Kəth Apos 10
10
Bitrəs Ka Koneliyus
1Mdə laga aɗi ahar Kaisariya, ka thləmari Koneliyus, tsa olər sojayeri ar tsəɗi Rom, sojayeri tə mda ana kəga, “Mjir mpa ar Italiya.” 2Tsa an mdə na ana nu Hyel ka jirkur, mdə ana thlivər ɗəffa Hyel, shanga ɗa kəga mjir kutakəyirni. Tsuwa tsa ana dlar mjir bwani, tədəku tsa akwa hara adduwa aka Hyel. 3Vir laga apa saka makər na tahaku, təng tsa wuta ata bəbal mdərthlentərhyel laga akwa səmbwa adzə ni, ka pəla alari, “Koneliyus!”
4Antə tsa wul mdərthlentərhyel ni njingnga akwa thlivəra, ka pəla alari, “Mə ri, Mthlaku?”
Antə mdərthlentərhyel ni pəla alari, “Adduwar nga ka kəthlər ar dlar mda tə ga ana hara ni ku ləmtazi akəma Hyel, ka ndzi alari sur ɗangta. 5Antə thlentə mji kulini ahar Yoppa ka da ra səntə mdə laga Siman, tə mda ana kəga thləmari Bitrəs. 6Tsa aviyar mdə laga na ka thləmari Siman, mdər kəthlər kəsəm, ka kəyirni ata mnya manda.”
7Sakatə mdərthlentərhyel ni ku kuri gariyirni ka təra, antə Koneliyus kəga buɗayeri arni suɗa, ka sojarni laga na ana nu Hyel ka jirkur, akwa nca mji na ana kəthlər alari tədəku. 8Aghəla tə tsa ku ngkərɓəla ala ɗa shanga su, antə tsa thlentə ɗa ahar Yoppa.
9Səɓəla ɗəpari, apa kərathlər pci, sakatə da ku mwa ka hara kudzəhə ka di ni, antə Bitrəs lətə kəra mbwa na amta kamnyar hara adduwa. 10Antə mi ləkwa kətə ni, tə tsa akwa bara su tə ka tsa hamnya. Amma sakatə da akwa ɗəmhə susəm ni, təng su laga kəlar nca Bitrəs, 11tə tsa wutə vəi na amtazi kəlardzi, ka su laga akwa səghəi apa zhaɓi na ola ka kuɗəma nfwar. 12Tsuwa akwa zhaɓi ngəni ni, tsa wutə shanga jili mwaɓiyayeri, ka suayeri na ana mwa ka yimər kuta ɗa, ka ɗikayeri na ana fəla ata hyel. 13Antə tsa nggatə kuraku laga akwa pəla alari, “Bitrəs, thlatə ka gə tsi, ka gə ɓɗa.”
14Amma Bitrəs pəla, “Awa, Mthlaku wa! Kamnyar I aɗi ɗar səm su na ka diɗi, wala dlimbur wa.”
15Antə tsa jaktə nggatə kurakə ni na suɗkur akwa pəla alari, “Su tə Hyel ku kəcimta, ga aɗiya pəla abbər tsa ka diɗi wa.” 16Su ngəni hara ka makər, antə mdə jaktə kətə su ni təkəma ka ləmtazi kəgari.
17Sakatə Bitrəs ku ndatədzi akwa dzama ata kəra karapur su ngəni tə tsa wuta akwa wulsu ni, təng təkəma mji tə Koneliyus thlentə ni ku yutə kəyir Siman ni, ka si ka thləthlata anyarfurni. 18Antə da ndəra ka yu abbər, “Mətəpi aɗi na akwa fəli avi azi ka thləmari Siman Bitrəs ya?”
19Sakatə Bitrəs tsu akwa dzama ata kəra wulsu ngəni ni, antə Mambəl pəla alari abbər, “Nggədza mji makər akwa yu nga. 20Thlata, ka gə ləghəi, ka giri mwari kəga da, ga aɗiya shamta saka wa, kamnyar I an thlentə ɗa.” 21Antə Bitrəs ləghəi ka mwari adzə mji ni, ka pəla, “I an mdə tə giri akwa barari ni. Man səntə giri ri?”
22Antə da pəla, “Mdə laga na olər sojayeri ar Rom, na ka thləmari Koneliyus an thlentə yeru. Tsa an mdə na pwa, na ana thlivər ɗəffa Hyel, natə shanga mjir tsəɗi Yahudi ana ngkər ni ka ɓɗakkur. Mdərthlentərhyel an pəla alari ka tsa kəga nga, ka gə mwari aharngkiɗa, ka tsa nggatə su tə ga ata pəlari.” 23Antə Bitrəs kəga avi ɗa, ka na ɗa mbwar pi.
Səɓəla ɗəpari antə tsa thlata tə da təra mwari kəga tsa, tsuwa mji laga aɗi akwa Yoppa na ku nu ɗa. 24Səɓəla ɗəpari antə da mzhitə Kaisariya. Hwatu Koneliyus ku vu akwa ɗəffari abbər tsa ata wutə ɗa, antə tsa tsaptə yangkurayerari kəga pazhirni na kudzəha ata kəma duku akwa səkə ni. 25Sakatə Bitrəs ku si akwa ləvəi, antə Koneliyus thli kəmari, ka ndla akəmari, ka vəngkər səli alari. 26Amma Bitrəs thlentə ni ka pəla alari. “Thlata! Ai I mdə tsu apa ga.”
