Kəth Apos 9
9
Shawulu Ku Tubi
(Kəth Apos 22:6-16; 26:12-18)
1Amma Shawulu tsu akwa ləkəma ka thlivərantə mjir nuwa ar Mthlaku, har tsa akwa pəla tsa ata tsəgəi ɗa. Antə tsa mwari adzə prist na ola, 2ka kiɗə abbər ka mdə nar wasikayeri tə ka tsa mwanta akwa mbwayeri ar vəngkər səli na ahar Damaska, kamnyar ma tsa ku wutə mjir nu Laku ni, shili wala mwanki, ka tsa ngkəi ɗa ka səntə ɗa mbwambwari akwa Urushalima. 3Sakatə tsa akwa lənggu ni, ka hara kudzəhə ka Damaska, təng parakəu laga thlata amtazi ka mbila ata kərari kula səndərni. 4Antə tsa ndla ata di, ka nggatə kuraku akwa pəla alari, “Shawulu! Shawulu! Kamnyar mi tə ga akwa hara bwani ali ri?”
5Antə tsa pəla, “Gə wa ri, Mthlaku?”
Antə kurakə ni pəla, “I an Yesu, mdə tə ga akwa hara bwani alari ni. 6Amma thlatə ka gə ləkwa kuta di, antə mda ata pəla ala gə su tə ka gə hara.”
7Antə mji na akwa mwa ata kəma duku kəga Shawulu ni thləthlatə həyak, kula sur pəla, kamnyar da ku nggatə kuraku, amma da aɗi wutə mdə wa. 8Antə Shawulu thlata, amma sakatə tsa kəlar ncari, su aɗi tə tsa amzhi wutari wa. Antə da kəsi tsiyari ka mwantə ni ahar Damaska. 9Antə tsa hara virari makər kula ncari wutə su, tsuwa tsa aɗi səm su wala sa yimi akwa virayeri ngəni wa. 10Təng Hyel hara mdə nu laga aɗi ahar Damaska ka thləmari Hananiya. Antə Mthlaku gari alari akwa wulsu abbər, “Hananiya,”
Antə tsa pəla, “Naam Mthlaku.”
11Antə Mthlaku pəla alari, “Thlata, ka gə mwari akwa lakur kuta di na ka thləmari Dwaɗu ni, ka gə ləvəyar Yahuda, ka gə yu mdər Tarsus laga ka thləmari Shawulu. Kamnyar kulini ni ma tsa akwa hara adduwa avi anda. 12Har ma tsa ku wutə mdə laga ka thləmari Hananiya akwa səmbwa adzə ni, tə tsa vəngkər alari tsi kamnyar ka tsa mzhi jaktə wutə su.”
13Amma Hananiya shinau ka pəla, “Mthlaku, I ku nggatə su akəla mji hang ata kəra mdə ngəni, jili ɗimikur tə tsa hara aka mjir nga na ɓɗakkarkara ahar Urushalima. 14Nggədza ma tsa ku wutə izni akəla pristayeri na ol'ola ka tsa ngkəgəi shanga mji na ana kəga thləma ga akwa sakar!”
15Amma Mthlaku pəla alari, “Mwari, kamnyar I ku carɓəla ni ka tsa hara kəthlər ali, ka tsa mwantə gariyirna aka shanga dur gapani, ka aka kuthlyayeri, ka aka mjir Israila. 16Antə I ata ncanta alari jili bwani tə tsa ata ɗarari kamnyar thləmi.”
17Antə Hananiya ku təra mwari, ka ləkwa kəi ni. Antə tsa vəngkər tsiyari alari ka pəla, “Ɓzərmana Shawulu, Mthlaku Yesu na ncantə kərni ala ga akwa lakur si azi ni, an thlentə ra, kamnyar ka gə jaktə wutə su, ka tsuwa ka gə nghyantədzi ka Mambəl na Ɓɗakkarkara.” 18Təng təkəma su laga apa bwatəla təri ata ncari, antə tsa jaktə wutə su. Antə tsa thlata, antə mdə ku hara alari baptizma. 19Antə tsa ku səm susəma ka jaktə wutə duna.
Shawulu Ku Ngkər Ndərər Hyel Ahar Damaska
Antə Shawulu hara virayeri laga adzə mjir nuwa ahar Damaska. 20Antə tsa ləkwa mbwar vəngkər səli, ka baɗitə ngkər abbər, Yesu ni Ɓzər Hyel.
21Antə shanga mji na nggatə ni ku ndatədzi ka yu abbər, “Ngəni aɗi an mdə na akwa tsəgəi mjir nu Yesu ka titiləmta mji bwaduku akwa Urushalima ni wa ya? Antə ngəni tsa si azi ni kamnyar ka tsa ngkəgəi ɗa, ka tsa mwantə ɗa mbwambwari aka pristayeri na ol'ola.” 22Amma Shawulu ku vərvər wutə duna, ka ndəndatə hangkala mjir Yahudi na ka ndzi akwa Damaska, tsa akwa ngkərɓəla abbər Yesu an Kristi ni.
23Aghəla virayeri laga, antə mjir Yahudi tsaptədzi ka ɗəmha abbər ka da sə tsi Shawulu.#2 Kor 11:32-33 24Amma Shawulu ku nggatə su ata kəra su tə da ɗəmhə ni. Antə da ləkwa wul nyarfayeri ni pci ka viri, abbər ma da ku wutə ni ka da tsi ni. 25Amma mjirthlipərni vu ni akwa thlambəl, ka haɓəla ni ata windauwur katanggar bərni ni, ka haghəi ni aɓəla ata di.
Shawulu Ahar Urushalima
26Sakatə Shawulu ku mwari ahar Urushalima antə tsa bara ka tsa paktə kər kəga mjir nu na anda, amma shanga ɗa akwa thlivər ni, kamnyar da aɗi mbərsa abbər tsa ku ndzi mdər nu jiri wa. 27Amma Barnabas ku kətə ni, ka mwantə ni aka aposəlayeri, ka ngkərɓəla ala ɗa laku tə Shawulu wutə Mthlaku ata laku akwa, ka apatə Mthlaku ku gari alari, ka apatə Shawulu ngkər labar akwa thləma Yesu kula thlivəra ahar Damaska. 28Antə Shawulu ku ndzəndzi kəga aposəlayeri ni, tə da dlarhə shanga diyayeri na kalaktə Urushalima ata kəma duku ka tsa, akwa gari kula thlivəra akwa thləma Mthlaku. 29Tsa ku gari ka beɗi kəga mjir Yahudi na ana nggatə mnyar mjir Helleni, amma da ku bara lakur tsi ni. 30Sakatə mjir nu ni nggaɓəla apani, antə da mwantə Shawulu ahar Kaisariya. Anda antə da thlentə ni ahar Tarsus.
31Antə apani ikələziya na akwa shanga Yahudiya, ka Galili, ka Samariya, ku ndzi lapiya kula thlivəra. Antə mjir nuwa ku wutə duna ka jakjaka, akwa hara shanga su ka thlivər ɗəffa Mthlaku, tsuwa Mambəl na Ɓɗakkarkara akwa dunautə ɗa.
Bitrəs Ku Mbantə Iniyas
32Akwa sakatə Bitrəs akwa dlarhə shanga diyayeri, antə tsa sə mwari adzə mji na ɓɗakkarkara ahar Lidda, 33Anda antə da kəɓa ka mdə laga ka thləmari Iniyas, na ku hara məvari ncisu apəpəi ka nggawakur, kamnyar dzari mtəmtari. 34Antə Bitrəs ku pəla alari, “Iniyas, Yesu Kristi ku mbantə nga! Thlatə kara pərtə sərpəyir nga.” Antə tsa thlatə təkəma. 35Antə shanga mjir Lidda ka mjir Sharon ku wutə ni, antə da ndzi mjir nu Mthlaku.
Bitrəs Ku Thlentə Tabithla
36Akwa saka ndaga, ahar Yoppa, mwala laga aɗi na ana nuwa, ka thləmari Tabithla, watau Dokas. Tsa an mwala na ku hamta kərni akwa hara kəthlərayeri ar dlar mji kəga hamta cautayeri aka mjir bwani. 37Təng akwa saka laga tsa hara nggawa har ka mta, antə mji pərantə ni ka peri ni akwa mbwa na amta. 38Tsuwa təng tə Yoppa kudzəhə ka Lidda, sakatə mjir nuwa nggata abbər Bitrəs ahar Lidda, antə da thlentə mji suɗa adzə ni, ka da kiɗə ni ka tsa si adzə ɗa taktar. 39Antə Bitrəs ku thlata, ka mwari kəga da. Sakatə da si antə mdə mwantə ni akwa mbwa na amta ni. Tsuwa shanga mwanki kughung ku tsaptədzi adzə ni akwa tuwa, ka ncanta alari shanga ləptayeri kəga zhaɓayeri tə Dokas namtə sakatə tsa tsu ka mpika. 40Amma Bitrəs pəla ka shanga ɗa ləɓəla kazhar mwala ni. Antə tsa zuzuri ka hara adduwa. Antə tsa shinardzi abwar mshiyir mwala ni, ka pəla, “Tabithla, thlata!” Antə Tabithla kəlar ncari. Sakatə mwala ni wutə Bitrəs, antə tsa thlatə ka ndzəndzi. 41Antə Bitrəs ha tsiyari ka tamtə ni, ka thlentə ni. Antə tsa kəga shanga mjir nuwa kəga mwanki na kughung ni, ka hamta ni ala ɗa ka mpika. 42Antə ndər ngəni ku titiləmtadzi akwa shanga Yoppa, antə mji hang ku hamta jiri aka Mthlaku. 43Antə Bitrəs ku ɗarndzi ahar Yoppa aviyar mdə laga ka thləmari Siman, mdər kəthlər kəsəm.
Цяпер абрана:
Kəth Apos 9: KNB
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
KAKAƊU NA ƁƊAKKARKARA © Typeset by the CAP Division of the Bible Society of Nigeria, 2014.