1 Anịkọrịntị 14
14
Ụhwẹ Ohomorihi ọ̀ọ sị ụkata wụ, sị mẹ ịsị ẹ vọrọ
1Re ka wee sì ịrẹyị ọza nịnị! Re re ka waa sị ayị tụ́ ịnị ka Ụhwẹ Ohomorihi ọ̀ sị ụkata wụ nịnị ka wa zụụ mẹ̀ ịsa irenyi-irenyi nịnị. Hu keekere, wee sì ka wa zụụ kà ịsẹ nịnị. 2Ọza ọnị Ụhwẹ Ohomorihi sị ụkata yị ka ọ̀ọ kà ẹkụra ọsa vị ana aa kà ịrẹyị yị Ohomorihi. Ẹ yị vị aza aa kà ịrẹyịị yị, agụvị ka ẹ yị nyị ọza ana wụ́ ẹkụra ana aa kà. Ịrẹyị ana nyịnẹ Ụ́hwẹ Ohomorihi sị ụkata yọ ka ọ̀ọ kà nị. 3Ama ọza ana aa kà ịsẹ vị ana aa kà ịrẹyịị yị aza. Ịrẹyị anị aa gụ aza ụvọ, ọ raa mẹ ka ayị aza ẹ̀ vị, dị èe hunẹnẹ wa ayị. 4Ama ọza ana aa sị ẹkụra ọsaa kà ịrẹyị, ẹngụ anị kẹnẹ aa gụ ụvọ nị. Ọza ana aa kà ịsẹ ọnị vị ana aa gụ avaba ịragụ Ohomorihi ụvọ. 5Mị yaanị sì ka avaba awụ nịnị ọ̀ọ sị ẹkụra ọsaa kà ịrẹyị. Ama ịsị mi sì hu ọ vị ka waa kà ịsẹ nịnị nị, ọza ana aa kà ịsẹ o huna ọza ana aa sị ẹkụra ọsaa kà ịrẹyị nị; ẹ̀ yị vị o huhu re ọza ana vaa kà iruvo anịị yị aza, dị ịrẹyị ẹnẹẹ ẹ̀ zụ gụ avaba ịragụ Ohomorihii ụvọ. 6Ẹwụ nịnị ẹyịnyara amị, à kà a ka maa vẹ ịdị awụ nịnị, dị maa sị ẹkụra ọsaa kà ịrẹyị. Máá zụ gụ wụ nịnị ụvọ? Ẹ̀ yị vị mị kà a wụ nịnị ịsị Ohomorihi sị zụ mị; ẹ̀ yị vị mị rẹ mẹ ka wa zụ yẹ ịsa Ohomorihi nịnị, à vị ka dị ma kà ịsẹ, à vị ka dị ma rẹ sị ịrẹyị Ohomorihi zụ wụ nịnị, máá zụ gụ wụ nịnị ụvọ? 7Hyakụ sị ịrẹyị ịsa ene ee hú, ẹnẹ ẹ̀ yị nyị ụhwẹ, anka ọpanyị, à vị igita avọọ zama a re nịnị! Ịrẹyị anị ẹ̀ yị tụ́ ẹhẹ, ọza mẹmẹ vaa yẹ ahẹ ana aa jị? 8Ọpanyị àaa sụ́, dị ọza ẹ̀ yị yẹ ịsa aa kà nị, ene vee tenyi ẹngụ ịrẹkụ? 9Avọọ ẹwụ nịnị mẹ rẹ yà nị. Wẹ̀ yị kà ẹkụra ọnị ọza aa wụ́ nịnị, a mẹmẹ vaa yẹ ịsị ụ kà nịnị? Ọ̀ọ vavọọ yà, ịrẹyị awụ nịnị vị ana aa taa hi ịnị ahị kẹnẹ. 10Ẹkụra irenyi-irenyi ene hi ịnị ẹhẹ, ệ rụrụ. Ama ẹ yị nyị ẹnẹ ẹ̀ yị nyị iruvo ịnị ẹnịnị. 11Mẹ̀ yị wụ́ ẹkụra ọnị ọza aa kà, ọza ana aa kà a vị ọzọga yị mị, dị ẹmị rẹ vị ọzọga yị ọza ọnọọ nị. 12U mèe sì ka Ụhwẹ Ohomorihi ọ̀ sị ụkata wụ nịnị, ana a vọrọ ka wee sìi hu nịnị ọ vị ana vaa gụ ịragụ Ohomorihi ụvọ nị. 13Agụvị avọọ, ọza ana aa sị ẹkụra ọsaa kà ịrẹyị, ọ̀ mẹ̀ aduwa ka ọnị ọ̀ rẹ zụụ kà iruvo anị. 14Màaa sị ẹkụra ọsaa mẹ̀ aduwa, ayị amị aa mẹ̀ aduwa ịzẹyịza, ama mẹ yị sị ịrẹyọyẹ amị mẹ̀ ụkọrọ. 15Ịjọnọọ sị a vọrọ ka ma mẹ? Mee sì ka maa mẹ̀ aduwa ịnị ụkata Ụhwẹ Ohomorihi, dị ma rẹẹ sị ịrẹyọyẹ amịị mẹ̀ aduwa. Mi ree sì ka maa sị ụkata Ụhwẹ Ohomorihi jị ahẹ, dị mị raa sị ịrẹyọyẹ amịị jị ahẹ. 16È yị vị avọọ, wàaa sị ụkata Ụhwẹ Ohomorihi ga Ohomorihi, aza ẹnẹ ẹ̀ yị wụ́ ẹkụra ọnị ụ waa kà, mẹmẹ zụ kà a ka, “Aamị” tụ́ ịnị ụga ọnị ụ waa sịị yị Ohomorihi? Wâ yẹ ka ọ yị wụ́ ịsị ụ waa kà. 17Ọ̀ọ daka vị ka wàa aa ga Ohomorihi ẹtẹẹtẹrẹ, ama ọ yị gụ ọza ẹnẹsa ụvọ. 18Mâ kụ́ Ohomorihi avọ ka ẹmị aa sị ẹkụra ọsaa kà ịrẹyị huna avaba awụ nịnị ana vọ nị. 19Ama màa yà ịnị ịragụ Ohomorihi, miī sì ka àa vị ịrẹyị ọchị ẹẹhị kẹnẹ mị kà nị, ma sị ịrẹyọyẹ amị kà a, agụvị ma zụ zụ̀ aza ịsa. Ọnọọ ọ dahi hu ka maa sị ẹkụra ọsaa kà ịrẹyị gigirigii hi ẹtẹ nị. 20Ẹwụ nịnị ẹyịnyara amị, asị u rè ro ịrẹyị anka ezweyi nịnị! Re ka wee ro ịrẹyị anka ọza ana sị vịra! Wâ yẹ ka ezweyi ẹ mā mẹ̀ ịsa odivi; ẹwụ nịnị ọ̀ rẹ vavọọ yà anka ezweyi! 21#Ayị 28.11,12Â chẹrẹẹ tụ́ ini Iwe Ohomorihi ka, “Ohomorihi ka ọnị vaa sị anẹkụra ọsa kà ịrẹyịị yị anẹkụra ọnọnị. Anẹkụra ọzọga ọ́nị vaa sị kà ịrẹyịị yị wa nị. Ọ kà ọnị ọ̀ọ vavọọ yị mẹ, aza anị ẹ yị vaa zẹẹ ka ẹnị ẹ̀ wụ́ ịrẹyị anị.” 22Wee re aanị ka ẹkụra ọsa ọyịsị kà ịrẹyị vị apọtẹrẹwa yị aza ẹnẹ ẹ̀ yị dọ wụ́, ẹ yị vị yị ọdọwụ. Ama ọza ọnị àa kà ịsẹ, ọdọwụ aa sịị gụ ụvọ nị, ọ yị sị gụ aza ẹnẹ ẹ̀ yị dọ wụ́ ụvọ. 23À kà a ka avaba anịragụ Ohomorihi ẹ sị gụ, dị ọzọza kwẹẹtẹ aa sị ẹkụra ọsaa kà ịrẹyị. Aza ẹnẹ ẹ̀ yị yẹ ịsa ẹnẹẹ, àa vị aza ẹnẹ ẹ̀ yị dọ wụ́, ẹ̀ẹ rẹ vẹ ịzọọ, wéé ro ka ayị vị ẹyaa kà a ka u wee che uvu nịnị nị? 24Ama avaba aza àaa kà ịsẹ, dị ọza ẹnẹ ẹ̀ yị yẹ ịsa ẹnẹẹ, àa vị aza ẹnẹ ẹ̀ yị dọ wụ́, vavọọ vẹ ịzọọ nị, ịrẹyị ọnị ọ wụ́ vaa mẹ ka ayị anị ọ̀ jị ịvị yọ ịnị ịsa odivi ọnị ọ mẹ. Avaba ịrẹyị ọnị ọ wụ́ vaa mẹ̀ ọkarẹyị yọ. 25Ịsa ene ee ro ịnị ayị anị vaa tụ́ ẹhẹ, dị ọ và ku ẹtẹ, dị ọ sị ụbanyị yị Ohomorihi. Dị ọ dọ irenu ka hịịn, ịzẹyịza Ohomorihi yà ịnị akakana awụ nịnị.
