Aniroomi 10
10
1Ẹwụ nịnị ẹyịnyara amị, maa mẹ̀ aduwa, ayị amị ee sì ọọ ẹtẹẹtẹrẹ ka ọ maa navọ Anisirẹrị nịnị ẹ̀ zụ há. 2Mâ dọ ivenu tụ́ ọọ ka ẹnịnị ee sì ka ẹnị ẹ̀ẹ hẹkẹ Ohomorihi ẹtẹẹtẹrẹ. Ama oze ẹnẹ ẹnịnị zị, ọ yị vị oze ịrẹyọyẹ. 3Ẹnịnị ẹ yị yẹ, Óhomorihi mẹmẹẹ̄ jị ịhị yị ọza. Ẹnị ee sì ka ẹnị ẹ̀ zị oze ẹ́ẹngụ ẹnịnị mẹẹ. Ẹ yị zẹẹ ka ẹnị ẹ̀ saasa oze oni Ohomorihi ọnịị̄ zịị jị ịhị yị ọza. 4Ikirisiti ọ kụ́ avaba ịrẹyị ọda Aniju nịnị vẹ ịnị ọzarẹyịrẹsụ nị. Avaba ọza ana àa kụkụ sị ayị tụra Ohomorihi kẹnẹ, dị Ohomorihi kụkụ za wa ịrịka tụ́ ịnị ọnịrẹyịzẹyịza.
Avaba aza Óhomorihi sì ka ọnị ọ̀ dọ há nị.
5 #
Ire 18.5
Àa vị ịnị ka Ohomorihi ọ̀ za ọza ịrịka tụ́ ịnị ọnịrẹyịzẹyịza, agụvị ka ộ saasa ọdaa yọ, â nyị ịsị Imosiisi vịdị kà ịnị anị. Ọ kà, “Ọza tụra ọza ana àa mẹ̀ ịsa ọnị ọda kà, ọ vaa yàra agụvị ọda ọnọọ.” 6#Ọda 30.12-14Ama ịnị ka Ohomorihi ọ̀ za ọza ịrịka tụ́ ịnị ọnịrẹyịzẹyịza, agụvị ka ộ sị ayị tụra Ikirisiti, a rẹ nyị ịsị a kà ịnị anị. A ka, “Asị u ne roo ịnị ayị awụ ka ẹnẹ vaa nọ ẹbẹẹba ịda Ohomorihi?” (Ọnọọ vị ka dị ọ̀ na sị Ikirisiti chí vẹ.) 7Asị u re ne roo ka ẹnẹ vaa vaa chíi nọ ụvẹtẹ? (Ọnọọ vị ka dị ọ̀ na sị Ikirisiti hụụnị eku jịnẹ vẹ.) 8Ama si Iwe Ohomorihi kà? Ọ kà, “Ịrẹyị Ohomorihi ọ sị gụrị ẹwụ, ọ hyakụ yà ini irenu awụ bẹẹ ọnịrị ịnị ayị awụ.” Ịrẹyị ọnọọ ọ vị ka ọza ọ̀ sị ayị tụra Ohomorihi nị. Enube ọyịza ọnị yaa kà ọ vị ọnọọ nị. 9Wàa sị irenu awụ dọ ka hịịn, Ijeesu ọ vị Ananyị yị nị, dị ụ rẹ sị ayị awụ dọ wụ́ ka Ohomorihi ộ haa kwẹẹtẹ hụụnị isu nị, Ohomorihi vaa dọ wụụ há. 10Ọza ana àa sị ayị anị tụra Ohomorihi, dị Ohomorihi zaa ịrịka tụ́ ịnị ọnịrẹyịzẹyịza. Ọza ana àa sị irenu dọ ka ọnị ộ sị ayị tụra Ohomorihi, dị Ohomorihi dọ ọ há. 11#Ayị 28.16Agụvị ka â chẹrẹẹ tụ́ ini Iwe Ohomorihi ka, “Ọza tụra ọza ana àa sị ayị tụraa, ụhị ọyị vaa nyị ọọ.” 12Wâ vị Aniju oo, wẹ yị vị Aniju oo, ẹ yị nyị irenyi ịnị anị. Ohomorihi ọ nyị avaba aza nị. Ọọ̄ vayị avaba aza ana àa hị́ ọọ ẹtẹẹtẹrẹ. 13#Ijow 2.32Ọza tụra ọza ana àa hị́ Ohomorihi Ananyị yị kẹnẹ, ọ vaa dọ ọ há nị.
