ROMANOS 11
11
Iyehuiso israelitacuana jjashahuabaquije'yo
1Eyaya quiana huohuiajjaje, ¿a'a Eyacuiñajjiya ojjañatii israelitacuana oja babaca cajaa aca'yapoa? ¡Chojja de, ojaya ojjañatii cajaa ea'yojji pojjeama poa! Eya ca iña israelita dejja pea-aiya poani, Abrahamja osecua. Benjamín ecue baba poa. 2Yahuajoneitiiya Eyacuiñajjiya israelitacuana bacapoa oja babaca, ojaya cajaa ea'yojji pojjeama poa cuana. ¿A'a miquianajaya pajeajjima poani Eyacuiñajjija esohui ma Elías mimiapoa Eyacuiñajjinijje? Oya jama mimime poa onijje israelitacuanajo ba'a: 3“Emeshimesenei, jiquio israelitacuaa miquea esohuihuohuijji poani dejjacuana quecuajeyoca'yonaje, jajahuejjajeajeyoca'yonaje. Mi bihuiajji mei eiyasohua chama'yo, quecuajeabichajeaca'yonaje cuaa. Eyanei caca oe che eshe nequiajja so'o miquea esohuihuohuijji poani. Eya pea-aiya quecua'yosa-acani cuaa” jamaya Elías poa onijje. 4Majoya Eyacuiñajjiya Elías saja-acapoa jama ba'a: “Chojja, miya menei pojjeama nequiani. Queahuisocuana enequi ejo jjashahuabaqui'yotiicuana. Enequi 7.000 huisome dejjacuana eyacuiñajjinisho Baal bajjani oya bihuiapojjima'” jamaya acapoa yahuajonei. 5Jjeya pea-ai ma ecua yahuajonei poa jama pea-aiya iyehuiso israelitacuana enequi ojaya epeejjitii poani e'ejojonei. Eyacuiñajjiya ojayanei ejjashahuabaquijjijo oja babacacuana queapame acapoquianitii. 6Eyacuiñajjiya ojayanei ejjashahuabaquijjijo oja babacacuana nahueca'yonaje oyaneitii queapame ba'yanijo pojjeama. Eyacuiñajjiya oja babaca oyanei queapame ba'yanijo nahueca'yanijjemo o nahue'yojji Eyacuiñajjija ejjashahuabaquijji jayojja pojjeama poquiae. Oya Eyacuiñajji queapameneeyajjejojoya babacacapoa cuana, oyaneitii queapame ba'yanijo pojjeama.
7Jiquio esohui jama poanijje ba'a: israelitacuana oja mimishima'yo Eyacuiñajjija ebajji nisho po-ajjacapoa. Jamatii Eyacuiñajjiya bacapoa cuana oja mimishijjitii poani. Eyacuiñajjija babacacuana caca oe oja mimishima'yo bacapoa ohuaya. Joya oyaneitii oja mimishima'yo epojji nisho israelitacuana ca shajjama'neitii popoquiani. 8¡Bacue! Eyacuiñajjija esohui jama poani macuanajo ba'a: “Eyacuiñajjiya queajjashahuabaquiquehua pomeecapoa cuana. Jamajjeya jjeya pea-aitiiya queajjashahuabaquiquehuatii ba'epoquiani cuana. Eyacuiñajjiya oya cojjajji acapoa, jamatii oya jjabaquiajja jayojja poani. Shajjahuejjajji poani, jamatii jjashajja-ajjaquiajjatii jayojja ba'ecapoquiani cuana oja esohuijo.” 9-10Yahuajonei Davidya huohuicapoa israelitacuana queaneenee pomeecaje Eyacuiñajjiya. Jama tehueme acapoa ba'a:
“Eyaya Eyacuiñajji huohuiajjanaje israelitacuaa fiesta o bihuiajji acajo oja macuana queanee epomeejjijo.
Jiquio ecua acuichaa ehuanaa ebiocuiñajjicuana dasiamajje cuiaca'ameecani jama pea-aiya ca-acahua o bihuiajji fiestaa.
Oja fiestajo queapame epoaje'yo poso jjabaquimajje queaneenee poaje cuana.
Israelitacuana cojjama' jayojja capomeecahua Eyacuiñajjiya oya jjabaquiajja jayojja epojji.
Queacamajaneetii capoahua cuana.”
Jama tehuemeya acapoa Davidya.
Judío pojjeamacuana pea-ai nahuecaje'yo Eyacuiñajjiya
11Eseyaya baña judiocuaa queahuisoneeya Eyacuiñajjija esohui cajaa acapoa oquequimajje. Eyaya quiana jjeya huohuiajjaje ba'a: ¿A'a ojjañatii judiocuana quea-Eyacuiñajjihuesha ejjasejjaqui nequicaje'yotii? Chojja de, ejjasejjaquitii epopoqui'yojji pojjeama poaje cuana. Bacue, e'ejojonei judiocuaa queahuisoneeya Eyacuiñajji cajaa acapoa. Jamajojoya aje Eyacuiñajjiya judío pojjeamacuana queahuiso nahueca'yapoa. Eyacuiñajjiya peajaajji judío pojjeamacuana ojaya epeejji epojji iyaaca'yonaje bamajje israelitacuana oya jayojja pea-ai posapoaje. 12Jamajjeya judiocuana queajjashahuabaquiquehua pocapoajo Eyacuiñajjiya judío pojjeamacuana queapame acapoa. Ojjaña meshijo ba'ecacuana iyehuiso ohuaya nahueca'yapoa. Jamajjeya achepamenee Eyacuiñajjiya judío pojjeamacuana acaje quijje queahuiso judiocuana jjashahuabaquica'yajo o nahue'yo epojjijo.
13Jjeya eya mimisapoani miquiana judío pojjeamacuananijje. Eyacuiñajjiya eya babacacapoa oja esohui peajaajjicuana judío pojjeamacuana huohuiquinequijji epojji. Majoya eya queabihui poani ojaya echacojji eajjijo. Eyaya baña ojaya echacojji queapamenee. 14E'e pojja'a enijjejaajji judiocuana eyaya peajaajji sohuihuohuiquiaña bamajje queaquenepishana poaje. Majoya peajaajji Jesosaja epeejji e'ejojonei poaje bamajje miquiana beca judiocuana pojja'a jjashahuabaquipea-aije'yo. 15Bacue, judiocuaa Eyacuiñajjija esohui cajaa acanaje bamajje Eyacuiñajjiya peajaajjicuana judío pojjeama iyaaca'yonaje ojaya epeejji epojji. Jamajjeya quijje judiocuana ojo jjashahuabaquicao'oyajo, achepamenee ma pojjajo poaje jiquio ecua dejja emano'yo jaa shequi'yani jama pea-aiya poaje. 16Bacue, ebionei iñahuahuo edahua pahui oepojji equia Eyacuiñajjija yajji ojjañatii ojaya poaje. Oya jayojja pea-ai acuicuana ojaya esajja equia Eyacuiñajjija yajji ojjañatii oja aacuana, ejjajjacuana pea-ai Eyacuiñajjija poaje.
17Judiocuana jiquio ecua olivo acui-aanei ejajasejjajea jama poani. Miquianaya judío pojjeamacuana ca pea yaacuana jayojja poani olivo aanei jayojja pojjeama. Miquianaya tiinaje joya ecua acui aanei ebiojo nequica jama. Olivo aaneija ejjocojo jjeya miquianaya nequi'yani. Jamajjeya miquianaya eshe poani oja olivoja esajjaneijo, oja aanei jama pea-ai tii'yani. Jiquio esohui jama poanijje ba'a: Yahuajo miquianaya Eyacuiñajjija pojjeama poa. Jjeya ca quiana ca ojaya po'yani. Eyacuiñajjiya quiana queapame acanaje joya ecua judiocuananei jama pea-ai. Ohuaya quiana iyaacanaje oja epeejji epopea-aijji. 18Jamajjeya judiocuana ma ecua olivo aaneicuana ejajasejjajea jaa jama pea-aiya poani. Miquianaya ca ma ecua pea acui aacuana ebiojo nequi jama, oja aanei pojjeama. Jamajjeya miquianaya judío pojjeamacuana, ¡a'a judiocuananei sapo-ajja pojji! Eyacuiñajjiya judiocuana cajaa acapoa so'o. Jjashahuabaquicue quiana acui-aacuanajo oyaneitii pojjeama eshe poani. Esajjaa caca oja aacuana tiimeecani, eshe pomeecani. Jama poaniya quiana oe jjabaquicue.
19E'e pojja'a miquiaaya jama huohuime aje ba'a: “Eyacuiñajjiya judiocuana cajaa acapoa so'o jiquio ecua olivoja aaneicuana jajasejjajeacani jama. Jamaya ohuaya judiocuana acapoa ecuana judío pojjeamacuana enequimee'yojji onijje.” Jama huohuime achana quiaa miquianayanei queapame poani poso jjabaquimajje. 20E'ejojonei Eyacuiñajjiya queahuiso judiocuana cajaa acapoa so'o macuanaya oja esohuijo jjashahuabaqui'yojjima ba'epoquiapoajojoya. Miquianaya caca oe ohuaya nahueca'yonaje e'ejojonei ojo jjashahuabaqui'yonajejojoya. Jjabaneiquicue oe, ¡a'a miquianayanei queapame poanijo nahueca'yani poso jjabaquijji! Eyacuiñajji oe baneineicue acheca'anee oya nequianitii, miquianaya pea-ai ohuaya cajaa acame. 21Bacue, Eyacuiñajjiya judiocuana queahuiso nahue'yojjima acapoa jamatii oja babacanei poa oya oja esohuijo jjashahuabaqui'yojjimatii poajojoya. Ohuaya judiocuana cajaa acapoa so'o jamatii oja aanei jayojja poa cuana. Oya jayojja pea-ai ohuaya miquianaya acaje ojo jjashahuabaqui'yoajjatii ba'e bamajje. 22Jiquio ohua jama acanijo eseyaya baña Eyacuiñajji queapameneetii poani. Oya eseja mimishi sapo-ajjanei poani eseyaya baña pea-ai. Judiocuana jjashahuabaqui'yojjimatii ba'e bamajje Eyacuiñajjiya oya cajaa acapoa so'o. Miquianaya judío pojjeamacuanaya ca queapamenee Eyacuiñajjiya aca'yonaje. Miquianaya ojo mijjashahuabaqui'yajo ohuaya quiana cajaa apea-aicaje jiquio ecua acui-aa jajasejjajeacani jama pea-aiya quiana acaje. 23Jama pea-aiya quijje judiocuana queaja'a jjashahuabaquime po'yajo Eyacuiñajjiya queapame acaje'yo cuana, oja nahue'yo bacaje. Jiquio ecua acuijo pea acui-aa nequiaca'yani etiipoquijji, jama pea-aiya Eyacuiñajjiya judiocuana acaje'yo. 24Bacue, miquianaya judío pojjeamacuana oja iyaacoo pojjeama poani, jamatii Eyacuiñajjiya quiana bacanaje ojaya'yo. Jiquio ecua ebiojo nequica acui-aa pea acui queapamejo nequiaca'yani etiipoquijji jama pea-aiya miquianaya Eyacuiñajjiya aca'yonaje. Jamajjeya ohuaya judiocuana oja babaca queapame apea-aicaje'yo che camaja-amanei judiocuana olivo acui-aanei jayojja poanijojoya. Jamajjeya jiquio ecua oja aaneicuana nequiacaje o'oya oya acuijotii etiipoqui'yojji jama pea-aiya judiocuana Eyacuiñajjiya acaje'yo.
25-26Ecue dohuecuana, jjo'icuana pea-ai Jesosajo, Eyacuiñajjija ejjashahuabaquijji jiquio miquianaja queaquehua poanaje eyaya jjeya huohuisa-aña miquianayanei queapame poanijo poso ejjabaqui poanijje. Jiquio ojaya ejjashahuabaquijji jama poani ba'a: Israelitacuana shajjama' jayojjatii epojji pojjeama pocaje quijje. Judío pojjeamacuana Eyacuiñajjija iyaa ojaya epeejji epojji mahuisoya jjashahuabajeyoquica'yajo, Eyacuiñajjija babacacoo israelitacuana oja nahue'yo pocaje. Oja esohui etehue jaa jama poani ba'a:
“Ojjañajaajjicuana nahue'yojji poani dejja Sión meshijo nequi poeje.
Ohuaya ojjaña israelitacuanaja oja mimishi cuijeacaje'yo.
27Jiquio ecue huohui esohui eyaya e'ejojonei shahuabapoquiajetii
oja mimishicuana cuijeajeyoje'yo”
jamaya poa oja esohui.
28Judiocuaa Eyacuiñajjija esohui queapame Jesosajo cajaanei acapoa, Jesosajo jjashahuabaqui'yosapo-ajjanei poajjejojo. Ojo jjashahuabaqui'yosapo-ajjatii ba'eca bamajje, Eyacuiñajjiya miquianaya judío pojjeamacuana queapamenee aca'yonaje. Jamatii ojo jjashahuabaqui'yosapo-ajjatii ba'eca Eyacuiñajjiya judiocuana queajeaneetii acapoquiapoa, jjeyanei pea-aitii oja etiiquiana yahuajonei oja babaca poajojoya. 29Eyacuiñajjiya judiocuana queajeaneetii acapoquiani oya pea jjashahuabaquime po'yoajjajjejojoya oja babacacuanajo. Oja babacacuana queabihui pomeejji oja quiacuana Eyacuiñajjija ejjeshe'yojji pojjeamatii poaje. 30Bacue, miquianaya judío pojjeamacuana yahuajonei pea-ai shajjama'tii jayojja ba'epea-aipoquiapoa. Jjeya quiana ca Eyacuiñajjiya queapamenee queaneenee pomeecuaji'yojjima acanaje judiocuana Eyacuiñajjija esohuijo shajjama' jayojja pocapoajojoya. 31Jjeya pea-aiya judiocuana oja esohuijo shajjama'tii jayojja popoquiani Eyacuiñajjija miquianaya queapamenee eajjijo. Oya jayojja pea-ai jiquio ecua Eyacuiñajjiya quiana queapamenee queaneenee pomeecuaji'yojjima acani jjeya, jama pea-aiya ohuaya judiocuana quijje apea-aicaje'yo. 32Ojjañajaajjicuana Eyacuiñajjija esohuijo shajjama' jayojja popoquiani ohuaya bacani. Jamajjeya Eyacuiñajjiya joya ecua dejja ejeanobia jaa jayojjaya ohuaya pomeecanaje cuana oja mimishijo. Eyacuiñajjiya ojjañajaajjicuana jamaya pomeecanaje judiocuana, judío pojjeamacuana pea-ai ojaya quijje queapamenee queaneenee pomeecuaji'yojjima eajjijo.
Ojjañacuaa Eyacuiñajji cabihuiacapoquiahua
33Eyacuiñajji queapameneetii popoquiani. Chama'neinei pea oya jama. Ojjaña ojaya ebajeyojeyotii, jamajjeya oya queasapaja'aneetii nequipoquiani. Esejaya ebajeyojji pojjeama ojaya ejjashahuabaquijjicuana. Esejaya ebajeyojji pojjeama pea-ai Eyacuiñajjija echacojjicuana. 34Oja esohui etehue jaa jama poani ba'a: “¿Ache dejjaja shai ebajeyonei Emeshimeseneija ejjashahuabaquijjicuana? Achejapishana. ¿Aya shai oya niñesheacani? Ayapishana. 35¿Aya shai Eyacuiñajji quiacoocanaje o queapame nequijji quijje Eyacuiñajjija oya oya jayojja equia'yojji? Ayapishana.” 36Bacue, Eyacuiñajjiya aquianacuana ojjañatii panacapoa jamatii aema'neineiya. Ohuaya ojjañatiicuana eshe pomeecani. Ojjañatii aquianacuana jiquio meshijo nequiani ojayatii epojji. Ojjañacuaa oya cabihuiacapoquiahuatii. Apoa, amén.
Цяпер абрана:
ROMANOS 11: ESE
Пазнака
Падзяліцца
Параўнаць
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Copyright Mision Nuevas Tribus, 2006