Aniroomi 11
11
Ohomorihi ọ raà dọ Anisirẹrị chee há
1 #
Ihwi 3.5
Jẹẹ, me re họ̀ use ịrẹyị ọnya, oo. Vị Ohomorihi wâ sị Anisirẹrị yi tịtẹ nị? Vụrụ-vụrụ, ọchị ọnọọ ịrẹsụ! Ẹmị nyẹmba vị Anisirẹrị. Obooro Abụrahamị mị chị hụrẹ vẹ nị; anovwoovu Ịbẹnjamịnị mị vị nị. 2Aza oni Ohomorihi vịdị sị nyị tịtẹ hụrẹ ụmọrụmọ, oyi yi wa tịtẹ. Wâ kụkụ yẹ ịsaa chẹrẹ tụ́ ini Iwe Ohomorihi nịnị ịnị ịrẹyị Erija? Erija aa sị ịrẹyị Anisirẹrị tụ́ Ohomorihi ịrẹka. 3#1 Ohi 19.10,14Ọ kà, “Ananyị yị, ẹnịnị ẹ kụ́ avaba ọnịsẹ awụ wụ ọ! Ụta ọnị ị yàā hẹkẹ, ẹ kụ́ ọọ gara ha. Ẹmị ịnyara kẹnẹ ọ kụkụ vọ nị, e re yee sì ka ẹnị ẹ̀ wụ̀ mị.” 4#1 Ohi 19.18Ịjọọ vavọọ kà, wâ yẹ, Óhomorihi mè tụ́ ọọ ohi? Ohomorihi ộ kà a yọ ka, “Ma nyị nyị aza ẹnị akahị-akahị oze ịhịmba (7,000) tẹ yị ẹngụ amị. Aza ẹnẹẹ ẹ yị hyakụ jị idinku ku ẹtẹ yị ori ọnọọ ana aā hị́ Ịbaarị.” 5Avọọ ọ mẹ̀ rẹ yà booro aanị nị. A nyị nyị aza chee oni Ohomorihi sị nyị agụvị ayamva anị kẹnẹ. 6Ayamva Ohomorihi kẹnẹ, ọ sị nyị aza ẹnẹẹ nị, ayị vị agụvị ụkọrọ ụvọ ẹnịnị. Àa vị agụvị ụkọrọ ụvọ ẹnịnịị yọ, ẹ yị kụkụ vị ayamva ọnọọ yaanị vị. 7Sẹ va saasaa? Anisirẹrị nịnị e rè vee re ịsị eyee sì. Aza chee oni Ohomorihi nyị kẹnẹ e ree nị. Ẹnịnị ana vọ, Ohomorihi ọ raà mẹ ayị ẹnịnị katẹngụ. 8#Ọda 29.4; Ayị 29.10Â vịdị chẹrẹẹ tụ́ ini Iwe Ohomorihi ka, “Ohomorihi ọ raà mẹ ka eyi ẹnịnị ò gu. Ẹnịnị ẹ yị sị eyi ẹnịnị re ẹtẹ, avọọ ẹyị rẹ sị ụtọ ẹnịnị wụ́ ịrẹyị pooro ve tù ajịnị.” 9#Ahẹ 69.22,23Idevidi ọnị ọ rẹ vịdị kà a ka, “À kà ka ịzị ẹ yà aa rị ịsa, ọ̀ vara ịrẹpa za wa, ẹnịnị ẹ̀ và angga, dị è sí wa atọ! 10Eyi ẹnịnị ò gu, asị e kuku re ẹtẹ! Ụya ẹnịnị ọ̀ ngụ wa, di è kukuu kú enyima-eyimaa zị pooro!” 11Mi ree họ̀ use ịsa ọnya. Ániju nịnị mẹ̀ và angga, vị ẹnịnị wâ sị hyẹdụ ẹnẹ ẹ̀ yị mā vana zụ kwẹẹtẹ avọọ nị? Ọchọnọyịrẹsụ! Ama ịnị ka ẹnịnị ệ vavọọ sị hyẹdụ, dị Anigiriki, ẹnị rẹ kụkụ sị oze re, dị Ohomorihi aa dọ waa há nị. Ọnọọ vị oni Ohomorihi sị hị́ Aniju nịnị ịrẹka, ka ẹ̀ daba beri Anigiriki kụ̀ ụhị. 12Ịvị ana Aniju mẹ, ọ raà mẹ ka Ohomorihi ọ̀ vayị anẹhẹ ana vọ ẹtẹẹtẹrẹ. Ịsẹẹ mẹ Aniju nịnị ịhị, ọ raà vara ọgụ yị Anigiriki ẹtẹẹtẹrẹ. Ọ̀ọ vavọọ yà, yẹ ka ịhị Aniju ẹ̀ẹ sị gụ, Ohomorihi vaa dàa tụ́ ọọ hu avọọ yị aza ẹtẹẹtẹrẹ.
Ohomorihi ô yi Aniju tịtẹ, dị ọ dọ anẹhẹ há nị
13Ẹwụ nịnị ẹnẹ ẹ̀yị vị Aniju mị kụkụ aa kà ịrẹyịị yị booro aanị nị. Ẹma vị odeyi ana aa mẹ̀ ụkọrọ ị́da Anigiriki nị. Udi amị ọnọọ vị ọnị mị nyayịnẹ sị ụbanyị yị. 14Àa ka ọnị mẹ, mị zụ mẹ ka anẹkụra amị è zụ beri Anigiriki kụ̀ ụhị, dị à nyị ịsị mị zụ mẹ, dị Ohomorihi ọ̀ dọ aza ẹnẹ ẹ̀yị vị Aniju kụ̀ ụhị, dị à nyị ịsị mị zụ mẹ, dị Ohomorihi ọ̀ dọ aza ẹnyị ẹnịnị há. 15Óhomorihi mè yi wa tịtẹ, ọ raà mẹ ka anẹhẹ ẹnị ẹ̀ vara ọta Ohomorihi. Ịhị Ohomorihi ọ̀ọ va varẹma sị wa dọ yọ? Ọ vaa mẹ ka ịsa ẹbanyị ẹ̀ mẹ anka óku òo rere ha hụụnị isu avọọ nị. 16Àa raà dà Ịbụrẹẹdị ịpaapa yị Ohomorihi, ọnọọ vị ka avaba anị a sị yị Ohomorihi avọọ nị. Àa rẹ sị ẹpa ọchị ọnya tụ́ irenyi yị Ohomorihi, ọnọọ vị ka avaba ana vọ, Ohomorihi ọ nyị nị. 17Â dà ẹnyị ịnị avọ oromi obooro. Ẹwụ nịnị ẹnẹ ẹ̀ yị vị Aniju vị ana sị mẹẹ anka avọ oromi ịnị avị avọọ. Â sị wụ́ chire oromi obooro ọnọọ. Dụ ụ kụkụ aa rị ịsọyịrị ozoza ẹnẹ ẹpa oromi obooro aa sịị vẹ. 18Agụvị avọọ asị ụ na mẹ eyi hi aza anaa dà kwooze anka avọ avọọ! Wàaa mẹ eyi, yẹ ka ayị vị ẹwa vị ẹpa, avọ kẹnẹ ụ vị nị. 19Wa zụ aa kà a ka, “Avọ obooro vị anaa dà kwooze, agụvị dị à zụ sị mị chire udi anị.” 20Ịzẹyịza yọ. Ẹnịnị ẹ yị sị ayị tụra Ohomorihi, agụvị avọọ Ohomorihi dà wa kwooze nị. Ộ sị ẹwụ nịnị va tụ́ udi ẹnịnị, agụvị ka ẹwụ nịnị ộ sị ayị tụra Ohomorihi. Asị ụ na sị ọnọọ mẹ eyi zịịzị nịnị, ama â vọrọ ka wa nyị angwahi nịnị! 21Ohomorihi ọ̀ yị navọ avọ obooro, ọ zụ mẹ dị ọyị rẹ navọ ẹwụ nịnị. 22Agụvị avọọ yẹ nịnị, Óhomorihi mẹmẹẹ̄ vayị ọza ẹtẹẹtẹrẹ, dị ọ rẹẹ̄ mẹ̀ ọkarẹyị ọkatẹngụ. Ọnọọ vị ka ọọ̄ mẹ̀ ọkarẹyị ọkatẹngụụ yị aza ana sị hyẹdụ. Wàaa yịị mẹ ịrẹyị anaa vọrọ ka ọ̀ sị vayị awụ nịnị, ọ vaa vayị awụ nịnị. Ama wẹ̀ yị vavọọ mẹ nịnị, vị ọ raa dà ẹwụ nịnị kwooze bẹẹ nị. 23Aniju ẹ̀ẹ kụkụ varẹma, dị ẹyaa sị ayịị tụra Ohomorihi nị, Ohomorihi vaa và waa nọ udi ẹnịnị, agụvị ka Ohomorihi ọ zụ sị (Aniju nịnị ana sị mẹẹ anka oromi obooro, dị ọ sị) wa varẹma chire oromi obooro. 24Ẹwụ nịnị ẹnẹ ẹ̀yị vị Aniju vị ana sị mẹẹ anka avọ oromi ịnị avị avọọ. Ohomorihi ộ dà wụ nịnị ve chire oromi obooro, ana ahịka ọyị yaanị vọrọ ka ọ̀ vavọọ yà. Aniju ẹ vị ana vị avọ oromi obooro nị. Yẹ ka ẹnị ẹ vaa hụ Ohomorihi ịraa hu nị, ka ọ̀ sị wa varẹma ve chire udi ẹnịnị!
Ohomorihi vaa dọ avaba Aniju há
25Ẹwụ nịnị ẹyịnyara amị, â nyị ịrẹyị ọnya oni iruvo anị nyịnẹ oni mee sì ka wa yẹ nịnị. Wàa yẹ ịrẹyị ọnọọ nịnị, ọyị kụkụ vaa zẹẹ ka we nee roo nịnị ka wâ da yẹ ịrẹyị nịnị kẹnẹ. Ịrẹyị ọnọọ yị: Anisirẹrị ẹnyị vị ana aa mẹ ayọkatẹngụ pooro ne tù ụmẹ ọnị ịrịka Anigiriki ana aa vẹ ịda Ohomorihi ọ̀ọ sị gụ. 26#Ayị 59.20,21Ịjọnọọ dị Ohomorihi dọ avaba Anisirẹrị nịnị há. Â vịdị vavọọ chẹrẹẹ (ka Ohomorihi) ka, “Ọdọzaha ọnọọ vị ana vaa hụrẹ Ịzayọnịị vẹ. Ọ vaa kụ́ avaba ebira edivi-edivi hụụ ịda irima ezi Ijekọvụ. 27#Ayị 27.9Oto ọnị mị vee wo yị wa ọ vị ọnọọ nị, màa raà kụ́ ịvị ẹnịnị kwooze.” 28Aniju nịnị ẹyị dọ enube ọyịza, agụvị avọọ ẹnịnị ẹ sị vara ọnịvị Ohomorihi, dị ọnọọ vị ọgụ yị ẹwụ nịnị nị. Ama agụvị ka Ohomorihi ọ sị wa nyị, ẹnịnị yị vị ọta Ohomorihi agụvị ịrẹyị ohiku ẹnịnị. 29Aza oni Ohomorihi sị nyị, dị ọ raà mẹ wa ẹyịza, ọ mā sị ụmayịyẹ ịnị anị. 30Ịyẹẹyẹ, ẹwụ nịnị ẹnẹ ẹ̀yị vị Aniju vị anaā vịdịị mẹ akamawụụ hi Ohomorihi. Ama booro aanị, Ohomorihi ọ raà vayị awụ nịnị, agụvị ka Aniju ẹnị ẹ rẹ sị akamawụ mẹ. 31Aniju ẹnị raa mẹ akamawụ booro aanị, agụvị dị Ohomorihi ọnị ọ̀ rẹ vayị ẹnịnị, anka ọ mẹ̀ vayị ẹwụ nịnị. 32Ohomorihi ọ raà kụ́ avaba aza hi ịnị ẹngwa ka anakamawụ ẹ vị nị, agụvị dị ọ̀ zụ vayị avaba aza.
Ohomorihi ộ da nyị ụbanyị
33 #
Ayị 55.8
Ohomorihi ộ da nyị ụbanyị kẹnẹ! Ohomorihi ộ yẹ ịrẹyị ẹtẹẹtẹrẹ ọnị ọza ọ̀yị zụ kà. Ịsị Ohomorihi ọ̀ọ ka ọnị aa mẹ, ẹ yị nyị ọza ana zụ yẹ oze ana aa zịị mẹẹ. Ẹnẹ ka ọnị ộ yẹ oze Ohomorihi? 34#Ayị 40.13“Ẹnẹ ka ọnị ộ yẹ ịsị Ohomorihi Ananyị yị ee ro ịnị ayị anị? Ene zụ beri ọọ juwe? 35#Ijov 41.11Ẹnẹ ka ọnị ọ zụ sị ịsa yị Ohomorihi ka ọnị ọ̀ sị dọ ọ ịsa varẹma?” 36#1 Ịkọ 8.6Ọnị ọ tụ́ avaba ịsa nị. Ọnị ọ za avaba ịsa jẹẹ nị. Ọnị avaba ịsa rẹ yà yị nị. Ohomorihi aza vaa sị ụbanyịị yị pooro zịna-zịna nị. Aamị.
Цяпер абрана:
Aniroomi 11: EBTP
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Ebira First Bible © Bible Society of Nigeria, 2014.