Anisirẹrị nịnị eyi re kụ́
14Ama ẹ́ mẹmẹ zụ hị́ ọọ ka ọ dọ ẹnị ha ẹ̀ẹ vị ẹ sị ayị tụra a? Ẹ mẹmẹ vaa sị ayịị tụra a ẹ̀ẹ vị ẹnịnị wụ́ ini oze anị? Ẹ̀nịnị mẹmẹ vaa wụ́ ọọ ẹ́ẹ vị a nyị ọza ana kà a yị wa? 15#Ayị 52.7Ọza ọ̀ yị tụ́ ọza ka ọ̀ na kà enube ọnọọ, ọ mẹmẹ va naa kà a? Â vịdị vavọọ chẹrẹẹ tụ́ ini Iwe Ohomorihi ka, “Ọọ da zoza kẹnẹ ka aza anaā kà enube ọyịza aa vẹ.” 16#Ayị 53.1Ama ayị vị avaba ẹnịnị ẹ dọ enube ọyịza ọnọọ. Ayịsaya ộ vịdị kà a ka, “Ananyị yị, aza ẹ yị dọ enube ọyịza ọnị yaa kà, ọ!” 17Enube Ikirisiti ọyịkà ọọ̄ mẹ̀ ka aza ẹ̀ wụ́ ọọ nị. Ye si oo re aanị ka enube ọyịza ọyịwụ ọ rẹẹ̄ mẹ ka aza ẹ̀ sị ayị tụra Ijeesu nị. 18#Ahẹ 19.4Ama me ve họ̀ use ka aanị ka Aniju nịnị è yị wụ́ enube ọyịza da? Ẹnịnị ệ wụ́ ẹtẹẹtẹrẹ. Avaba anẹhẹ ẹ sị wụ́, a màa kà ịrẹyị ọnọọ. Ịrẹyị ẹnịnị ọ na sị ngụ avaba ẹhẹ. 19#Ọda 32.21Mi ree họ̀ use ka, aanị ka Anisirẹrị ẹnị ẹ yị yẹ? Imosiisi ọ hyakụ vịdị tụ́ ohi ịrẹyị ọnọnị nị. Ọ kà Ohomorihi kà, “Mị vaa mẹ ka waa kụ̀ ụhịị hi anẹkụra ẹnẹ ẹ̀ yị vị anẹkụra obooro nịnị. Mị rẹ vaa mẹ ka waa kụ́ ayịị hi anẹkụra ana vị ọnụra nịnị.” 20#Ayị 65.1Ayị Ayịsaya ọnị ộ hyakụ vị́ hu avọọ, dị ọ kà a ka Ohomorihi ka, “Aza ene è yi sì mi, e si mi re. Aza ẹnẹ ẹ̀ yị hyakụ họ̀ use amị, ma raà sị ẹngụ zụ̀ wa.” 21#Ayị 65.2Ama ini oze Anisirẹrị nịnị Ohomorihi ọ va kà a ka, “Eyinị-eyinị maa sịị tana ụvọ ka ma sị sị anakamawụ ẹnẹnị, anaā và mị ị̀karenu aanị nị.”
Цяпер абрана:
Aniroomi 10: EBTP
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Ebira First Bible © Bible Society of Nigeria, 2014.