1 Anịkọrịntị 11
11
A mẹ vọrọ ka anẹẹ ẹẹ̄ kụ́ ẹnya ịnị ịragụ Ohomorihi
1 #
1 Ịkọ 4.16; Ihwi 3.17 Waa hama mị nịnị, anka m màa hama Ikirisiti. 2Mâ yẹ ka waa tamayị amị nịnị ini oze tụra oze. Wâ mẹẹ ẹtẹẹrẹ nịnị. Waa yịị saasa ịsa ọnị mị raà sị zụ̀ wụ nịnị. 3Ama mee sì ka wa yẹ nịnị ka Ikirisiti ọ vị ohirẹsụ ọnọrụ nịnị nị. Ọva ọnẹẹ ọ vị ohirẹsụ ọnẹẹ nị. Ohomorihi ọ vị ohirẹsụ Ikirisiti nị. 4Ọnọrụ ana àaa mẹ̀ aduwa, à vị ka dị aa kà ịsẹ, dị ọ sị ịsa kú ịrẹsụ anị nị, ọ yị sị ụbanyị yị ohirẹsụ anị. 5Ama àa vị anyẹnẹẹ yọ, ọnẹẹ ana àaa mẹ̀ aduwa, à vị ka dị aa kà ịsẹ, dị ọ hụ ịrẹsụ anị ha nị, ọ yị sị ụbanyị yị ohirẹsụ anị. Ọ̀ọ vavọọ hụ ịrẹsụ anị ha, vị ọ rẹ yị sị mẹẹ ka vị ọ kụ́ ịrẹsụ anị avọọ nị. 6Ọnẹẹ ẹnẹ ẹ̀ yị zẹẹ ka ọnị ọ̀ sị ịsa kú ịrẹsụ, sị ẹ vẹ dị ọ̀ọ mā kụkụ kụ́ ịrẹsụ anị? Yâ yẹ ka ịrẹyị ụhị ọ vị nị ka ọnẹẹ ọ̀ọ kụ́ ịrẹsụ nị; agụvị avọọ a rẹ vọrọ ka anẹẹ ọ̀ọ sị ịsaa kụ́ ịrẹsụ ẹnịnị nị! 7#Oyn 1.26,27Ama ayị vọrọ ka ọnọrụ ọ̀ sị ịsa kú ịrẹsụ anị, agụvị ka ọnọrụ vị ene véné Ohomorihi, dị ọ raa sịị zụ̀, Óhomorihi mẹmẹ nyị ụbanyị. Ama ọnẹẹ ọnị vị ana aa sịị zụ̀, ọ́va anị mẹmẹ nyị ụbanyị. 8#Oyn 2.18-23Ayị vị ẹchụkụ ọnẹẹ Óhomorihi sị mẹ ọnọrụ, ama ẹchụkụ ọnọrụ Óhomorihi vana sị mẹ ọnẹẹ nị. 9Ohomorihi ọ yị mẹ ọnọrụ yị ọnẹẹ, ọnẹẹ ọ vana mẹ yị ọnọrụ nị. 10Agụvị avọọ, agụvị anggẹẹrị nịnị ọ sị vọrọ ka ọnẹẹ ọ̀ọ sị ịsaa kú ịrẹsụ anị (dị ọ̀ sị zụ̀ ka â nyị ọza ana nyị ọda tụ́ ịrẹsụ anị) nị. 11Ini eyi Ananyị yị, ẹ̀ yị nyị ọnọrụ, ẹ yị zụ nyị ọnẹẹ; ẹ̀ yị rẹ nyị ọnẹẹ, ẹ yị zụ nyị ọnọrụ. 12Ẹchụkụ ọnọrụ Óhomorihi vịdị sị mẹ ọnẹẹ nị, ama ọnẹẹ ọ kụkụ aa ma ọnọrụ booro aanị nị. Ohomorihi ọ tụ́ avaba ịsa nị. 13Ẹwụ nịnị ụvọta ọ̀ daka zama a re di a re: ọ́ọ́ vọrọ ka ọnẹẹ ọ̀ọ mẹ̀ aduwaa hi Ohomorihi dị ọ̀ hụ ịrẹsụ anị ha? 14Aanịka ayị awụ nịnị ọ yị daka kà a wụ nịnị ka ọnọrụ ọ̀ọ navọ ịrẹsụ anị, dị ọ̀yị mā kụ́ ọọ nị, ka ụhị ọ vị yọ nị? 15Ama ọnẹẹ ọ̀ọ nyị ẹyị ọgọdọ, ụbanyị ọ vị yọ nị. Ohomorihi vị ana sị ẹyịị yọ ka ò si kú. 16Á nyị ọza ana àa ka ọnị ẹ yị dọ ịrẹyị ẹnẹnị, ọ̀ yẹ ka yẹ mā vavọọ mẹ, anịragụ Ohomorihi ana vọ ẹ mā rẹ vavọọ mẹ.
Ịsa ọyịrị Ananyị yị
(Imt 26.26-29; Ịmk 14.22-25; Irk 22.14-20)
17A rẹ nyị ịrẹyị ọsa oni mee sì ka ma kà wụ nịnị. Mẹ yị zụ ga wụ nịnị ịnị ịrẹyị ọnọọ. Wàa kụ́ gụ nịnị, ebira odivi ọnị ụ waa mẹ nịnị o si huna ozoza ọnị ụụ̄ mẹ nịnị. 18Ịpaapa da, mâ wụ́ ọọ ka wàa sị kụ́ gụ tụ́ ịnị ịchọọchị nịnị, dị ụ sị gà hi nịnị. Mâ dọ wụ́ ka ọ zụ vị ịzẹyịza. 19Â nyị ka ẹhahi ọ̀ yà ịnị akakana awụ nịnị. Ọ̀ yị vavọọ yà, ọza ẹ yị va zụụ yẹ ẹngụ aza ana vị ọdọwụ obooro ịnị ẹngụ awụ nịnị. 20Wàa vavọọ va sị gụ nịnị, ẹ yị vị ịsọyịrị Ananyị yị ụ waa vaa rị nịnị. 21Mâ vavọọ kà, agụvị ka ọzọza vị anaā rị ịsa anị kẹnẹ, dị ụngwẹ aa kụ̀ aza ẹnyị, dị ịnẹ ee wù ọsa, dị eche aa mẹ rị ọọ. 22Ho! Sẹ zụ vavọọ mẹ? Aanịka wẹ yị nyị eehi ịzị a vọrọ ka waa yàa rị, du wee hú nịnị? Sị ẹ vẹ dị ụ waa sị eyii wụ ịragụ Ohomorihi, dị ụ waa mẹ ụhịị nyị aza ẹnẹ ẹ̀ yị nyị ịsọyịrị nịnị? Si u ro ka ma kà wụ nịnị? Ụ waa vana ka maa ga wụ nịnị agụvị ẹngụ ebira ẹnẹẹ nị? Ọchọnọyịrẹsụ! 23Ịsa ọnị mị sị zụ̀ wụ nịnị, ịnị ụvọ Ananyị yị mị dọ ọ hụrẹ nị. Ịnị ịrahụ ịhị ọnọọ, dị a va sị Ijeesu Ananyị yịị chire ọnịvị anị ụvọ, ộ sị Ịbụrẹẹdị, 24dị ọ kụ́ Ohomorihi avọ tụ́ ọọ, dị ọ dàa nị, dị ọ ka, “Ẹngụ amị yị, ọnị maa sịị yị wụ nịnị. Wa maanị mẹẹ, dụ wa sịị tamayị amị nịnị!” 25#Kụra 24.8; Ijer 31.31-34; Kụra 24.6-8Ịjị ẹ sị ịsa rị, dị ọ rẹ vavọọ sị ako anaa sị ká eche tịtẹ, dị ọ rẹ ka, “Eche ini ako ọnọnị vị ana jẹẹ yị oto ọwọọwa ana a sị anya amị zẹẹ. Ụmẹ tụra ụmẹ wa maanị ee hú eche ọnọnị nịnị, dị ụ wa sịị tamayị amị nịnị.” 26Ụmẹ tụra ụmẹ ọnị ụ wàa maanị aa rị Ịbụrẹẹdị, di u ree hú eche ọnọnị nịnị nị, waa sịị zụ̀ nịnị, Ánanyị yị meme sú, pooro dị ọ̀ va vavẹ. 27Agụvị avọọ, ọza tụra ọza ana àa vavọọ aa rị Ịbụrẹẹdị, dị ọ raa sị ako Ananyị yịị hú eche ini oze ẹnẹ ẹ̀ yị vọrọ nị, ọza ọnọọ aa mẹ̀ ebira odivii hi ọchẹngụ Ananyị yị ọnịrị anya anị. Ọ sị ịvị rị. 28Agụvị avọọ, ọzọza ọ̀ zama ẹngụ anị re ẹtẹẹtẹrẹ, dị ọ̀ va rị Ịbụrẹẹdị Ananyị yị, dị ò re ve hú eche ọnọọ! 29Agụvị ka ọza ẹnẹ ẹ̀ yị yẹ ụbanyị ẹngụ Ananyị yị ọnịrị anya anị, dị ọ na rị Ịbụrẹẹdị ọnọọ, di o re hú eche ọnọọ nị, vi aa sị ụvọọ tura ọyịkụ Ohomorihi kú ẹngụ anị ịrẹsụ avọọ nị. 30Agụvị avọọ, uū re ka ẹngụ aa zị ọza ọrụrụ-ọrụrụ awụ nịnị, dị ẹ sị vị ọkụmị, dị aza ẹnyị awụ nịnị hyakụ wusu nị. 31Yàa yaanị vịdị sị ẹngụ ayị zama re, Ohomorihi ọ yị kụkụ vaa mẹ̀ ọkarẹyị yị. 32Ama Ananyị yị mẹ̀ ọkarẹyị yị, dị ọ sị ụya rị yị, agụvị asị ọ na kụkụ jị ịvị yị ẹyịrị anẹhẹ vabẹ. 33Agụvị avọọ, ẹwụ nịnị ẹyịnyara ayị, wàa sị kụ́ gụ aa vaa rị ịsọyịrị Ananyị yị nịnị, jẹẹ zí ẹngụ nịnị! 34Ọza ọnị ụngwẹ àaa kụ̀, ọ̀ vịdị rị ịsa ini eehi anị da, agụvị asị Ohomorihi na jị ịvị wụ nịnị ịnị ọyịkụgụ awụ nịnị! Mị vaa sị iwọjịị wụ nịnị ini oze ịrẹyị ana vọ, ịhị màa vẹ ịdị awụ nịnị.
Цяпер абрана:
1 Anịkọrịntị 11: EBTP
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Ebira First Bible © Bible Society of Nigeria, 2014.