Yorhaq 6
6
Tsawrhaq 5,000 Ghaq-anr Bidzaq-euq
Mt 14:13-21; Mk 6:30-44; Lk 9:10-17
1Garkawv khoerdeuq dzeur-euq nar-aq, Yeqsur, Deqbeqlir lan laer kur-eu Gaqliqlaer lan-euq nuibaq-anr tsaev-ir-euq mae. 2Khoerngae, tsawrhaq armaf mafma deuq, Yeqsur nae nar-awr gawr-eu tsawrhaq deuq-euq khoertav bisiq bimawr-eu jeq mr-euq gar ya’mawr-euq mirnae, aqyawf-euq maeqnan cantae ghae-euq mae. 3Yeqsur, gawqjawq-anr davler-awr, aqyawf-euq zaqlanr deuq naeq-aer khoergar nuir-euq mae. 4Khoerngae, Yurdav tsawrhaq-euq Baqsaqkaq yawbui bui-eu aryamq paelar-euq mae.
5Yeqsur myavnuiv ghawrbyae-awr hawghae ngae, tsawrhaq armaf mafma, aqyawf jawr-eu gar larluf-eu gar ya’mawr-awr, Yeqsur, Pirlirpuv-anr narhaq-eu, “Aqduimaf, tsawrhaq heudeuq-anr bidzaq-eu kaqmur aqgar zeur-ir nmr-mq?”
6Khoerngae, Yeqsur, aqyawf aqjox-aer janr-eu laer ghae-eu le laer siqnya-eu khawf, Pirlirpuv-euq nuima-anr tsermr haw-eu gharduq, khoerlof-aer narhaq-euq mae. 7Pirlirpuv, aqyawf-anr aerkhof-eu, “Tsawrhaq heudeuq, tiq ghaq uicuiv taef-aer yadzaqni, kaqmur, 200 byav arpoeq zeur-eu khawf maq lofler luf-a.”
8Zaqlanr deuq-euq lafkhoer, Sirmoq Beqtuvluv-euq maernmr Aqdaeqlaeq, Yeqsur-anr aernaeq-eu, 9“Heugar aqlizaq tiq ghaq lawqloer kaqmur ngaq siq hawr-eu ngaqshaq nyiq mawr anrluf ngar-a. Aerkhawf, tsawrhaq heumyav myav-aer ghae-eu gar aqjox-aer birlof naeqnya nmr-mq?”
10Khoerngae, Yeqsur aer-eu, “Nawmaf, tsawrhaq heudeuq-anr binuir-awq.”
Khoergar-aq, daqzawq ghawqmya’ni daef-eu mae. Khoergar nuir-eu tsawrhaq, zaqyo aqli taef-aer 5,000 ghaq aerghaqni byan-eu mae. 11Khoernar-aq, Yeqsur, kaqmur yur-awr, Miqyaer-euq guiqlanq-anr jaceuq-awr, kaqmur khoer zaqlanr deuq-anr bifnaeq-awr, zaqlanr deuq nae khoergar nuirluf-eu tsawrhaq-anr bi birnaeq-euq mae. Khoerlof-aer durni, aqyawfmaf khar geufmawf-eu lof-aer ngaqshaq khawf birnaeq-euq mae.
12Aqyawfmaf dzaqdaev ghaq ngae, Yeqsur, aqyawf-euq zaqlanr deuq-anr aernaeq-eu, “Tiqjeq-iq maqya bicawv-ir ni, dzaeqlar-euq yawpyaeq yawmeur deuq ghovuiq-awq.” 13Khoerngae, aqyawfmaf, dzaq-euq tsawrhaq khoerdeuq nae maq dzaqjir-euq lawqloer kaqmur khoer ngaq siq-euq yawpyaeq yawmeur deuq-anr ghovuiq ngae, khavpuq 12 puq byanlar-euq mae.
14Tsawrhaq khoerdeuq, Yeqsur nae bisiq bimawr-eu jeq mr-euq gar ya’mawr-awr aer-eu, “Tsawrhaq heughaq-aq, aqdir mirtsaq-euq khoertav oe taef-a laer aertaq-euq, Miqyaer gharduq ngaeqdan-eu khoerghaq ngar-a.”
15Khoerngae, tsawrhaq khoerdeuq, aqyawf jawr-eu gar lar-awr, nyaef-awr nae sanqpaq bigeuf-eu laer kadarlar taef-a laer, Yeqsur siqnya-eu mirnae, aqyawf tiq ghaq taef-aer gawqjawq-anr par davler-euq mae.
