1 Anịkọrịntị 15
15
Ikirisiti ộ ha kwẹẹtẹ hụụnị isu
1Ẹwụ nịnị ẹyịnyara amị, mee sì ka ma tama wụ nịnị ayị enube ọyịza ọnị mị kà wụ nịnị. Wâ dọ ọ nịnị, dị ụ rẹ jẹẹ ịnị anị nịnị nị. 2Ini oze enube ọyịza ọnọọ Ohomorihi aa yàa dọ wụ nịnịị há nị, wàa yị jẹẹ pe ịrẹyị ọnị mị vịdị kà wụ nịnị, àyị vị ahịka ụ wẹ̀ yị dọ wụ́ nịnị booro nị. 3#Ayị 53.5-12Enube ene hu keekere ọnị mị dọ, ẹ́mị rẹ sị yị ẹwụ nịnị nị. Enube ọnọọ ọ vị ka Ikirisiti ô sú agụvị ịvị ayị, anka a mẹ̀ vịdị chẹrẹ ẹ tụ́ ini Iwe Ohomorihi. 4#Ahẹ 16.8-10; Imt 12.40; Ụkọ 2.24-32Â sị ọọ tụ́ ịnị ụsị, dị a haa hụụnị isu ịhyẹgwẹta anị nị. Avọọ a mẹ̀ rẹ vịdị chẹrẹ ẹ tụ́ ini Iwe Ohomorihi nị. 5#Irk 24.34; Imt 28.16,17; Ịmk 16.14; Irk 24.36; Ịjọ 20.19Ipita ô re e, dị ẹnị ẹwụrẹva re re e nị. 6Ịrẹma ọnọọ, ọdọwụ ene vene re e ụpẹ ọnya ụpẹ ọnya, ê huna akava rị ẹchẹhị (500). Ọrụrụ-ọrụrụ aza ẹnẹẹ yi hi ẹhẹ booro aanị, ama aza ẹnyị ê wusu. 7Ịrẹma ọnọọ, dị Ijemiisi oni re re e nị, beri ezirẹma Ijeesu ana vọ nị. 8#Ụkọ 9.3-6Ọdịrẹma anị keekere, dị ẹmị re re e nị. Ẹmị vị ana sị mẹẹ anka ịrẹẹ anaa wọrọ avọọ. 9#Ụkọ 8.3Eme weyi hu keekere ịnị avaba ezirẹma Ijeesu nịnị nị. Mẹ yị hyakụ yà ọza anaa vọrọ ka àa hị́ ezirẹma Ijeesu, agụvị ka mâ sị ụya rị ịragụ Ohomorihi. 10Ayamva Ohomorihi ọ mẹ ka ma vị ẹngụ ọza ọnị mị vị ajịnị aanị nị. Ayamva ọnị ọ vayị amị ọ rẹ̀ vaa vị ọọhẹ. Ẹma hyakụ mẹ̀ ụkọrọ huna avaba ezirẹma Ijeesu ana vọ nị. Ayị vị ẹmị ụvọta ọ vavọọ zụ mẹ̀ ụkọrọ, ayamva Ohomorihi aa gụ mị ụvọ ka ma vavọọ mẹẹ nị. 11Àa vị ẹmị, ọ̀ọ daka vị ẹnị, yâ vavọọ kà ịrẹyị Ohomorihi, dị ẹwụ nịnị rẹ vavọọ dọ ọ wụ́ nị.
Ẹyị rẹ vaa haa hụụnị isu
12Ẹ̀ẹ yaa kà ịrẹyị Ohomorihi ka Ohinọyị ọnị ọ nyị ka ọ̀ dọ yị há ộ ha hụụnị isu, sị ẹ vẹ dị aza ẹnyị awụ nịnị aa kà a ka oku nịnị ẹ yị vaa haa hụụnị isu? 13Àa vị ịzẹyịza yọ nị ka oku ọ mā ha hụụnị isu, ọnị ọ rẹ vị ka Ikirisiti ọ yị ha hụụnị isu. 14Ikirisiti ọ̀ yị yaanị ha hụụnị isu, ịrẹyị Ohomorihi ọnị yaa kà yaanị vị osusu kẹnẹ-kẹnẹ, dị ahịka osusu kẹnẹ-kẹnẹ ẹwụ nịnị rẹ yaanị dọ wụ́ nị. 15Ọ̀ọ yaanị vavọọ yà, dị ahịka ireche ị yaanị ee chee kú Ohomorihi nị, agụvị ka yâ kà a ka ộ ha Ohinọyị oni Ọ nyị ka ọ̀ dọ yị há hụụnị isu, ịnị ụmẹ ana ahịka ọ yị ha a hụụnị isu; ọnọọ ọ vị ka oku nịnị ẹ yị mā ha hụụnị isu nị. 16Àa vị ka oku nịnị ẹ mā ha hụụnị isu, ọnị ọ yaanị vị ka Ohomorihi ọ yị ha Ohinọyị ọnị ọ nyị ka ọ̀ dọ yị há hụụnị isu. 17Ikirisiti ọ̀ yị yaanị ha hụụnị isu, osusu kẹnẹ-kẹnẹ ụ yaanị dọ wụ́ nịnị nị, dị ụ rẹ yaanị yà ịnị ịvị awụ nịnị. 18Ọnị ọ rẹ yaanị vị ka aza ana sị ayị tụra Ikirisiti dị e sú, ka vị ẹ ta avọọ nị. 19Àa yaanị vị ịnị ẹhẹ ọnọnị kẹnẹ ị nyị ọyịtureyi tụ́ ini nyị mẹ ohinọyị oni Ohomorihi ka ọ̀ dọ yị há nị, áayị ọyaanị divi hu keekere ịnị avaba aza nị. 20Ama ịzẹyịza ọ vị nị ka Ohomorihi ộ ha Ohinọyị ọnị Ọ nyị ka ọ̀ dọ yị há hụụnị isu. Ọnị ọ vị ọnịpaapa ịnị aza ana ahịka ẹ vaa haa hụụnị isu nị. 21Ọza ịnya chọchọchọ̀ ọ mẹ ka isu ọ̀ ngụ ịnị ẹhẹ nị. Oze ịnị ịpa ọza ịnya chọchọchọ aza rẹ va zịị ha hụụnị isu nị. 22Avaba aza vị ene ee sú agụvị ka Adamị ọ vị ohiku ayị nị. Avọọ gẹdẹ-gẹdẹ Ikirisiti mẹ̀ rẹ vaa mẹ ka aza ọnị ọnịrịị sị vị ọnya, ẹ̀ yàra nị. 23Ịsa ẹnẹnị vị ana vaa mẹẹ tù ẹngụ tù ẹngụ: Ijeesu Ohinọyị oni Ohomorihi nyị ka ọ̀ dọ yị há, ọ vịdị vaa haa hụụnị isu nị; ịnị ụmẹ ọnị ọ̀ọ vaa sị vaa vẹ ịnị ẹhẹ ọnọnị, avaba aza ana vị áanị ẹnị rẹ vaa ha hụụnị isu. 24Ịjọnọọ ọgọnị, dị ẹzẹtẹ vẹ. Ịjọnọọ Ijeesu Ohinọyị oni Ohomorihi nyị ka ọ̀ dọ yị ha raà nyị ehuna avaba ịsa ana vị ohirẹsụ nịnị ọnịrị avaba ịsa ana nyị ụkata. Dị ọ kụkụ sị ịjọva chire Ohomorihi Ada anị ụvọ. 25#Ahẹ 110.1Â nyị ka Ikirisiti, ọ̀ mẹ ohinọyị pooro ne tù ụmẹ oni Ohomorihi vaa nyị ehuna avaba ọnịvị anị, dị ọ kụ́ ahụ hi wa. 26Iswọọza ọ vị ọnịvị ọdịrẹma oni Ohomorihi vee vu ẹtẹ nị. 27#Ahẹ 8.6Â chẹrẹ ẹ ka: Ohomorihi ọ raà kụ́ avaba ịsa tụ́ ịzị aa kụ́ ahụụ hi. Ịjị ọ kà a ka ộ kụ́ avaba ịsa tụ́ ịzị aa kụ́ ahụụ hi, ọnọọ ộ sị zụ ka Ohomorihi ọ yị yà ịnị anị, agụvị ka ọnị ọ kụ́ avaba ịsa hi ịzị Ohinọyị ọnị Ọ nyị ka ọ̀ dọ yị há aa kụ́ ahụụ hi nị. 28Ịjị Ohomorihi ọ̀ọ raà kụ́ avaba ịsa chire ọza ọnị ọ nyị mẹ ohinọyị ka ọ̀ dọ yị há ụvọ, dị Ozi anị ọnị ụvọta kụkụ va sị ẹngụ anị chire Ohomorihi ụvọ, ana vịdị kụ́ avaba ịsa chire ọnị ụvọ. Dị ahịka Ohomorihi ọ kụkụ vị ohinọyị avaba anị nị. 29Si u re ro ịnị ịrẹyị ọnọnị nịnị? Â nyị aza ẹnyị ana mẹ ọyịhwenyi yị agụvị ọza ene sú. Àa vị ka oku nịnị ẹ mā yaanị ha hụụnị isu, sị ẹ vẹ dị aza ẹnẹẹ̄ kà a ka vị ẹnị aa mẹ̀ ọyịhwọzenyi agụvị aza ene sú nị? 30Sị ẹ vẹ dị ẹyị raa sị ụhwẹ ayịị mẹ aahẹ eyinị-eyinị? 31Ẹwụ nịnị ẹyịnyara amị, ẹmịrị isu ẹ yị tára ẹngụ eyinị-eyinị. Ịzẹyịza ọ vị nị, anka m maa sị wụ nịnị wo oto ka aza Ijeesu Ikirisiti Ananyị yị ụ vị nịnị nị. 32#Ayị 22.13M mẹ̀ yà Ẹhwẹsọsị, à kà a ka ẹmịrị uye ịnị avị obooro aa vụ̀ ịrẹvụ nị. Àa vị ka oku nịnị ẹ yị mā yaanị ha kwẹẹtẹ, ọgụ ịsị ọnọọ vị yị mị? Vị ị yaanị aa kà a kẹnẹ ka à vẹ yaa rị, di yee hú, dị yaa mẹrị ka, ọ yị jẹẹ di ye sú ni. 33Asị ụ zẹẹ ka è vene wu nịnị! Ogu odivi vị eneē du ebira ozozaa ha, 34Varẹma waa mẹ ịzẹyịza nịnị, asị ụ rẹ̀ mẹ̀ ebira odivi nịnị! Aza ẹnyị ẹ yị yẹ Ohomorihi vụrụ-vụrụ. M maanị aa kà a, vị ụhị ọ̀ nyị wụ nịnị.
Ọ́za mẹmẹ vaa haa hụụnị isu
35Aza ẹnyị ẹ zụ ee họ̀ use ka: Óku nịnị mẹmẹ vaa haa hụụnị isu kẹ? Ye re ẹngụ ọchẹngụ ẹnẹ kụkụ vaa sị vẹ? 36Wee re ka ọnụra ụ vị nịnị nị? Wáá yẹ ka wèe chire ịsa, ọ mā hụ, ẹ̀ yị vị ihu anị sú da? 37Ịsa oni u chire vị ihu kẹnẹ, ọ zụ vị ihu akụ, à vị ihu ịsa ọsa kẹnẹ. Ẹ yị vị ọchị ana sị hụ ta, uū chire. 38Ama Ohomorihiī sị ẹngụ oni òo sì yị ihu oni u chire. Ihu ọzọza vị ana nyị ẹngụ anị. 39Ọchẹngụ avaba ịsa ẹ yị vị ọnyọọnya. Ọchẹngụ ọza vị irenyi, úuye vị irenyi, íinomi rẹ vị irenyi, di íivovo ẹnị rẹ vị irenyi nị. 40Ọchẹngụ ịsa ene hi ẹbẹẹba vị irenyi, dị ọchẹngụ ịsa ẹhẹ ẹnị rẹ vị irenyi nị. Â nyị uzoza ịsa ẹbẹẹba, dị a rẹ nyị uzoza ịsa ẹhẹ irenyi nị. 41Ọyị ộ nyị uzoza anị, dị ụhwẹ ọnị rẹ nyị uzoza anị, dị ụzọmị nịnị ẹnị rẹ nyị uzoza ẹnịnị nị. Ịnị ụzọmị nịnị, ọzọza vị ana hyakụ rẹ nyị uzoza anị irenyi-irenyi. 42Avọọ ọ mẹ̀ rẹ yà, ịhị oku nịnị ẹ̀ẹ ha hụụnị isu nị. Èene ne ọza, vị ọ sị mẹẹ anka ihu ene eē chire dị ọ vụ̀ avọọ nị. Ama ịhị Ohomorihi ọ̀ọ sị ọ ha hụụnị isu, o mē vene kuku sú pooro zịna-zịna. 43Oku ene e ne ne, ọ yị nyị ụbanyị, dị ẹ̀ yị rẹ nyị ụkata nị. Ama ịhị ọ̀ọ sị ha, ọ vaa nyị ụbanyị, dị ọ rẹ nyị ụkata. 44Ịjị ee nee ne oku, ọchẹngụ ịnị ẹhẹ ọnọnị kẹnẹ ọ nyị nị; ama ịjị ọ̀ọ sị ha hụụnị isu, dị ọ sị vara ọza ana nyị ọchẹngụ ịdị Ohomorihi. A mẹ̀ nyị ọchẹngụ ẹhẹ ọnọnị, avọọ a mẹ̀ rẹ nyị ọchẹngụ ịdị Ohomorihi nị. 45#Oyn 2.7Â vịdị chẹrẹ ẹ tụ́ ini Iwe Ohomorihi ka; Ohomorihi ộ mẹ̀ Adamị ana vị ọza ịpaapa ka ọ̀ vị ọza ana yára. Ama Adamị ọdịrẹma vị ana hụụ ịdị Ohomorihi vẹ, ọnị ọọ̄ mẹ̀ ka ọza ọ̀ yàra nị. 46Ẹ yị vị ịsa ana vị ị sa ịdị Ohomorihi ọ vịdị vẹ. Ịsa ana vị ịsa ẹhẹ ọnọnị kẹnẹ ọ vịdị vẹ nị. Ịrẹma anị dị ịsa ana vị ịsa ịdị Ohomorihi vavẹ nị. 47Eteesu asị mẹ ọnịpaapa nị, ama ọnụpọhụva ọnị vị ana hụrẹ ẹbẹẹba vẹ. 48Anẹhẹ ọnọnị vị ana yà anka ọza ana a sị eteesu mẹ avọọ. Ama aza ene hi ẹbẹẹba vị ana yà anka ọza ana hụrẹ ẹbẹẹba vẹ. 49Booro aanị, vị ị véné ọza ana sị eteesu mẹ nị. Ẹkụhị ọnya i re vee véné ọza ana hụrẹ ẹbẹẹba vẹ. 50Ẹwụ nịnị ẹyịnyara amị ịsị maa kà yị ka, ọzarẹyịrẹsụ kẹnẹ ọ yị zụ ngụ ịzị Ohomorihi yà aa mẹ ịjọva. Ịsa eneē du, ọ yị zụ nyị ịsa ene è yi me du pooro zịna-zịna. 51#1 Ịtẹ 4.15-17Sị ụtọ pe ẹtẹ, dị ma kà ịsa ọnya ana nyịnẹ wụ nịnị! Avaba ayị o yi vee sú; ama a vaa vara avaba ayị ẹngụ 52ịnị ụmẹ keere aanị, dị ọza ọ̀ naa jị eyi. Ịhị ọpanyị ọdịrẹma ọ̀ọ sụ́, ọ vavọọ vaa yà nị. Ọpanyị ọ̀ọ vavọọ sụ́ kẹnẹ, dị a ha avaba oku nịnị hụụnị isu, dị ẹ nyị ọchẹngụ ene è yi kuku zụ du pooro zịna-zịna. Avọọ Óhomorihi mẹ vaa vara avaba ayị ẹngụ nị. 53Â nyị ka a vara ọchẹngụ ayị ọnọnị, ana hi ka oō du aanị tụ́ ịnị ọchẹngụ ene è yi me vene sú pooro zịna-zịna. 54#Ayị 25.8Ọchẹngụ ayị eneē du, dị oō sú aanị, ịhị àa vara a ọchẹngụ ene è yi me vene du, di ò sú, ịrẹyị ana a vịdị chẹrẹ tụ́ ini Iwe Ohomorihi vaa sẹ ịhị ọnọọ. Ịrẹyị ọnọọ ka: Ohomorihi ọ sị ụkata iswọọza gara, ọ raà nyị ehuna anị saka-saka.
55 #
Iho 13.14
Ẹwụ iswọọza, ịzị ehuna awụ yà?
Ẹwụ iswọọza, wáá kụkụ zụ tụ ọza ụnava?
56Ịvị ọọ̄ mẹ̀ ka iswọọza ọ̀ọ tụ̀ ọza ụnava nị. Ọda ọ rẹ mẹ ka ịvị ọnị ọ̀ rẹ nyị ụkata nị. 57Ama yâ kụ́ Ohomorihi avọọ, ana mẹ ka ya nyị ehuna ini oze Ijeesu Ananyị yị ọnị ọ nyị mẹ ohinọyị ka ọ̀ dọ yị ha. 58Ẹwụ nịnị ẹyịnyara amị, re ka wa hụ agụvị avọọ jẹẹ geri-geri nịnị, asị ụ zizi! Waa sị avaba ụmẹẹ mẹ ụkọrọọ yị Ananyị yị nịnị pooro, agụvị ka wâ yẹ nịnị ka ẹ yị nyị ịsị ụ mẹ yị Ananyị yị nịnị ana zụ vị ọọhẹ kẹnẹ.
Цяпер абрана:
1 Anịkọrịntị 15: EBTP
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Ebira First Bible © Bible Society of Nigeria, 2014.