27Bitrəs ləkəma akwa gari aka Koneliyus har tə da ləvəi. Ləvəyir ɗa antə tsa wutə mji tsaptədzi hang. 28Antə tsa pəla ala ɗa, “Giri ka kəra giri ku sənda abbər aɗi kalkal mdər Yahudi paktədzi ka dur damwa, wala ra thlawar ni wa. Amma Hyel ku ncaɓəla ali abbər I aɗiya namtə kəlara mda apa tsa ka diɗi wala dlimbur wa. 29An su na hara tə sakatə giri thlenta ali, I aɗi ndzi tihtihha wa. Antə kulini I akwa bara kəi səndə su na hara tə giri pəla kəi si ni.”
30Antə Koneliyus pəla, “Ashina ka vir nfwar, tsu apa saka apani, sakatə I akwa adduwa aviyar ngkiya ata saka makər na tahaku, antə I wutə mdə laga athləthlata akəmi ka ləptərni akwa mbəlmbəla. 31Antə tsa pəla, ‘Koneliyus! Mdə ku nggatə adduwar nga, tsuwa kəthlər ar dlar mda tə ga ana hara ni ku ndzi sur ɗangta akəma Hyel. 32Antə thlenta ahar Yoppa ka mdə kəga ala gə Siman natə mda ana kəga thləmari Bitrəs ni ka tsa si. Tsa fəli aviyar Siman mdər kəthlər kəsəm, ka kəyirni ata mnya manda.’ 33An su na hara I thlenta abbər ka mdə ndəra ala gə ni, tsuwa yeru ku nggatə msərakur səyir ngə ni. Kulini nggədza yeru shang ku tsaptədzi akəma Hyel, ka yeru nggatə su tə Mthlaku ɗəmha abbər ka pəla ala yeru.”
Gari Tə Bitrəs Ku Hara Avəyar Koneliyus
34Antə Bitrəs baɗitə gari ka pəla, “Jiri I nggaɓəla abbər Hyel aɗi ana nca zumzumkur wa, 35amma akwa kəlara tsəɗi, kəlara mdə na ana thlivər ɗəffari ka hara su kalkal, Hyel ata dlu ni. 36Ai giri asəndə ndər tə tsa thlenta aka mjir Israila, abbər ka mdə ngkər ala ɗa labar na msəra, abbər mda ata wutə msərakur akəla Hyel atar Yesu na Mthlakər shanga mji. 37Tsuwa giri asəndə laku tə ndər ni titiləmtadzi akwa shanga tsəɗi Yahudiya, baɗita akwa Galili, aghəla tə Yahwana ku psəmnya baptizma ni. 38Giri asəndə laku tə Hyel pungkər Mambəl na Ɓɗakkarkara ata kəra Yesu ar Nazareth, ka na duna, ka laku tə tsa mwari akwa kəlara bwa akwa hara ɓɗakkur, ka mbantə shanga mji tə shatan akwa hara bwani ala ɗa, kamnyar Hyel adzə ni. 39Antə yeru an seɗar shanga su tə tsa hara akwa tsəɗi mjir Yahudi ka akwa Urushalima. Da tsi ni atar kukwamta ni ata udzəm kadləkadla. 40Amma Hyel ku thlentə ni akwa vir na makərkur, ka vu tə mji mzhi wutə ni. 41Tsa aɗi ncantə kərni aka shanga mji wa, amma ala yeru, yeru natə Hyel carɓəla abbər ka yeru ndzi seɗa ni, yeru na ku səm ka sa ata kəma duku ka tsa aghəla thlatərni akwa mtəmta. 42Tsuwa tsa ku tsawa ala yeru ka yeru ngkər ndərərni aka mji, ka ngkərɓəla abbər tsa an mdə tə Hyel carɓəla ka tsa sə hara shariya aka mji na ka mpika ka mji na ku mti. 43Tsa an mdə tə shanga naɓiyayeri ni gari ata kərari, abbər kəlara mdə na ku hamta jiri alari, Hyel ata tifəmta alari bikərni akwa thləmari.”
Mdə Ku Hamta Mambəl Na Ɓɗakkarkara Aka Dur Gapani
44Sakatə Bitrəs tsu akwa gari ni, antə Mambəl na Ɓɗakkarkara si ata kəra shanga mji na akwa ngga gari ni. 45Antə mjir Yahudi na ku ndzi Krishan, na si ata kəma duku kəga Bitrəs ni, ku ndatədzi tə wala mji na aɗi mjir Yahudi wa ni ku wutə cautər Mambəl na Ɓɗakkarkara. 46Kamnyar da nggatə ɗa akwa gari akwa mnyayeri zumzum akwa hu Hyel. Antə Bitrəs pəla, 47“Mda aɗi na ka su na amzhi ngkatə ta mda ahara baptizma ar yimi aka mji nayeri ni ya, təng tə da ku dlu Mambəl na Ɓɗakkarkara tsu apatə mburu ni?” 48Antə tsa tsawa abbər ka mdə hara ala ɗa baptizma akwa thləma Yesu Kristi. Aghəla nda antə da kiɗə ni abbər ka tsa ɗarndzi adzə ɗa ar virayeri laga.
Цяпер абрана:
Kəth Apos 10: KNB
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
KAKAƊU NA ƁƊAKKARKARA © Typeset by the CAP Division of the Bible Society of Nigeria, 2014.