1 YAYA 2
2
Keritut ninake eeke menggerak wone
1-2Napuri o. Kit maluk eekwi kiyo, wone yi yokkiragi o. At Yetut nen nit mban ninomaluk lek eerogo punuk Ala iniki yanggonogo pulik o. Ata, yi aakumi ndi aakumi abok aret inomaluk onggo mbangge nagagirik, Ala iniki yanggonogo pereegerak me, at ambi nen maluk eeke kenok, at a'me nggelok eeke menggerak Yetut Keritut nogo nen, nit ninake ninogoba yoge logogin o.
3Ala nen, ”Yogop ee'nu, ndogop ee'nu,” yereegerak wone nogo ndak-ndak eekwi kenok, ti paga, ”Aap yi, Ala apuri abet aret iigo,” yinuk, yogo monggoorak kwe, 4aap ambi nen Ala yereegerak wone nogo eeka'lek logonet, ”An Ala aput aret o,” ari kenok perak, Ala ari menggerak wone nogo at inikime lek kagak ari me, aap ti pilit pugungge menggerak aret o. 5-6Ndi, aap ambi nen Ala yereegerak wone nogo ndak-ndak eeke kenok perak, aap ti mondok abet aret Ala imbirak iniki kunik lombok menggerak. Nit nen yogo logonet, ”Yetut ninom kunik wonogwe o,” yogwe niinok, at Keritut eeke nagagerak ndak-ndak eekwi ti paga Ala ninom abet aret kunik wonogwe nineenu ogo monggoorak.
Ala nen wone ngget mendek eeko logorak yo'niragagerak wone
7Noreewi o. Kit an niniki kunik me, an nen wone ngget mendek yokkirage lek o. Wone yi, o maan togon kinaruk konenit wogo monggotak nogo aret liiru mbanggirage kwe, 8o apit lek age kagak o eya abe lombok unggwi wage logonet, wone maan yugu nogo aret Keritut eerit nage, ndi, kit-kit aret kiniki kunik eekko'net nugwi, eekwi paga kin age me, wone ngget yugu negen aret kenok, liiru mbanggiragi o, noreewi.
9-11Aap ambi nen at awot eebi ombake logonet, ”An o eya paga nage agarik o,” ari kenok, aap ti, iniki o apit pogom aret wonage o. At awot eebi ombake me, o apit paga nage logonet, enegen mbuk pogom eerogo pateegerak me, at nggeeme nage negen abu kobak aret wonage o. Ndi, aap ambi at awot iniki kunik ombake kenok perak, at o eya paga nage menggerak me, nage logonet, aganak kolaagin lek o.
12-13At o aa'nduk nen nok-nok yogondak kuli itok mondok wonage kit kineenu ogogutak nogobamini nogo inom, ndi, at maluk ee'ninake menggerak tebenogo pogotak kit an nawori nogo inom, kit napuri abok aret at Keritut eereegerak nogo paga Ala nen kinomaluk lek eerogo pinagareegerak me, kinake liiru yi mbanggiragi o.
14At o aa'nduk nen yogondak mondok-mondok wonage kineenu ogogutak nogobamini nogo inom, kit Ala wone kinikime kologo nogogutik, kiniki koleewak ogogutak nogo nen at maluk ee'ninake menggerak tebenogo pereegutak nawori nogo inom, napuri kit abok aret Ala kineenu ogogutak me, kinake liiru mbanggiragi o.
15It aap nggween paga mendek nen iniki koombunuk eeko menggaarak inom, yi mendek ndi mendek nggween paga mendek inom, abok aret kiniki kunik eerugup o. It aap nggween paga mendek iniki koombunuk eekwi nogo kinikilom mbakwi kenok, Ala kinom kunik logomunggup lek aret o. 16It aap nggween paga mendek nen iniki nengge kenok eekwi nogo inom, inigen pekkogo logonet, uugwe mbakwi nogo inom, ”An koongge mban iya o,” yinuk, wogoppatit nugwi nogo inom, ti eeko menggaarak abok aret eerit nugu logowak nduk ninogoba nen koonggeelik o. It aap nggween paga mendek nen aret iniki koombunuk, eeko menggaarak. 17Ndi, it aap nggween paga mendek nen iniki koombunuk eekwi inom, yi mendek ndi mendek iniki nengge kenok eekwi inom, abok aret lek arigin kwe, Ala iniki mbake menggerak nogo, kit togop ndak-ndak eekwi kiinok perak, mondok-mondok kineenik aret logomunggup o.
