalu kabularu-ha. Nyuda nda da-wàrihu-aya i MIRI 13ba ratuha àtalu eti biada hangganya na banjaru Ihirailu. Jàka era ningu tau mawotu kameti maraku, nàmu-madua-nyaka na karaha ratu na mangàndi ranggatu wàla katailungu. Ba talànga manahu kàmangu-ha da tolungu, 14ta - tanju wàngu-danyaka ranggatu la wurungu ngia pa-manahu-ha da tolungu, hàla nggàra biaya na tolungu pa-padita-da tanggu ratu-haka. Mbuu ndàbana na tau Ihirailu na mamai la Hilu pawotu kameti maraku jia ndàba-maya na pawàda. 15Talànga handàka-na namai na karaha ratu ba ndedi pa-pahinggilu-ya na aparu-na la patunu-ya hi napanii-nya na tau na mawotu maraku, “Wua-ndaha da tolu mata nduma ratu ka handara-nja; nda dambuhangua tolu pa-manahu,” wàda.
16Jàka nahema na tau nuna, “Nahàmu-pa ka tatundu-nya na kalaratu, ka tunu pàkuya na aparu-na, hàlaka kau pitika pambuha-mu,” jàka wàna, napaya na karaha ratu, “Ndia-a, nàhu memangu-ma kau wuangu, jàka ndia napa kupiti rambangu,” wàna.
17Nuna-duyaka na njala bokulu-da da anana i Eli la mbara matana i MIRI, nadu ba da-pahalela-ya na kameti maraku ndumana i MIRI.
I Hamuilu la Hilu
18Ba talànga tunaka nu, i Hamuilu ba anakeda bia-yapa naingu-mana duna ba nalumu-nya i MIRI. Nyuna napaki kalembi pa-patuda-nya welingu la tera linangu, hama tuna na kalembi lumungu-da da ratu. 19Nimbihu ndaungu na inana nautu-nya kalembi pa-hàlangu kudu, hàla hi nangàndi-nya i Hamuilu, jàka namai kariangu na leina pawotu kameti maraku ndaungu. 20I Eli na-pakanyuru-nja i Elikana dàngu papaha-na, hi napanii-nya i Elikana, “Màla àru i MIRI ka nahili wua-kinggai ana dàngu yiana na papaha-mu, ka ningu hiluna na anami na pambàda huharu-mi lai MIRI,” wànanja.
Hàlaka nu beli-danyaka la Rama.
21I MIRI na-pakanyuru-ya i Hana, hi na-paanangu tau madua haàtu mini dàngu tau madua kawini. I Hamuilu-mbu parukangu-nanyaka pa-matua, ba dàngu lumu-nanya i Ala.
I Eli dàngu da anana
22I Eli kaweda nàkapu-mana-nyaka. Nuangu biana na ronguna na mapanii-ha na hurida da anana hanggangu la tau Ihirailu. I Eli napi-mbunja da anana ba da-katuda dànja da kawini da ma-paloku la pindu Maü tera Ngia Paninya i MIRI. 23Jia-duyaka hi napanii-nja da anana, “Kurongu-maka nyungga panii pa-patàka-na na banjaru nggubulu-na rukuna na hurimi na ma-akatu. Nggikina nyimi hi timi nu? wànanja. 24Àmbi hili timi nu, dou da ananggu. Ma-iraku langatàka-ya na papanii-na na banjaru na rukumi nyimi! 25Jàka tauya na manjala la anguna patau, pekuna i Ala ba na-kahiri-ya; tàka na tau jàka nanjala lai MIRI, hilu nggamu-ipa na matula-nya?” wànanja.
Tàka nyuda nda da-wàrihu-aya na panaungu-na i Eli, na amada, nadu ba mbàda botangu-manaka i MIRI la pa-pameti-ha nyuda.
26Tàka hauya duna i Hamuilu, na anakeda nuna parukangu-nanyaka pa-matua dàngu parukangu-nanyaka pambuha-nya paraïna i MIRI hamanai taumbu.
Na nyuraya na rukuna na kuru umana i Eli
27La hau na lodu tàka-nanyaka na haàtu na wunangu lai Eli hi na-patàka-nya na lii langu welingu lai MIRI, “Ba jiaya na ata-nanya hanganji Mehiru na boku la mangilu-mu i Harungu dàngu kuru umana, ku-pawuwangu-maka wikinggu Nyungga lai nyuna i Harungu. 28Welingu la kabihu - kabihu Ihirailu kupindi-yaka na kuru umana nyuna la paratu, la pa-lumungu la ngia pawotu maraku, patunu dupa dàngu papaki kalembi eputu#eputu; tàngaru-ya la kalokatu hilu. jàka napanii dàngga Nyungga. Lai nyuda dàngu wàla wuada kuwua-njaka ngabada la papiti hawiangu welingu la kameti maraku pawotu na patunu la ngia pawotu maraku. 29Kanii, nggikina nyumu hiu malumbangu bau itaha#Na hau pa-haleli ndai: hiu malumbangu bau itaha; na pa-haleli la hilu Imbarani-na nda na lohangu-a. da kameti maraku pawotu-na na banjaru-nggu lai Nyungga nunjuya na pareta-nggu? Nggikina nyumu Eli, hiu rihi tembi-hapa da anamu welingu la patembi-ka Nyungga, dàngu hiu puli bianja ba da-pakambombu wikida wànja da marihi hàmu welingu la nimbihu kameti maraku-na na banjaru-nggu lai Nyungga? 30Nyungga, MIRI Ala Ihirailu, àmangu mbàda pa-ràndingu-ngguka, na kuru umamu dàngu na biliku-mu napa ba nyimika malumu-ngga la paratu lundu nu - nu. Tàka nàhu nyuna nda kuhilu ora-anyapa nuna! Nadu nggamuya na matembi-ka, napa kutembi-mayai duna, tàka na ma-pakalana-ka napa ku-pakalana-manyai duna. 31Ronguwa, napa nàmunya na rehina ba ku-pameti hàlaha da bidi tau la kuru umamu dàngu la biliku-mu, hi lupa nda haàtu welingu la kuru umamu matoma la paluri malai. 32Napa nyumu mu-hawina dàngu mu-kapihi#Talànga wanguna ninya na pa-tulihu la lawiti-na: mu-kapihi; na pa-haleli la hilu Imbarani-na nda na-lohangu-a. bau itaha da kanyuru pawua-nggunya na tau hawiangu-ka la Ihirailu, tàka la kuru uma wikimu napa nameti bidi tau ndàba. 33Na nyuna, na haàtu welingu la wàla wuamu, napa kupuli-nya paluri dàngu ka nalumu-ngga la paratu. Ba tuna napa nyuna napoki dàngu hi naluri habaka eti.#Na hau pa-haleli ndai: nyuna; nahilu Imbarani-na jàka haleli-ya, “nyumu”, wàna. Mbuu ndàbada da wàla wuamu hawiangu pa-pameti-ha napa. 34Na manjadi mbuti ba tuba pa-deningu-na nuna mbuu ndàbana na papanii-nggu, napa da madua da anamu, i Hòpuni dàngu i Pineha dameti kahau lodungu. 35Tunaka nu napa hi kupindi ratu ma-manundu lai Nyungga dàngu na mawunda-ya jàka nggàraya na pa-pareta-nggunya. Napa kuwua-nya wàla wuana nyuna na ma-paloku mànuya na paratu wàna la hangga hanganji - hanganji papindi-nggu. 36Nimbihu wàla wuamu na maluri-ipa, napa dalua la ratu nuna la pakaraï àmahu dàngu pangangu. Napa nyuna na-kamahingu: Pahia àrungga duku ka ku-pambapa dànja da ratu, ka pekunai duku ba ku-ngalangu pangangu mili handàka hoba-a,” hi wàna.
@LAI 1995 Indonesian Bible Society (Lembaga Alkitab Indonesia)