HECHOS 27
27
Etii poanicuaa Pablo huoojeacapoa Roma meshiyasijje
1Majoya aje emeshimese etii poanicuaa ecuana Italia meshiyasijje ehuoojeajjijo jjashahuabaquimajje Pablo, pea onijje ejeanobia anicuana pea-ai quiacapoa oe soldado capitán poanija edojojji cuamaya. Oya Julio bajjani Roma emeshimese poanija capitán queaca'a poa. 2Jamajjeya ecuana bishe'aijo anisohuaquiapoa Adramitio meshi ejeojjijo ba'ejo. Ma bishe'ai beshahuanei apoa'ya ba'yapoa ebesapoquijji Asia meshi ejeojjicuanahuasijje. Aristarco bajjani, Tesalonicacuiñajji Macedonia meshijo ba'e, majo pea-aiya nequiapoa ecuananijje. 3Majoya pea pojjajo ecuana Sidón meshi ejeojjiyasijje ba'eñaquiapoa. Capitán Juliohua o jaahuanajji poaniya Pablo queapame acapoa. Jamajjeya ohuaya oya poquimeecapoa so'o majo ani oja epeejjicuana baa, oja Pablo ebobiajji pea-ai. 4Sidón meshi ejeojjijo ani ecuana besapoquiapoa Chipre meshi nasichipinei nequijje beni queaquemohua ecuana queahuesha edojoca poanijje. Beni queaquemonee ponequiapoa, jamajje besapoquicuajimeejjima acapoa. 5Panfilia meshijje Cilicia meshihuijo anijje ecuana besapoquimajje Mira meshi ejeojjiyasijje ba'eñaquiapoa. Mira ejeojji Licia meshimijijje jaapoa.
6Ma meshijoya aje capitán Juliohua bacapoa pea bishe'ai ba'e Alejandría meshijje poe. Ma bishe'ai ba'enaje ebesapoquijji Italia meshiyasijje. Jamajjeya capitanya ma pea bishe'aijo ecuana anisohuameequicapoa ebesapoquijji cuamaya. 7Majoya ecuana queacahuihuiso jjapashineijje besapoquipoquiapoa. Queacamajanee ecuanaya besapoquiapoa Gnido meshi mijicojjaneiyasijje. Beni queaquemohua ecuana cuiajjochicabesapoquiapoa, jamajje ecuana Salmona meshicojjaneijje jjayejjequiapoa. Majjeya ecuana Creta meshi nasijje besapoquiapoa ma benima'pishanajje. 8Ecuana Creta nasi meshi mijisahuajje queacamajanee besapoquiapoa. Majoya ecuana oe meshi Buenos Puertos bajjani bañaquimajje ba'eñaquiapoa Lasea bajjani meshichipinei aniyasijje.
9Jamaya ecuana jjapashineijje besapoquipoquiapoa queacahuihuiso. Majotiiya aje ecuana aniñaquiapoa queashono. Ecuana jjashahuabaquiapoa queacamajanee bae-ai aniyiyesamaneijje ebesapoquijji poaje ma shejo beni queaquemonee poanijojoya. Jamajjeya Pablohua niñesheacapoa cuana jama ba'a: 10—Dejjacuana bacue. Eya jjashahuabaquiani jjeya eseya queacamajanee besapoquije bae-ai aniyiyesamaneijje. Bishe'ai, aquianacuana bishe'aijo ani aninobiquije'yo. Ojjaña chama'yo poaje. Eseyacuana pojja'a se hui'ije'yo beca, chama'yotii se pochana— jamaya acapoa cuana.
11Jamatii capitán Juliohua Pabloja esohui cajaa acapoa. Ohuaya ebishe'meseja, bishe'ai quiica'ajji poanija pea-ai esohui shajja-ajjacapoa ebesapoquijjitii. 12Ma ejeojji queapame pojjeama poa oja bishe'ai majotii eba'epoquijji beni queaquemonee poani shejo jjayejjequiajo. Jamajjeya beshahuanei ojjaña jjashahuabaquiapoa Fenice meshiyasijje ebesapoquijji majotii queapame aniñaquiya so'o. Fenice meshi ejeojji Creta nasi meshijo jaapoa. Ma meshi nasijoya eshequi cuayanimijijje, eshequi oquequianimijijje pea-ai ojaya ejeojji jaapoa. Jamajojoya aje majotii beni queaquemonee poeajo oja bishe'ai jeasohuajjima acaje, benima' ba'eje.
Bae-ai quea-enashajoquemonee poa
13Majoya aje beni queabiso eeno poeanimijijje poani bamajje jjashahuabaquiapoa cuana queapame ebesapoquio'oyajji. Jamajjeya ecuana besapoquiapoa Creta nasi meshisahuajje. 14Majoya aje quijjepishana ecuana besapoquianijo beni queaquemonee poecuajiapoa eshequi cuayanimijijje. Beni queaquemoneeya poejeya bishe'ai jeasohuajeasohua acabesapoquiapoa. 15Enashajo queaquemohua cuiayiyejeacapoa bishe'ai ecuanaja. Marinero poanicuaa bishe'aija hui beni queaquemo poeanimijijje huijea-ajjacapoa. Bishe'ai jjahuijeameequiajja poa cuama enashajo queaquemonee poajojoya. Jamajjeya beni queaquemoneeya bishe'ai cuiayiyejeacapoa queahuesha. 16Ecuanaya bishe'aijo ani queacamaja besapoquiajjapoa oe nasi bisonei nequiquiijje Cauda bajjanijje. Majje ca beni iyequemo ponequiapoa. Bishe'sisisahuajje bishe'ai ba'e beniya jeajea-ajjacajo ecuaa jjeshe'yapoa. Beshahuanei maya dojojeacapoa enashajohua.#27.16 Nota: Ma bishe'sisi aquianama' ebesapoquicuajijji ba'yapoa bishe'ai hui'iyajo.* 17Jamajjeya bishe'sisi jjequiyiyejeasohuacapoa cuaa. Majoya bishe'ai jeyoca'acapoa cuaa jjono queamoohua bishe'ai ecuiapojojeaca poanijje beniya. Majoya bishe'ai meshijaji Sirte bajjani aniyasijje ejaañaquije posojo queametenee poa cuana. Jamajjeya daquica'a eyajo ba'e jjequioqueacapoa cuaa benija ecuiayiyejeaca poanijji, bishe'ai jjochijji. Jamatii beniya bishe'ai cuiayiyejeacapoquiapoa jjapashineijje. 18Majoya aje pea pojjajo beni queaquemonee eanitii jjapojjaquiapoa. Jamajjeya aquianacuana oja iya bishe'aijo ani jeaoqueajeacapoa cuaa enahuasijje bishe'ai ba'ecuaya'yojji. 19Tres cahuime huiso beni queaquemotii poequi bamajje marinerocuaa bishe'aija aquiana, baacuiicuana, acuicuana, jjonocuana pea-ai jeaoqueajeacapoa enahuasijje. 20Queacahuihuisonee ecuanaja eshequi, majametacuana ba'yojjimatii poa queamisitii nequijojoya. Majoya aje beni queaquemoneetii poequi bamajje ecuana ehui'ije'yo poso jjabaquiapoa.
21Ecuana queacahuihuisonee bobi ijjiapojjima' aniapoa ma bae enajotiiya. Majoya Pablo ojjañacuana anijo nequisohuapoa ehuohuijji. Jama huohuime acapoa cuana ba'a: —Miquianaya ecuea esohui Creta meshi nasijotii eanipoquijji shajja-ajjasapo-ajja poanaje. Majotii anijjemo eseya jiquiojo queacamajanee pojjima' pome. 22Jamatii a'a quiana oe queamete queayenotii jjashahuabaquijji emano'yojjijo. Jiquiojo ani quiana ojjañatii eshetii nequije, emano'yojji pojjeama se poaje. Bishe'aiya ca seja ca oe jaanobijeaquije'yo. 23Mecajje oe Eyacuiñajjija ángel ejo jjaja'aquinaje oja huoojea. Eya caca iña oja nahue'yo, ojo chacochacopoquiani. 24Ohuaya eya jama acanaje mecajje ba'a: “¡A'a queamete pojji, Pablo! Miya e'ejojonei Roma emeshimese Cesar nequiyasijje poquije o cojjaneijo nequiñaquiya. Eyacuiñajjiya ojjaña jiquio bishe'aijo minijje anicuana nahuecaje mijo. Che oema'neicuana emano'yojji pojjeama poaje.” Jamaya eya acanaje. 25Dejjacuana, jamajojoya quiana oe, ¡a'a queamete queayenotii pojji! Eya Eyacuiñajjijo jjashahuabaqui'yanitii, oya siajje po-ajjanei. Jjeya eseya nahuecaje ma ecua angelya eya huohuicanaje jamaya. 26Jamatii eseja bishe'ai oe nasi nequiyasijje jaañaquije'yo— jamaya Pablo poa.
27Catorce cahuime huiso beni queaquemonee poequijotii ecuana bishe'aijo aniapoa bae-ai Adriático bajjani anijo. Beniya ecuana pea mijiyasijje cuiayiyejeacuiayiyejea acaba'epoquiapoa. Majoya aje oe mecajje mecashono marinerocuana jjashahuabaquiapoa ecuana meshiyasijje besapoquichipi'yanijo. 28Marinerocuaa ache doenee ena ani bacapoa jjonojo, 36 metros doeme ena ani bacapoa cuaa. Majoya quijje queahueshapishana ache doenee ena ani bacao'oyapoa. Majotii ca 27 metros doeme ani bacapoa cuaa. 29Majoya aje meicuana enaojjoquipajo anijo bishe'ai ejjacuiapojojeaqui poanijje cuatro baacuiicuana queabiquie jeaoqueacapoa cuaa bishe'ai jjochijji. Majotii ba'eya mimisapoa cuana Eyacuiñajjinijje oja ejjapojjacuajimeequijjijo. 30Majo ba'eya marinerocuana jjashahuabaquiapoa bishe'sisijo equehuabesapoquicuaji'yojji hui'i'yo yajjajo. Jamajjeya bishe'sisi bishe'aijo jaa jeaoqueacapoa cuaa equehuabesapoqui'yojji nisho. Majoya bishe'aihuiyasijje poquimajje jama siajje pome poa cuana ba'a: —Ecuaaya baacuii queabiquie jeaoqueaje bishe'sisijo besapoquipishanamajje.—
31Marinerocuana quehuabesapoquije'yo bamajje Pablohua capitán, oja soldadocuana pea-ai huohuicapoa jama ba'a: —Jiquio jjeya quehuabesapoqui'yosapoani cuana bishe'aijotii anijjimajo miquiana ojjañatii hui'ije'yo.—
32Jamajjeya soldadocuaa bishe'sisija jjonocuana jajasejjajeacapoa benija edojojeajji.
33Majoya aje beshahuanei jjapojjaquianijo Pablohua ojjaña bishe'aijo anicuana huohuicapoa bobi ijjiajjijo jama ba'a: —Catorce cahuime huiso miquianaya beni queaquemonee ejjayejjequijjijo jjaishoaquianitii bobi beshahuanei ijjiapojjima'tii ani. 34Che oe jjeyanei bobi ijjiacue quiaa queaca'a epojji. Miquianaya eshetii posapoaniya bobi jjeya ijjiacue. Ojjaña jiquiojo anica ehui'i'yojji pojjeama poaje che oema'nei. Jamajjeya, ¡a'a metejji!— jamaya poa.
35Majoya Pablohua esohui jama amajje pahui jjeshecapoa eijjiajji. Ojjaña majo anicacuanaja cojjaneijo Pablohua Eyacuiñajji bihuiacapoa bobijo. Majo aniya pahui mijimajje ijjiacapoa Pablohua. 36Ohua bobi ijjiacaje bamajje ojjaña ma bishe'aijo anicacuaa bobi ijjiapea-aicapoa. 37Ecuana 276 huisome dejjacuana poa ojjañajo bishe'aijo ani. 38Majoya aje bobi cua ijjiasa-acapoa huisotii ijjiajeyomajje anosoaiso' equecuatabo jeaoqueajeacapoa cuaa enahuasijje bishe'ai ba'ecuaya'yojji queajjee epo'yojji.
Bishe'ai hui'i'yapoa
39Majoya aje jjapojjaquiajo marinerocuaa meshi queachipi ani bacapoa jamatii bajjima poa cuanaja ache meshi shai. Bacapoa cuaa meshicoohui meshijajijji. Jamajjeya cuamaya bishe'ai dojobesasa-acapoa cuaa ejaañaquijji meshijajisahuahuasijje. 40Jjono ejeapashajjajja baacuii queabiquiejo ninequia ba'e jajasejjajeacapoa cuaa bae-ai enaojjojotii ejaajeajji. Ejehuibejeai bishe'ai quiica'ajji pichojeacapoa cuaa. Majoya daqui-ai bishe'aihuijo jaa quecuaquinimajje jjequisohuacapoa beni queaquemoja bishe'ai cuiayiyejeajji. Jamajje bishe'ai meshijaji aniyasijje beniya cuiayiyejeabesacapoquiapoa. 41Majoya aje bishe'ai meshi quea-eshenee aniyasijje hui nequiñaquiajo jeaquenajjimatii jaapoa majotiiya. Enashajocuana queaquemohua bishe'ai quii cuiapojojeacapoa.
42Jamajjeya soldadocuaa dejjacuana ejeyo ani ma ejeanobia aninajecuana quecua'yosa-acapoa o quehuajje eshocuishocuibesapoqui poanijje meshijaji aniyasijje. 43Capitán Juliohua ca Pablo nahuesa-acapoa, jamajjeya ohuaya ma emejeyo anica nahuepea-aicapoa, quecuamee'yojjima acapoa. Majoya ohuaya huohuicapoa joya eshocuishocuicuana enahuasijje etohuananajji besapoquiya meshijajiyasijje. 44Ma peacuana shocuishocuiajja ca acui queajjeejo ese'o jaajjijo huohuicapoa capitanya ebesapoquijji. Jamajjeya meshijaji aniyasijje besapoquiapoa cuana acuijo se'o jaa. Jamaya hui'i'yojjima poa ecuana che oecuanama'nei.
Цяпер абрана:
HECHOS 27: ESE
Пазнака
Падзяліцца
Параўнаць
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Copyright Mision Nuevas Tribus, 2006