Pilit Keritut nen agan woroorak wone
18Napuri o. O age yobok paga eeriyak nogo muk panggo yegerak o. Ndi, Pilit Keritut woraagin koneneegutak nogo, yogondak ti mendek ineebe ambik muk mi'nagaarak wonogwe ti paga, ”Ie. O age yobok paga eeriyak nogo muk panggo yegerak kagi,” yinuk, mbako ogoorik. 19It aap ti, aa'nduk ninom kuwak eeko nogogurak kwe, it nen, ”Nit mendek lek o,” yinuk, mbo pinaninuk mbaganeegwaarak. It aap ti, ”Nit mendek aret,” mba'netak en, ninom aret logonetak kwe, it aap ti, ”Nit mendek lek,” kin aruwak nduk, mbo pinaninuk mbaganeegwaarak.
20Kit perak, aap ambi eeke logowak nduk, leenogo punuk amburu kilippogo mengga kwak, at maluk eekeelik obeelom mban eeke menggerak nogo nen, kit leenogo pinaganuk, Aberiniki wokkiragagerak me, an wone yokkiragi yi nogo ti, abok kineenu aret kiigi o. 21Ala ari menggerak wone kit kineenggo'lek me nduk liiru yi mbanggirage lek o. Kineenu aret me, it aap nen Ala ari menggerak wone kagak alik agan wogwe iinok, ”Yi pilit aret yogwe o,” yinuk, yelok kaabagip nduk liiru yi mbanggirage agarik o.
22Aap pilit pugungge menggerak ti ta mbakop? Lek o. Aap ambi nen, ”Yetut ti Keritut lek o,” ari kenok, at pilit pugungge menggerak aret o. ”Yetut ti, Keritut lek o,” yogwe ti paga Ala aput Yetut aret kagak, ”Nineebi o,” yinuk, mbo pugwi kenok, ogoba nen at aput kenok ari menggerak nogo inom aret mbo pugwi me, o age yobok panggoni wage paga eeppiyoorak nogo ti, it aret o. 23Aput Yetut mbo pugwi kenok, ogoba inom aret mbo pugwi o. Ndi, ”Yetut ti, Ala aput Keritut aret o,” yinuk, waganggwi iinok perak, ogoba inom aret waganggwi o.
24Kit perak, o maan aa'nduk togon wone koneneegutak nogo, kinikime mondok aberak logonet porogo logonip o. Porogo wonogwe kiinok, kit ninogoba Ala aput imbirak kinom kiniki kunik aret logomunggup o. 25Nit ee'ninaburak Ala nen koonogo pereegerak nogo ti, ”Kit mondok-mondok logobagip nduk, an nen kineenik eekkinabigin o,” yinuk, yo'niragagerak ti aret o.
26It nen kinambo'me laganggwi iyo, liiru yi mbanggiragi o. 27Aberiniki kinoba wuppinagi wagagerak kinikime logonet, mamunggirage agaarik o. At nen yi wone ndi wone abok aret mamunggirage logonet, pilit arilik abet mban ari menggerak me, aap ambi nen wone alik mendek mamunggiroorak lek aret o. At mamunggirage ti ndak-ndak eekwi kiinok, Keritut kinom kunik aret logomunggup o.
28Napuri o. Peebi at woroorak nogo eyom paga nit ninenggali lek niniki teeluk logowok nduk, yogondak nen niniki ambit a'nuk Yetut ninom kunik aret logowok o. 29At Keritut maluk eekeelik obeelom mban eeke menggerak kineenu me, it aap obeelom eeko menggaarak nogo, ”Yi at nen aret ndaganabeegerak kagi o,” yinuk, abet aret mbarumunggup o.
Цяпер абрана:
1 YAYA 2: WNO
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце