1 Anịkọrịntị 12
12
Ẹyịza ọnị Ụhwẹ Ohomorihi sị yị ọdọwụ nịnị
1Ẹwụ nịnị ẹyịnyara amị, mi ree sì ka ma kà nọ ini oze ụkata ọnị Ụhwẹ Ohomorihi sịị yị. Mee sì ka wa yẹ ini oze ịrẹyị ẹnẹẹ nịnị ẹtẹẹtẹrẹ. 2Wâ yẹ ka ịnị ụmẹ ọnị ụ vị anarịmadọwụ nịnị, â kụ́ wụ nịnị nyeeyi zị oze irenyi-irenyi na ngụ ịdị ori ẹnẹnị ẹnẹ ẹ̀ yị nyị ụhwẹ. 3Mee sì ka wa yẹ nịnị ka ẹ yị nyị ọza ọnị Ụhwẹ Ohomorihi aa sị oze zụ̀ ana zụ kà a yị Ijeesu ka o du oo kù. Ẹ̀ yị rẹ vị ọza ọnị Ụhwẹ Ohomorihi aa si oze zụ̀, ọ yị zụ kà a ka Ijeesu ọ vị Ananyị yị nị. 4#Iro 12.6-8Ụkata ọnị Ụhwẹ Ohomorihi sịị yị ọdọwụ nịnị vị irenyi-renyi. Ama Ụhwẹ Ohomorihi ọnyọọnya ọ yị sị wa yị ọzọza nị. 5Ụkọrọ irenyi-irenyi aa mẹẹ yị Ananyị yị nị, ama Ananyị yị vị ọnya. 6Ohomorihiī mẹ̀ ụkọrọ ịnị ẹngụ ọdọwụ nịnị ini oze irenyi-renyi, ama Ohomorihi ọnyọọnya aa yịị mẹ̀ ẹ ịnị ẹngụ avaba ẹnịnị nị. 7Ụhwẹ Ohomorihiī sị ẹngụ anịị zụ̀ ịnị ẹngụ ọzọza, agụvị dị ọzọza ọ̀ zụ sịị gụ avaba aza ụvọ. 8Ụhwẹ Ohomorihi sị ịrẹyị ịrẹyọyẹẹ yị aza ẹnyị, dị ọnị ọnyọọnya rẹ mẹ ka aza ẹnyị ẹ̀ yẹ ịsa nị. 9Ụhwẹ Ohomorihi ọnọọ ọ rẹ yị mẹ ka aza ẹnyị ẹ̀ sị ayị tụra Ijeesu ẹtẹẹtẹrẹ, dị ọ rẹ mẹ ka aza ẹnyị ẹ̀ zụụ̄ mẹ aza ụkụ. 10Ụhwẹ Ohomorihi ọnọọ ọ rẹẹ̄ mẹ ka aza ẹnyị ẹ̀ẹ mẹ̀ ụkọrọ ohyozirenu, dị ọ rẹ mẹ ka aza ẹnyị ẹnị ẹ̀ẹ kà ịsẹ. Ọ rẹẹ̄ mẹ ka aza ẹnyị ẹ̀ẹ yẹ ụkata ana àa hụụnị ụvọ Ụhwẹ Ohomorihi vẹ ọnịrị ẹnẹ ẹ̀ yị hụụnị ụvọ anị vẹ. Ọ rẹẹ̄ mẹ ka aza ẹnyị ẹ̀ zụụ kà ẹkụra irenyi-renyi, dị ọ rẹ mẹ ka aza ẹnyị ẹnị ẹ̀ zụụ̄ kà iruvo ẹkụra ẹnẹẹ nị. 11Ụhwẹ Ohomorihi ọnya chọchọchọ̀ ọ vavọọ aa yịị mẹ̀ ịsa ẹnẹẹ nị. Ộ sị ụkata irenyi-renyii yị ọzọza, anka o mè sì ọọ.