Ẹ́ yị vọrọ ka à nyị ezigi ịnị ịragụ Ohomorihi
26Ẹwụ nịnị ẹyịnyara amị, wáá yẹ ịsị mee sì ka ma kà wụ nịnị? Wàa va sị gụ nịnị, aza ẹnyị ẹ̀ẹ jị ahẹ, dị ọsa ọ̀ọ zụ̀ aza ịsa! Aza ẹnyị ẹ̀ẹ kà a yị aza ana vọ ịsị Ohomorihi sị zụ̀ wa! Aza ẹnyị ẹ̀ rẹẹ sị ẹkụra ọsaa kà ịrẹyị, dị aza ẹnyị ẹ̀ rẹẹ kà iruvo anị. Re ka avaba ịsị àaa mẹ, aa gụ anịragụụ ụvọ! 27Aza ẹ̀ẹ vaa sị ẹkụra ọsaa kà ịrẹyị, ẹ̀ vị ẹhụụ ẹẹva avọọ, ama asị e huna ẹẹta! Ẹ̀ẹ kà a tù ẹngụ tù ẹngụ, dị ọza ẹnẹsa ọ̀ọ kà iruvo ịrẹyị ẹnẹ ẹ kà! 28Ẹ̀ yị nyị ọza ana zụ kà iruvo anị ịzọọ, aza ẹnẹẹ ẹ̀ sị irenu ẹnịnị kú oku ịnị ịragụ Ohomorihi! Ẹnịnị ẹẹ kà ịrẹyị yị ẹngụ ẹnịnị ọnịrị Ohomorihi ịnya kẹnẹ! 29Ẹhụụ aza ẹnị ẹẹva na ngụ ẹẹta avọọ ẹ zụ aa kà ịsẹ, dị aza ana vọ ẹ̀ẹ zama ịrẹyị ẹnẹ ẹ kà re! 30Àa nyị ọza ẹnẹsa ana yaayịtẹ ịzọọ oni Ohomorihi sị ịrẹyị zụ̀, ọza ana vịdị aa kà ịrẹyị ịsọọnị ò kú irenu! 31Avaba awụ nịnị ọ zụ aa kà ịrẹyị Ohomorihii tù ẹngụ tù ẹngụ, agụvị avaba awụ nịnị ọ̀ zụ kọsẹ, dị ụ wa rẹ nyị ọtụtụrụma nịnị! 32Ọza ana nyị ụkata ọyịkà ịrẹyị Ohomorihi, ọ̀ zụ sị ụvọ za ẹngụ anị! 33Ẹ yị vị Ohomorihi ọọ̄ mẹ̀ ka aza ẹ̀ẹ mẹ jugu-jugu. Ịsa ẹngwọọrọ Óhomorihiī sì ka yaa mẹ nị.
Ịnị avaba ịragụ aza Ohomorihi, 34àa sị gụ, anyẹnẹẹ èe kú oku irenu. Ọza ọ yị sị oze yị wa ka ẹ̀ẹ kà ịrẹyị. Ama ẹnịnị ẹ̀ kà ẹngụ ẹnịnị chí, anka ọ́da Ohomorihi mẹ̀ rẹ kà a. 35Èe sì ka à nyị ịsị ẹnị yẹ, ẹ̀ họ̀ ọva ẹnịnị use ini eehi! Ịrẹyị ụhị ọ vị nị ka anyẹnẹẹ ẹ̀ẹ kà ịrẹyị ịnị ịragụ Ohomorihi nị. 36Ho! Ẹwụ nịnị ị́rẹyị Ohomorihi wáá hụụ ịdị anị vẹ nị, à vị ka ịdị awụ nịnị kẹnẹ o tù nị? 37Ọza ene èe ro ka ọnịsẹ ọ́nị vị nị, à vị ka Ụhwẹ Ohomorihi ộ sị ụkata yị ọnị, â nyị ka ọ̀ dọ ka ịsị maa chẹrẹẹ tụ́ụ hi wu nịnị aanị ka ọda Ananyị yị ọ vị nị. 38Ọza ana àa ka ọnị ọ yị yẹ ịrẹyị ọnọnị, asị ọ yẹ! 39Ẹwụ nịnị ẹyịnyara amị, wee sì ka waa kà ịsẹ nịnị! Ama asị ụ kà a ka asị ọza rẹ̀ sị ẹkụra ọsa kà ịrẹyị nịnị! 40Waa mẹ avaba ịsa nịnị ini oze ana vọrọ, dị asị ọ nyị ezigi!
Цяпер абрана:
1 Anịkọrịntị 14: EBTP
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Ebira First Bible © Bible Society of Nigeria, 2014.