ROMANOS 12
12
Eyacuiñajji eseja eyami quiacajji ojo echacochacojji
1Ecue dohuecuana jjo'icuana Jesosaja epeejji, Eyacuiñajjiya eseya queapamenee queaneenee pomeecuaji'yojjima acani eseja mimishijo. Jamajjeya eyaya quiana huohuiajjaneineiaña miquianaja eyami o equiajjijo ojo echacochacopoquijji. Ma ecua yahuajo Eyacuiñajjija equi-aijo chacochacopoquiani dejjacuaa oveja naa jehuica'yapoa Eyacuiñajji quiajji, jama pea-aiya jjaquiaquime quiana oe pocue eshetii ba'e ojo queapame eba'epoquijji. Miquianaya jama jjaquiaquime pomajje, cua Eyacuiñajjiya chacomeesa-acaje quiaa apoquiaje o queabihui pomeejji. Jama poaniya Eyacuiñajji e'ejojonei bihuiapoquiaje quiaa. 2A'a jiquio meshijo nequica dejjamimishicuanaja ejjashahuabaquijji jayojja ba'esapea-aipojji. Eyacuiñajjiya ca quiana ca pea jjashahuabaquime capomeecapoquiahua. Oja ejjashahuabaquijji miquianaja esapadojjojo canequimeecahua queaja'a eba'epoquijji. Majoya miquianaya jama ba'epoquimajje queaja'a bapoquiaje Eyacuiñajjija ejjashahuabaquijjicuana miquianajaya eapoquiajji. Ojaya ejjashahuabaquijjicuana queapamenee poani, mimishima'nei. Ojaya ejjashahuabaquijji jayojja ese ba'epoquiani bamajje Eyacuiñajji queabihui poani esejo.
3Eyacuiñajji queapameneeyajjejojoya eya oja esohuihuohuiquinequijji epojji nequimeecanaje. Jamajjeya quiana eyaya huohuiaña a'a miquianayanei queaca'a poani poso jjabaquijji. A'a peacuana peajja jayojja ajji. E'ejojonei Eyacuiñajjiya miquianaya jjashahuabaquimeesahuaca'yonaje ojo. Ojaya echacojji ohuaya quiana ameesahuacani pea-ai. Jamaya quiana oe jjabaquipoquicue. 4Bacue, esejaya eyami oe poani jamatii queahuiso eseja yamijo nequiani ba'a: ecojja, eshajja, ehui pea-ai. Ojjaña joya eseja yamijo nequiani oya jayojja pea-ai echacojji pojjeama poani. 5Oya jayojja pea-ai eseya Jesosaja epeejjicuana poani. Eseya queahuisonee poani, jamatii eseya oe eyami jayojja poani Quitojo. Eseya Quitojo ojee nequiani oya jayojja jjashahuabaquime pea-ai poani jiquio ecua esejaya eyaminei oe poani jama pea-aiya.
6Eyacuiñajjiya eseya oja echacojji queapame apoquiajji queaca'a pomeecani. Oya echacojji pea-ai eapoquiajjijo pojjeama ohuaya queaca'a pomeecani cuana. Cua ohua oja epeejjicuana ameesa-acani echacojji, ohuaya jamaya queaca'a pomeecaje ma echacojji yajji ojayanei ejjashahuabaquijjijo. Jama echacojji yajjijo queaca'a pomeecani cuana ba'a: Eyacuiñajjiya becacuana oja esohui queaja'a bameecani peacuana huohuiquijji epojji. Jamajjeya macuanaja queapamenee huohuiquicajji queaja'anee jjashahuabaqui'yomajje. 7Eyacuiñajjiya becacuana ca onijje ba'eca Jesosaja epeejji asahuajji epojji pomeecani. Jamajjeya ma echacojjiya queapame macuanaja acajji. Becacuana ca Eyacuiñajjiya oja esohui queaja'a ehuohuijji pomeecani. Jamajjeya oja esohui queapame cahuohuitiicapoquiahua macuaaya. 8Becacuana ca Eyacuiñajjiya pea queabihui pomeesahuajji epojji pomeecani. Jamajjeya maya cachacocahua cuaa queapame Eyacuiñajjijo. Pea Jesosaja epeejjicuana ca Eyacuiñajjiya oja bejjo queahuiso quiajji epojji pomeecani pea asahuajji epojji. Jamajjeya coma dejjacuanaja oja bejjo nahueca-ajja pea quiajji. Becacuana ca Eyacuiñajjiya nequimeecani oja echacojji huohuipoquiajji epojji, etii epojji. Jamajjeya ojaya epeejjicuana hueya-ama cachacomeecapoquiahua. Becacuana ca Eyacuiñajjiya emano jaacuana asahuajji epojji pomeecani. Jamajjeya queabihuineeya emanocuana ca-asahuacapoquiahua comacuaaya.
Jesosaja epeejjicuana jamaya queaja'a ba'ecapoquijji
9E'ejojonei ojjaña miquiananijje ba'eca Jesosaja epeejjicuana queajeanee apoquiacue. A'a jamatii miquianaja enabaa queajea nisho ajji cuana. Cua queamimishi epojji queatai ca oe cajaanei acue. Cua queapame epojji oe apoquiacue quiaa. 10Miquiananijje ba'eca Jesosaja epeejjicuana queajeanee apoquiacue oya eseja dohuenei, eseja jjo'inei pea-ai poani Jesosajo. ¡A'a oe miquianaja eba'ejjijoneitii jjashahuabaquipoquijji! Queapame jjashahuabapea-aiquipoquicue peacuanajo o asahuapoquiajji epojji. Oya queapame pea-ai poani bacue.
11Eyacuiñajjijo hueya-amanei chacochacopoquicue quiana queaquijijjijajinee. A'a oe hueyahueyajji Eyacuiñajjija echacojji eapoquiajjijo.
12Miquianajaya eba quijje Eyacuiñajjinijje anije'yo Eyajo, jamajjeya Eyacuiñajji miquiana ba'emeesahuajji poanijo queabihui ba'epoquicue jjeya. A'a queayenonee pocuajinanajji miquiana queacamajanee pomeejji poeajo. Queaca'a oe ba'epoquicue quiana. A'a oe Eyacuiñajjinijje mimipajea-ajjapoquijji pea-ai.
13Jesosaja epeejjicuana aema' poajo, queacamaja poajo, ba'emeesahuacue queabihuineeya. Joya miquianaque anicuaa poejecuana queapameya ja'ajjequicue miquianaja equiyasijje.
14Eyacuiñajjinijje queapame mimipoquicue joya mi queatai ajji poanicuanajo. A'a mimijji macuanajo jama ba'a: “Jiquio e queatai ajji poanicuana camanojeameeca'yahua Eyacuiñajjiya.” ¡Chojja, a'a jama mimime pojji! Jama mimime pocue ba'a: “Jiquio e queatai ajji poani queapame acue, Eyacuiñajji.”
15Joya queabihuinee poanicuananijje queabihui pea-ai pocue. Joya queayenonee panicuananijje ca papea-aicue.
16Queabihui, queabei pea-ai ba'epoquicue peacuananijje. A'a miquianayanei queapame poani poso jjabaquijji. A'a peacuana peajja jayojja bajji. Joya aema'cuananijje, ca'a-ama poanicuananijje pea-ai jjapeequicue. A'a miquianayanei queasapaja'anee poani poso jjabaquijji. Jamajjeya ojjañacuana queajeanee acue.
17Onaa quiana queamimishi acajje, a'a oya queamimishi apea-aijji esosejje. Ojjañacuanaja ebajji queapame ba'epoquicue. 18Ojjañacuananijje queabei queneama ba'epoquicue. Jama posaya oe pocue quiana jamatii onaya jama posapo-ajjajo. 19Ecue dohuecuana jjo'icuana, ecuea quiana queajeanee poani. A'a joya miquiana queanee pomeejji epocuana queacamaja pomeepea-aisa-ajji esosejje. Chojja, Eyacuiñajjiya oya queacamaja pomeecaje quijje oja mimishi huohui'yomajje. Ojaya esohui yahuajonei etehue jaa jama poani ba'a: “Eyayanei ojjaña joya ecuea epeejjicuana queacamaja pomeejji epocuana huohuije'yo queaja'a o queaneenee ponequijjijo. Eyaya majoya queaneenee pomeeje cuana” jamaya poa Emeshimesenei. 20Eyacuiñajjija esohui etehue jaa jama poani pea-ai ba'a: “Joya miquiana botiamanei ajji poani queashoe poajo, oya bobiacue. Queanabataja poajo, ena quiacue oja eishijji. Miquiaaya jama ajje oya queabichonee poaje queamimishinee poani jjabaquimajje.” 21A'a queamimishi pojji joya mi queatai ajji epocuananijje esosejje. Oya ca oe queapame acue. Miquiaaya jama pomajjeya oya queapame epopea-aijji pomeesahuaje.
Цяпер абрана:
ROMANOS 12: ESE
Пазнака
Падзяліцца
Параўнаць
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Copyright Mision Nuevas Tribus, 2006