Ẹngụ ọza vị ọnya, ama ọchẹngụ ọza ộ rụrụ
12 #
Iro 12.4,5 Wâ yẹ ka ẹngụ ọza vị ọnya, dị ọ va nyị ọchẹngụ ọrụrụ-ọrụrụ nị. Avaba ọchẹngụ ọrụrụ-ọrụrụ ẹnẹẹ vị ana yà ịnị ẹngụ ọnya. Avọọ gẹdẹ-gẹdẹ Ikirisiti ọnị mẹ̀ rẹ yà nị. 13Yàa vị Aniju, yẹ̀ yị vị Aniju, yàa vị ọrịhị, yàa vị ozi; avaba ayị ọ sị vị ẹngụ ọnya, a mẹ̀ sị Ụhwẹ Ohomorihi mẹ̀ ọyịhwọzenyi yị. Ụhwẹ Ohomorihi ọnọọ ọnyọọnya ọ yà ịnị ayị avaba ayị nị. 14Avaba ẹngụ ọza ọ yị vị ọyịvụrụ ọnya kẹnẹ. Ộ nyị ọchẹngụ rụrụ. 15Ahụ ọ̀ọ kà a ka ọnị ọ yị vị ụvọ, agụvị avọọ ẹ yị vị ịnị ẹngụ ọnị yà, ọ́ọ́ zụ sị ọọ hụụnị ẹngụ ịzẹyịza? 16Ụtọ ọnị ọ̀ọ rẹ kà a ka ọnị ọ yị vị eyi, agụvị avọọ ẹ yị vị ịnị ẹngụ ọnị yà, ọ́ọ́ zụ sị ọọ hụụnị ẹngụ ịzẹyịza? 17Avaba ẹngụ ọza ọ̀ọ vị eyi, sị a kụkụ aa sịị wụ́ ịrẹyị? Avaba ẹngụ ọza ọ̀ọ rẹ va vị ụtọ, sị a kụkụ aa sịị wụ́ agụ? 18Ama Ohomorihi ọ raà sị avaba ọchẹngụ tụ́ ịnị ẹngụ ọza anka ịzị e zée eyi ka ẹ̀ yà. 19Ẹ yị yaanị nyị ẹngụ àa vị ọyịvụrụ ọnya kẹnẹ avaba ẹngụ ọza yaanị vị nị. 20Ama ọchẹngụ ộ rụrụ, ẹngụ yị vị ikonya. 21Agụvị avọọ eyi ọ yị zụ kà a yị ụvọ ka ẹ yị nyị ịsị ọnị aa sị ọọ mẹ. Avọọ, ịrẹsụ ọnị ọyị rẹ zụ kà a yị ahụ ka ẹ yị nyị ịsị ọnị aa sị ọọ mẹ. 22Ama ọchẹngụ ẹyị ọnị ị ka ẹnị ẹ hyakụ kụmị hu nị, ẹnị ẹ vị ịsa okuku yị yị nị. 23Ọchẹngụ ayị oni i ro ka ẹ yị vị okuku, ẹnị ị yaa tẹsị anịị hu nị. Ọchẹngụ ayị ọnị yè yị sì ka ọza ò re, ẹnị ị sị eyii pee hu nị. 24Yẹ yị hyakụ vavọọ sị eyi pe ọchẹngụ ayị ene zoza. Ohomorihi ọnị ụvọta ộ vavọọ raà kụ́ ọchẹngụ gẹ, ana ahịka ọ raà sị ụbanyị yị ẹnẹ ẹ̀ yị yaanị nyị ụbanyị. 25Ohomorihi ộ vavọọ mẹẹ, agụvị asị ẹngụ ọza zụ gà hi, ama dị ọchẹngụ ẹnyị ọ̀ọ tẹsị ọsa. 26Ọchẹngụ ọnya àaa rị ụya, avaba ana vọ e ree beri ọọ rị ụya nị. Àa sị ụbanyị yị ọnya, avaba ana vọ ee pee jẹ nị. 27Agụvị avọọ avaba awụ nịnị vị ẹngụ Ikirisiti, ọzọza yà ịnị ẹngụ ọnọọ. 28#Ẹhw 4.11Ohomorihi ọ raà sị ọzọza tụ́ udi anị ịnị ịragụ anị. Udi ịpaapa, áa nyị Ezirẹma Ijeesu nịnị; udi ụpọhụva, áa nyị ọnịsẹ nịnị. Udi ụpọhụta, dị a rẹ nyị ọzwọzịsa nịnị nị. Dị a kụkụ va nyị aza ana aa mẹ̀ ụkọrọ ohyozirenu nị, dị a rẹ nyị aza anaa sị ụkata yị ka ẹ̀ẹ mẹ aza ụkụ, dị ẹ̀ẹ gụ aza ụvọ nị. Dị aza ẹnyị ẹnị aa sị oze zụ̀ aza; dị aza ẹnyị raa sị ẹkụra ọsaa kà ịrẹyị nị. 29Avaba ẹnịnị ẹ yị vị Ezirẹma Ijeesu, à vị ọnịsẹ ọnịrị ọzwọzịsa nịnị. Ẹ yị rẹ vị avaba ẹnịnị ẹ nyị ụkata ẹnẹ ẹ zụ sị mẹ̀ ụkọrọ ohyozirenu. 30Ẹ yị vị avaba ẹnịnị ẹ zụ mẹ aza ụkụ, à vị ka dị ẹ̀ẹ sị ẹkụra ọsaa kà ịrẹyị. Avaba ẹnịnị ẹ yị rẹ zụ kà iruvo ịrẹyị ọnị ọza ọ̀ọ sị ẹkụra ọsa kà. 31Wee sì ụkata ana ahịka ọza ọ zụ sị mẹ̀ ịsa ene hu keekere nịnị! Oze ene hu keekere m maa vaa sịị zụ̀ wụ aanị nị.
Цяпер абрана:
1 Anịkọrịntị 12: EBTP
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Ebira First Bible © Bible Society of Nigeria, 2014.