1 YAYA 3
3
”Kit Ala apuri aret o,” yinuk, yoragagerak wone
1Nit at apuri abet aret wonogwe me, at Ala nen, ”Kit an napuri aret o,” yo'nirage ti paga at ninogoba alik negen ninabuwa nggwok lombok mbake menggerak ti kaanip o, noreewi. Yi aakumi ndi aakumi nen aa'nduk Ala yelok kaga'lek wonogogwaarak kwak, yogondak at apuri nit kunduk yelok niiga'lek aret agaarik o. 2Napuri o. Kit an niniki kunik me, wone ambi yokkira o. Nit yogondak aret Ala apuri ogoorik o. Peebi nonggop ee'ninaburak nogo awo kin aga'lek kwe, at wage kenok, ”Etenggen yi kwak eeppinaniyak nduk, wonogoorak kagi,” yinuk, mbakwi niigak, at etenggen kokwak eeppinanigin mba'nuk, niniki ti paga mban luunik ogoorik o. 3Nit eeppinaniyak nogo niniki luunik wonogwe niinok, at Keritut iniki kikak naka'lek wonage nogo pogom, nit ndak-ndak niniki kikak naka'lek aret eekkologo logowok o.
4Nit maluk eekwi kenok ti, Ala wone yugu aret taganggwi me, aap ambi maluk eeke menggerak kenok ti, Ala wone yugu taganogo punuk eeke menggerak aret o. 5At Keritut maluk abu eekeelik aret me, ”Nit ninomaluk lek eerogo pinanikit nduk, wambi wagagerak kagi,” yinuk, mbako ogoorik o. 6Ndi, aap ambi at Keritut imbirak iniki kunik wonage kenok, at maluk abu eekeelik aret o. Ndi, aap ambi maluk eeke menggerak kenok perak, Keritut enegen kaga'lek imbirak ogoorak aret wonage o.
7Napuri. It aakumi ugun kit kinambo'me laganggwi iyo, liippogo logonip o. Aap ambi maluk eeka'lek obeelom mban eeke kenok ti, at Keritut maluk eeka'lek mondok obeelom mban wonage nogo pogom aret wonage o. 8At Ibilit o maan iyaalok nen maluk eerit wundi wage menggerak me, aap ambi maluk mban eeke menggerak kenok, at Ibilit aput aret wonage o, Ndi, at Ala aput wambi wagagerak nogo ti, at Ibilit nen yi eekak ndi eekak eeke menggerak nogo abok aret, mondok lek eerogo pikit nduk, wambi wagagerak.
9Aap ambi Ala nen ndareegerak kenok, at Ala obaabut aret waganeegerak me at maluk eeke logogin lek o. At Ala nen aret ndareegerak me, at maluk eeke logorak ti meek o. 10Ibilit apuri kenok, inowe-inawot iniki kunik lek logonet, maluk mban eekwi, ndi, Ala apuri kenok, inowe-inawot iniki kunik logonet obeelom mban eekwi, eerit nogwe ti paga inobaabut yelok iigo monggoorak.
Niniki-kiniki kunik eeko logorak wone
11”Niniki-kiniki kunik eeko logonip o,” yinuk, yo'niragagerak ti, o maan aa'nduk nen konenggo nogogutak nogo aret o. 12At Kayin nen eereegerak nogo pogom, kit togop eeriyak lek o. At maluk ee'ninake menggerak aput aret me, awuluk mondok wareegerak. Ndi, nonggop nduk awuluk wareegerak mbakop? Lek o. At Kayin maluk mban eeke menggerak me, awuluk obeelom mban eeke kage nagagirik, anini nen aret awuluk wareegerak.
13Togop kenok, yi aakumi ndi aakumi nen ineebi kinombakwi iinok, ”Ie,” yinuk, kinagabiti mbarugup o, noreewi. 14Nit ninoreewi ninom niniki kunik mbakwi ti paga, nit kanggo menggam nen nineenik ee'ninake minggim muk pinani wagagerak mbako logowok o. Aap ambi nen aakumi iniki kunik aganake lek kenok, at kanggo menggam time awo aret wonage mbako logowok o. 15Aap ambi at awot eebi ombake kenok, at aakumi inooka pogom aret wonage o. Ndi, aakumi inooka nogo ti, at eenik wonage lek kambak negen aret wonage mbako logowok o. 16Nano eeriyak nduk ninoreewi ninom niniki kunik eekwi mbakop? Lek o. At Yetut iniki nen, ”An aakumi inake nooruwak aret o,” mba'nuk, ninake kambeegerak ti kokwak, nit togon ninoreewi inabuwa nen inake kambuurak op aret mbako logowok o. 17Aap ambi eenggi warak nogo nen ore aaninggin oba agaarak enegen kage kwe, ”At obaalombok o,” yinuk, iniki nggilimi wonage kenok, Ala nen aakumi inabuwa mbake menggerak nogo mendek inikime wonage abu lek o. 18Napuri o. Nit ninoone paga nen mban, ”Aakumi ninom niniki kunik wonogwe o,” yinuk, yuurak mage o. Ata, niniki paga nen aret inabuwa lombok mbako logonet, obeelom eeppiinet nogo logowok o.
Ala enggaanom paga ninagabiti lek logonet, yoriyak wone
19-20Nit Ala enggaanom paga eeko monggoorak nogo abe'nage logonet, maluk ambi eekoorak paga ninenggali wappinanege kenok, ninagabiti mbariyak kwe, Ala nen yi eekak ndi eekak eeko monggoorak nogo inom, ninikime ee'ninake nogo inom, abok aret eenu me, nit Ala enggaanom paga, ”An aakumi inabuwa mbake logonet, obeelom eeppiinet nage nagagirak nogo paga Ala ari menggerak ndak-ndak eeke nagagirak o,” mba'nuk, ninagabiti lek aret, yoriyak op o. 21Noreewi o. Kit an niniki kunik me, wone ambi yokkira. Nit eekoorak ninikime nen ninenggali wappinanega'lek kenok, Ala enggaanom paga ninagabiti mbariyak lek o. 22At Ala nen, ”Yogop ee'nu, ndogop ee'nu,” yinuk, yo'nirage menggerak wone inom, at eeriyak inikilom mbake menggerak nogo inom, ndak-ndak eekwi niinok, nit yi mendek ndi mendek wo'niraawak nduk, nggino yogwi nogo at wo'nirage logogin aret o. 23”Kit an naput Yetut Keritut kiniki oba panggombunuk abet mbakwi, ndi, an nen yokkiragagirak nogo ndak-ndak kinoreewi kinom kiniki kunik mbakwi, eeko logonip o,” yinuk, wone lengganogo yo'niragagerak ti aret yokkiragi o. 24Kit ambi nen, at, ”Yogop ee'nu, ndogop ee'nu,” yereegerak wone nogo ndak-ndak eekwi kiinok, at Ala nen kit kinom kiniki kunik wonage, ndi, kit nen at kinom kiniki kunik wonogwe, eeko logomunggup o. Aberiniki wo'niragagerak ninikime wonage ti paga at Ala abet aret nit ninom niniki kunik wonage nineenu ogo o.
Цяпер абрана:
1 YAYA 3: WNO
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце