HECHOS 28
28
Pablo Malta bajjani nasi meshijo nequiapoa
1Majoya aje ecuaaya ojjañatii hui'i'yojjima eshe nequiya nequisohuamajje ma nasi meshi Malta bajjani bapoa. 2Ma meshicuiñajjicuaaya ecuana queapame acajjequiapoa. Ma pojjajotiiya aje quea-enaquemo ponequiapoa queahuoeneenee. Jamajjeya macuiñajjicuaa cuaqui queahuiso dahuahuojjecapoa ejjayoquijji. Ecuana huohuicapoa cuaquijijiquiyasijje ejjanequichipiquijji jjayoquiya. 3Majoya aje Pablohua cuaqui oja chicha enojinoji cuaquijijiquiyasijje huanacajo peyo quease'nee cuaqui echicha jaajo cuayananaquiapoa quiyo yajjajo. Majoya Pabloja emejo peyo jjacuiahuahuoquimajje me ijjiacapoa. 4Peyo quease'nee Pabloja emejo ejjacuiahuahuoqui ba'eya ijjiacaje bamajje ma meshicuiñajjicuana ojee mimimimiapoa oopana jama ba'a: —E'e pojja'a jiquio dejja pea quecua'yojji epo. Oya hui'i'yojjima poanaje enashajoaijo jamatii manoje'yo peyoja ijjianeijo. Eseja eyacuiñajjiya oya manomeecaje'yo, ojaya oya enahuejji pojjeama— jamaya poa cuana ojo.
5Jamatiiya Pablohua peyo oja emejo ba'e jeasejjajeacapoa cuaquijijiquiyasijje. Ojaya neeamatii poa. 6Ma meshijo ba'ecacuaa a'a Pablo shejjeecuajije ebajji baneineicapoa. Acheshono oya manocuajije'yo ebajji jjaishoaquinequiapoa cuana Pablojo. Majoya a'a oya manoje'yo ishoapishanamajje Pablo bacapoa cuaa queapametii nequi mano'yoajja. Jamajjeya pea jjashahuabaquime pocuajiapoa cuana Pablojo. Oya queaca'anee pea eyacuiñajji poani poso acapoa macuiñajjicuaa.
7Ma ona nequisohuaqui'yapoa meshichipineijo emeshimeseja quecuana jaapoa. Oya emeshimese bajjani poa Publio. Ohuaya ecuana queapamenee acapoquiapoa tres cahuime huiso majo ani. Bobicuana quiacapoa ecuanaja eijjiajji. 8Emeshimese Publioja chii queamanonee jaapoa queaquiyonee poa, seesee pea-ai. Jamajjeya Pablo poquiapoa o baa. Eyacuiñajjinijje mimimajje Pablohua oja eme huanacapoa Publioja chiija yamibiajje. Majoya ohuaya emeshimeseja chii jja-ajameequica'yapoa. 9Ohua o jama acaje'yo bamajje queahuiso pea emanocuana ma nasi meshijo jaaca yecapoa cuaa Pabloque oja jja-ajameequi'yojji. Ojjañatii quea-aja poca'yapoa. 10Jamajjeya ma meshicuiñajjicuaa ecuana queapamenee acapoquiapoa oja meshijo ani. Majoya ecuana apoa po'yajo ebesapoquio'oyajji queahuiso aquianacuana, bobicuana quiacapoa cuaa ecuana queabihui besapoqui'yojji.
Pablohua Roma meshi bacañaquiapoa
11Jamajjeya ecuaaya tres ba'ime huiso ma meshijotii aniya pea bishe'ai bapoa ebesapoqui'yojji Roma meshiyasijje. Ma bishe'ai ba'epoquiapoa majotiiya beni queaquemotii poequi shejo Alejandría meshijo ba'e onaja ye. Bishe'aihuijo beca eyacuiñajjinisho acui equecuapejjajo nequiapoa. Oe Cástor bajjani poa, pea Pólux bajjani. 12Majoya aje ecuana besapoquio'oyamajje Siracusa meshi ejeojjiyasijje ba'eñaquiapoa. Majotiiya ecuana tres cahuime huiso aniapoa so'o. 13Majjeya ecuana besapoquio'oyapoa meshi anisahuachipineijje Regio meshi ejeojjiyasijje. Majoya aje pea pojjajo ecuana eeno benijjijo besapoquio'oyapoa Puteoli meshi ejeojjiyasijje ba'eñaquiya. 14Ma meshi ejeojjijo nequiya ecuaaya Jesosaja epeejjicuana bañaquiapoa. Jesosaja epeejjicuaa ecuana jjequinobiacajjequiapoa oja equiyasijje siete cahuime huiso onijje eanijji. Majotiiya ecuana ejeojji Roma meshiyasijje epoquijji aniñaquiapoa queaba'ihuisonee epo. 15Jesosaja epeejjicuaa Roma meshijo ba'ecacuaaya ecuana poquiani oja meshiyasijje shajja-ajjamajje queahuisopishana poeapoa ecuana jjehuaa. Ecuana bacañapoa becacuaa aquianaquiajji Apio bajjani meshijo nequi. Ma meshichipineipishanajo equicuana aniapoa Tres Tabernas bajjani ecahuichichajji. Jesosaja epeejjicuana poeje o jjehuaa bamajje Pablohua Eyacuiñajji bihuiacapoa. Oya queabihuinee poa. 16Majoya aje ecuana Roma meshijo aniñaquiajo dejja etii poanicuaa Pablo jjequitepecajjequiapoa pea equiyasijje aniya. Pablo pea dejjacuana emejeyonijje anipajeapoa. Oenei soldadohua Pablo jaahuanacanequiapoa ma pea equijo ani.
Pablo Roma meshijo nequi
17Pablohua tres cahuime huiso Roma meshiyasijje epoe nequiya judío etii poanicuana majotii nequica iyaameecapoa ehuohuijji. Majoya etiicuana jjachichaquiajo Pablohua jama acapoa cuana ba'a: —Enijjejaajji epeejjicuana, bacue. Ecuea queatai ajjima'nei poanaje judiocuana. Eseja etiiquianacuanaja ejjashahuabaquijjicuana ecuea niñebajjimanei, peajja poani ajjima'nei. Jamatii eya Jerusalén meshijo nequi iñaca'acanaje cuaa Roma emeshimeseja nequimee dejjaja ejeanobiameejji. 18Oja nequimee Roma dejja etii poanicuaa baneicanaje a'a eya queatai ponequinaje queaja'a ojaya ehuohui'yojji. Majoya eya huoojea'yosa-acanaje macuaaya ecue mimishi chama' bamajje. Ajeo eya manomeeca'yojji cuanaja jamatii nequi ecue mimishi chama' bacapoa. 19Jamatii nequi caca oe eya judiocuaa manomee'yotiisa-acani e botiamanei poaniyajjejojoya. Jamajjeya eyaya huohuiajjanaje oja nequimee etii poanicuana Roma emeshimese César nequiyasijje ehuoojeajji ojayanei eya ebaneijjijo. Jjeya ecuea ca chama' esohui enijjejaajjicuanajo Roma emeshimeseja eshajja-ajjajji. 20Jamajjeya eyaya quiana iyaameenaje ehuohuijji, ebajji pea-ai. Eya jiquio meshijo emejeyotii ani eseja Eyacuiñajjija esohui queapamejo ma ese jjashahuabaqui'yonaje esohuijoya— jamaya poa. 21Ohua jama huohuime acajje judiocuaa Pablo jama acapoa ba'a: —Ecuanaja caca etiicuanaja tehue papeni mijo jjeshejjima Judeacuiñajjicuanaja huoojea. Jiquiacua poeyanaje pea Jesosaja epeejji judiocuana majo nequica poe. Chama' esohui mi niñebajji majo nequi poecuanaja. 22Ecuana miya shajja-ajjasapoani jiquio miya huohuiaña esohui. Queahuisocuaa pa pea meshijo nequicacuaaya jiquio esohui Ejeojji Eyacua jayojjajo niñebacani— jamaya poa.
23Majoya aje judiocuaa oe epojja ejjachichaquijji acapoa Pabloja esohui eyacua eshajja-ajjajji. Ma pojjajotiiya aje queahuisocuana jjachichaquicapoa ma Pablo ani equiyasijje. Pablohua oya pojjajotii mecajjeahuanei, sinecuanei pea-ai huohuitiicanequiapoa cuana Eyacuiñajjija esohui oya eojjañacuanamese poanijo. Ohuaya huohuineicapoa cuana Jesosajo pea-ai. Oya Jesosa Eyacuiñajjija huoojea e'ejojonei queaja'a ebajji cuanaja Pablohua Moisesja tehue, ma yahuajo esohuihuohuijji poaja tehue pea-ai huohuineicapoa. 24Becacuana oja huohui esohui Jesosajo shajja-ajjamajje jjashahuabaqui'yapoa. Peacuaa ca cho, cajaa acapoa. 25Majoya ma ejjachichaqui anicuana oya jayojja pea-ai jjashahuabaquime pojjeama poani jjabaquimajje poqui'yosapoa becacuana. Macuanaya poqui'yanijo Pablohua jama acapoa ba'a: —Edojjoshahuapameya yahuajonei eseja etiiquiana queaja'a huohuicapoa Isaías dejjajo. Ohuaya Isaías acapoa jama ba'a:
26“Minijjejaajji judiocuana huohuiquicue jiquio esohui jama ba'a:
Miquiaaya esohui shajja-ajjamajamajapoquiajetii,
jamatii queaquehuatii poaje quianaja.
Miquiaaya bamajamajapoquiajetii,
jamatii queaja'a epojji pojjeama poaje quianaja.
27Jiquiojaajji judiocuana queasapaca'anee,
queamimishica'anee poani.
Judiocuanaja shajjahuejja ecapa'yo jayojja poani,
jamajje jjashajja-ajjaquiajja.
Oja ecojja ecahui jayojja poani.
Jamaya jiquiojaajji judiocuana poani oja esohui queaja'a eba poanijje,
queaja'a eshajja-ajja poanijje pea-ai queasapaquehuatii poanijjejojoya.
Ejo pea jjashahuabaqui'yome posapo-ajjanei
judiocuana ecuea oya mimishima'yo epomee'yojji”
jamaya tehuecapoa Isaiasya. 28-29Miquiaaya queaja'a shajja-ajjacue. Jjeya jiquio Eyacuiñajjija esohui enahue'yo epojjijo judío pojjeamacuana huohuipea-aiquicaje cuaa. Peajaajji judío pojjeamacuaa ca e'ejojonei esohui shajja-ajjacaje— jamaya poa Pablo.
30Majoya aje Pablo aniapoa beca shequiajame huiso ma o aninaje equijotii bejjo sosejje. Ojjaña ma o baa poquicanajecuana ohuaya queapame jjequinobiacapoa oja equiyasijje. 31Pablohua meteamaneiya Eyacuiñajji eojjañacuanamese poanijo esohui huohuimajamajacapoa cuana. Ohuaya esohui Jesosajo queaja'anee huohuimajamajacapoa peacuanaja oya esohuijo nahuejjima.
Цяпер абрана:
HECHOS 28: ESE
Пазнака
Падзяліцца
Параўнаць
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Copyright Mision Nuevas Tribus, 2006