Anigaratiya 6
6
Waa gụ ẹngụụ ụvọ nịnị!
1Ẹwụ nịnị ẹyịnyara amị, àa nyị ọza ana a za ka aa mẹ ịvị, ẹwụ nịnị ana aa mẹ ịsị Ohomorihi sì, ọ̀ tangwa sị ịrẹsụ ọkahi vọrọ ọza ọnọọ zị oze! Dụ wa sị eyi pe ẹngụ awụ, dị asị ụ zẹẹ ka ẹwụ ụvọta ọ̀ hụrẹ ne ngụ ịnị ọyịzamare! 2Wee pe ẹngụụ za ẹnya ẹngụ nịnị! Wàa vavọọ aa mẹ nịnị, waa saasa ọda Ijeesu nịnị avọọ nị. 3Àa nyị ọza ene ro ka áa nyị ịsị ọnị vị, ịnị ụmẹ ana ahịka ẹ yị nyị ịsị ọ vị, ọza ọnọọ ee vene ẹngụ anị. 4Ọzọza ọnị ụvọta ọ̀ zama ụkọrọ anị re; òo re ka óo zoza, ọ vaa jẹ agụvị ịsị ọ mẹ; ẹ yị nyị ka ọ̀ sị ụkọrọ anị pe ọ́ọza ẹnẹsa mọ ẹbẹ. 5Ọzọza ọnị ụvọta ọ vaa kà enube ẹngụ anị nị. 6Aza ana aa kọsẹ ịrẹyị Ohomorihi, ịsị ọ̀ọ nyị, ọnịrị ọza ana aa sị ịrẹyị Ohomorihi zụ̀ ọọ è dudu gàa! 7Asị u vene ẹngụ awụ nịnị! ẹ yị nyị ọza ana zụ mẹ Ohomorihi rị. Ịsa tụra ịsa ọnị ọza òo chire, ọnị ọ rẹ vaa há nị. 8Ọza ana aa mẹ̀ ịsaa yị ẹngụ anị kẹnẹ, o vee re ka vi oni vee vu ẹtẹ nị. Ama ọza ana àaa mẹ̀ ịsa agụvị Ụhwẹ Ọnịnị, Ụhwẹ Ọnịnị vaa mẹ ka ọ̀ yàra pooro zịna-zịna ị́da Ohomorihi. 9Agụvị avọọ à vẹ vị yaa mẹ ọyịza, dị asị ọ ngụ yị ẹngụ! Agụvị ka ọ̀yị ngụ yị ẹngụ, i vee re ọgụ anị ọdịrẹma. 10Agụvị avọọ ụmẹ tụra ụmẹ oni yèe re oze, à vẹ vị yaa mẹ ọyịzaa yị avaba aza, hu keekere yị aza ẹnẹ ẹyịrị dudu dọ Ijeesu Ikirisiti wụ́.
Ịrẹyị ọdịrẹma
11Wee re ịsa ẹnẹnị aanị ka ẹmị ụvọta ọ sị ụvọ amị chẹrẹ tụ́ hi wu nịnị nị! 12Aza ene ee sì ka, à kà ka à yẹ ẹnị ịnị ẹhẹ, ẹnị ẹyaa sị ụkataa za wụ nịnị ka wa jị ụvẹvẹnẹ nịnị nị. Eyi sì ka à sị ụya rị ẹnị agụvị enube isu Ikirisiti ị́rẹsụ apavahị. 13Aza ana hyakụ aa jị ụvẹvẹnẹ, ẹ mā mẹ ịsị ọda kà, ama eyee sì ka wa jị ụvẹvẹnẹ nịnị, dị ẹnị ẹ̀ sịị mẹ eyi ka wáa sị ẹngụ awụ nịnị yị wa. 14Àa vị ẹmịị yọ, ẹ yị nyị ịsị mị zụ sị mẹ eyi, àyị vị isu oni Ijeesu Ikirisiti Ananyị yị sú ị́rẹsụ apavahị. Agụvị isu anị ọnọọ, ịsa ẹhẹ ọnọnị kụkụ vị kẹnẹ-kẹnẹ yị mị, ma sị vara oku yị ẹhẹ. 15Ọza ọ̀ọ jị ụvẹvẹnẹ oo, ọza ọ̀yị jị ụvẹvẹnẹ oo, ẹ yị nyị ọ mẹ̀ kà, avaba ẹnịnị vị ọnya. Ịsị ẹ vị ịrẹyị ẹtẹẹtẹrẹ ọ vị ka Ohomorihi ọ sị yị vara ọza ọwọọwa. 16Ohomorihi ọ̀ navọ ọ̀ sị ẹngwọọrọ yị avaba aza ana aa saasa oze ọnọnị, dị ọ̀ rẹ vayị ẹnịnị; ẹnị ẹ vị Anisirẹrị obooro nị. 17Hụrẹ ajịnị na, asa a nyị ọza ene kuku zigi mi, agụvị ka apịtahụ ene hi ịnị ẹngụ amị aanị, ẹ́ẹ sị zụ̀ ka Íjeesu mị vị nị. 18Ẹyịza ọọhẹ Ananyị yị Ijeesu Ikirisiti ọ̀ va yà pe avaba awụ nịnị ẹyịnyara amị. Aamị.
Цяпер абрана:
Anigaratiya 6: EBTP
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Ebira First Bible © Bible Society of Nigeria, 2014.