Anẹhwẹsọsị 6
6
Ịrẹyị aza na ma ozi, ọnịrị ezi nịnị
1 #
Ikor 3.20
Ẹwụ nịnị ezi, waa wụ́ ịrẹyị aza na ma wụ nịnị! Ịsa ana vọrọ ini eyi Ananyị yị ọ vị ọnọọ nị. 2#Kụra 20.12; Ọda 5.16“Sị ụbanyị yị ada awụ ọnịrị ọnyị awụ!” Ọnọọ ọ vị ọda ịpaapa oni Ohomorihi kà a tụ́ ịnị anị ka ọnị vaa mẹ̀ ịsa ọyịzaa yị ọza nị. Ọ́ọ kà a ka: 3“agụvị ò zụ zoza wụ, di u we zụ kú orubo ịnị ẹhẹ.” 4#Ikor 3.21Ẹwụ nịnị ada ozi, asị ụ mẹ̀ ka ezi ewu nịnị ẹ̀ kụ́ ayị! Ama waa pá waa tụ́ ini oze Ikirisiti nịnị, dị ụ waa sị ịrẹyị Ananyị yịị zụ̀ wa nịnị.
Ozi ahụ ọnịrị ọga ẹnịnị
5 #
Ikor 3.22-25
Ẹwụ nịnị ezi ahụ, waa wụ́ ịrẹyị aza ana vị ọga awụ nịnị ịnị ẹhẹ ọnọnị! Sị ụbanyị yị wa, dị ụ wa nyị angwahi ẹnịnị! Waa sị ayị ọnyaa mẹ ụkọrọọ yị wa nịnị, anka ụ mẹ̀ yaanị mẹ yị Ikirisiti nịnị! 6Asị ụ mẹ̀ ebira omeyọza kẹnẹ nịnị, ama waa sị ayị ọnyaa mẹ̀ ụkọrọ awụ nịnị anka ezi ahụ Ikirisiti ene ee sì ka ẹnị ẹ̀ mẹ ịsị Ohomorihi sì! 7Waa sị ayohinee mẹ̀ ụkọrọ awụ nịnị, anka u wèe rere aa mẹẹ yị Ananyị yị nịnị avọọ. Tamayị ka ẹ yị vị ọza kẹnẹ ụ waa mẹẹ yị nịnị. 8Wáa yẹ nịnị ka ịsa ozoza tụra ịsa ozoza ọnị ọza ọ̀ọ mẹ, avọọ Ánanyị yị mẹ̀ rẹ vaa sị ọgụ anịị yọ nị. Òo zee eyi, ọza ọnọọ ọ̀ vị ozi ahụ, òo zee eyi, ọ̀ vị ọga ẹngụ anị. 9#Ikor 4.1; Ọda 10.17; Ikor 3.25Ẹwụ nịnị ọga, ẹwụ nịnị ọ̀ rẹ vavọọ mẹẹ hi ozi ahụ awụ nịnị, ọnị ọ vị ka asị u chire wa angwa nịnị, agụvị ka wáa yẹ ka áa nyị ọza ịnya ẹ́bẹẹba ana vị ọga ẹwụrị wa; ọnị ọ mā nyị ọza remeyi.
Ịsị Aza Ikirisiti nyẹngụ sị huna Echu
10Ịrẹyị ọdịrẹma oni mee sì ka ma kà wụ nịnị, yị: Waa dọ ụkataa hụụnị ẹngụ Ananyị yị dị ụ wa zụ nyị ụkata, agụvị ka ọnị ọ nyị avaba ụkata nị. 11Avaba ẹnya ịrẹkụ oni Ohomorihiī kụ́ụ yị ọza, kụ́ ọọ nịnị! Ọnọọ vaa mẹ ka wa zụ và eyi kà evene Echu nịnị. 12Ẹ yị vị ẹyịrị ọzarẹyịrẹsụ aa kụ̀ ịrẹkụ. Ẹyịrị ụhwẹ echu nịnị ana nyị ụkata hi ẹbẹẹba beri ohirẹsụ ẹnịnị ana nyị ụkata hi ịnị ẹhẹ ịrahụ ọnọnị aa kụ̀ ịrẹkụ nị. 13Agụvị avọọ kụ́ avaba ẹnya ịrẹkụ oni Ohomorihiī sịị yị ọza nịnị, agụvị ịhị ẹkụhị odivi ọ̀ọ vẹ, wa zụ và eyi kà ọnịvị awụ nịnị. Wàa sị ịrẹkụ kụ̀ ta nịnị, dị ahịka ụ yị jẹẹ udi awụ nịnị nị. 14#Ayị 11.5; Ayị 59.17Tenyi ẹngụ nịnị! Waa mẹ ịzẹyịza nịnị! Ọnọọ vị ana sị mẹẹ anka obo ọnị ọza sịị̄ sụ́ ọtẹ avọọ. Waa mẹ̀ ịsa ana vọrọ nịnị! Ọnọọ vị ana sị mẹẹ anka awuru enyusẹ-enyusẹ ene e siī kú ịrachị avọọ. 15#Ayị 52.7Waa kà enube ọyịza anaā sịị ẹngwọọrọ yị ọza nịnị! Ọnọọ vị ana rẹ sị mẹẹ adava anaā mẹ ka ọza ọ̀ zụ sị ahụ vaka ẹtẹ. 16Waa sị ayịị tụra Ohomorihi pooro nịnị! Ọnọọ vị ana rẹ sị mẹẹ anka ogonto ọnị ụ vaa sị dọ avaba ọpa ịra-ịra ene Echu ee ne nịnị. 17#Ayị 59.17Dọ ẹdọha oni Ohomorihiī sịị yị ọza nịnị! Ọnọọ vị ana rẹ sị mẹẹ anka amu enyusẹ-enyusẹ ene eē kú avọọ. Rẹ sị ịrẹyị Ohomorihi rị ụvọ. Ọnị vị ana rẹ sị mẹẹ anka ụhwọ ọnị. Ụhwẹ Ọnịnị sị wụ nịnị. 18Dị ụ waa mẹ̀ aduwa nịnị ụmẹ tụra ụmẹ, dị ụ waa dá ịpẹẹ yị Ohomorihi nịnị, anka Ụ́hwẹ Ọnịnị ọ̀ọ mẹ̀ sị oze zụ̀ wụ nịnị! Wee zí nịnị, asị ụ zẹẹ ka ọ̀ tụ́ wụ nịnị! Waa mẹ̀ aduwaa yị avaba aza Ohomorihi nịnị. 19Wa rẹẹ mẹ̀ aduwaa yị ẹmị nịnị bẹẹ ka, Ohomorihi ọ̀ sị ịrẹyị tụ́ mị irenu, dị ma zụụ sị ọtụtụrụma kà ịrẹyị, dị ma zụ sị zụ̀ aza ịrẹyị enube ọyịza ene eyi aza ọ̀yị há tù. 20Odeyi Ikirisiti mị vị nị, ộ tụ́ mị ka ma naa kà enube ọyịzaa yị aza nị; agụvị anị mị hyakụ yà ịnị ẹngwa booro aanị nị. Mẹ aduwa yị mị nịnị ka ma nyị ọtụtụrụma dị ma yịị kà a, anka ọ mẹ̀ vọrọ!
Ụkụ́ ọdịrẹma
21 #
Ụkọ 20.4; 2 Itim 4.12 #
Ikor 4.7,8 Ịtayịkịkọsị vị ẹnẹbẹnị ayị ini Ikirisiti, yee sì ịrẹyị anị ẹtẹẹtẹrẹ. Ayị ọnya, aa sịị mẹ ụkọrọọ yị Ananyị yị nị. Ọ vaa kà enube amịị zụ̀ wụ nịnị, dị ụ wa zụ yẹ, m mẹmẹ yà nịnị. 22Agụvị avọọ, m maa tụ́ ọọ hi wu nịnị nị, ka ọ̀ va kà a wụ nịnị, avaba ayị mẹmẹ yà hi ịzẹnị. Ọ vaa kụ́ wụ nịnị ẹngụụ nịya. 23Ohomorihi Ada ayị ọnịrị Ijeesu Ikirisiti Ananyị yị ẹ̀ sị ẹngwọọrọ yị avaba anịragụ anị, dị ẹ̀ rẹ mẹ ka ẹ̀ẹ sị ayịị tụra Ohomorihi; ọ̀ rẹ navọ ẹnịnị èe sì ịrẹyị ẹngụ! 24Ohomorihi ọ̀ mẹ ọyịza yị avaba aza ene sì ịrẹyị Ijeesu Ikirisiti Ananyị yị pooro zịna-zịna.
Цяпер абрана:
Anẹhwẹsọsị 6: EBTP
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Ebira First Bible © Bible Society of Nigeria, 2014.