Yeqsur, Lan-euq Khoertav Can-euq
Mt 14:22-33; Mk 6:45-52
16Uqciftaw tawle ngae, aqyawf-euq zaqlanr deuq landzer-anr oeka-awr, 17lawq-anr urler-awr nae, lan-euq nuibaq paw jav-eu Gaqbeqneqoq-anr irtsaev ghaeluf-eu mae. Khoerngae, uqcif cifle-euq mae. Aerkhawf, Yeqsur, aqyawfmaf jawr-eu gar maq oekeuv-aq siq. 18Khoerngae, jaqlaer laerma bawlar-euq mirnae, irluv dzae duidui lar-euq mae. 19Aqyawfmaf smq lotsov, oeq lotsov byanni lawq heughae-euq nar-aq, Yeqsur, lan-euq khoertav cancan-aer lawq-euq dawqpae cantae mirle luf-eu gar aqyawfmaf ya’mawr ngae, yawkhav-aer guv-ir-euq mae. 20Aerkhawf, Yeqsur, aqyawf maf-anr aernaeq-eu, “Taqguv, ngar le.”
21Khoernar-aq, aqyawfmaf laqkhaq caertavni Yeqsur-anr lawq-euq lafkhoer bi urlar-euq mae. Khoernar-aq, lawq khoer, aqyawfmaf irluf-eu tsanr-anr tiqkhaeq larkhaeq taef-aer irkeuv-euq mae.
22Nishawq ngae nan, mirnan-aq, landzer, lawq tiq lawq taef-aer jav-awr, lawq khoerlawq-anr zaqlanr deuq naeq-aer Yeqsur maqdziq-aer, zaqlanr deuq taef-aer dziq-awr dov-ir-euq garkawv, lan-euq nuibaq-anr jawryaf-euq tsawrhaq armaf khoermaf siqnya-eu mae. 23Sanqpaq Yeqsur, Miqyaer-euq guiqlanq-anr jaceuq-awr, aqyawfmaf kaqmur yadzaq-euq jawrduq khoertsanr-euq dawqpae, Deqbeqlir meuq-anr nae lawq tiqdeuq larkeuv taq-euq mae. 24Khoerngae, Yeqsur hawr-eu aqyawf-euq zaqlanr deuq heugar maqpar jawr-eu ngar-a laer tsawrhaq armaf mafma khoermaf yasiq-awr, lawq khoerdeuq-anr urler-awr, Yeqsur-anr povle-eu laer Gaqbeqneqoq-anr oe-euq mae.
Yeqsur-aq, Saflar-anr Bi Daeflar-eu Kaqmur Mae
25Aqyawfmaf, lan-euq khoerpaw baq-anr Yeqsur-anr povmawr-awr, Yeqsur-anr narhaq-eu, “Laqbir-or! Nawr heugar aqmyan oekeuv-euq le?”
26Yeqsur heulof-aer aerkhof naeq-euq mae, “Ngar, nawmaf-anr aqdir aqmar aernaeq nyar, nawmaf, ngaq-anr pov-eu-aq, bisiq bimawr-eu jeq ya’mawr-euq mirnae maqngeur-a. Aerkhawf, kaqmur tiqdaev yadzaq-euq mirnae pov-eu mae. 27Buf-ir cawv-ir nya-eu dzaqdzaq dawrdawr za’ni taq laejae. Aerkhawf, Tsawrhaq-euq Zaqyo bifnaeq nya-eu mqmaq maqbyav yarzir zif-eu dzaqdzaq dawrdawr za’ni laejae-awq. Aqjeq mirnae aernar-aq, Aqda Miqyaer nae Tsawrhaq-euq Zaqyo-anr jmq diqtaq-euq mae.”
28Khoerngae, aqyawfmaf, aqyawf-anr narhaq-eu, “Nga’maf, Miqyaer-euq gar mr-eu laer sawxnya paq-aer aqjerjeq ya’mr-eu la?”
29Yeqsur, aqyawf maf-anr aerkhof naeq-eu, “Nawmaf, Miqyaer nae khaerghae lef-euq ghaq-anr jan-eu-aq, Miqyaer-euq gar mr-eu jeq pyeuf-eu mae.”
30Khoerngae, aqyawfmaf heulof-aer paraer-eu mae, “Tox-aer mar-iq, nga’maf ya’mawr-awr nawq-anr janlarni, nawr, bisiq bimawr-eu aqgeu jeq mr nmr-mq? Nawr gar aqgeu jeq mr-eu laer ghae-eu le?
31 ‘Aqyawf, aqyawf maf-anr mqtav-euq kaqmur bidzaq-euq mae,’ (Jc 78:24)
laer Yaerbof-euq lafkhoer boftaq-euq lof-aer, nga’maf-euq aqpoeq deuq-aq, bawrtsanq-anr jawr ngae, maqnav kaqmur yadzaq-euq mae.”
32Khoerngae, Yeqsur, aqyawf maf-anr heulof-aer aernaeq-euq mae, “Ngar, nawmaf-anr aqdir aqmar aernaeq nyar, nawmaf-anr mqtav-euq kaqmur bif-euq ghaq-aq, Morseq maqngeur-a. Aerkhawf, marmarni mqtav-euq kaqmur, nawmaf-anr bif-eu ghaq-aq ngaqDa mae. 33Aqjeq mirnae aernar-aq, Miqyaer-euq kaqmur-aq, mq-euq khoertav nae oe-awr, mirtsaqzaq-anr daef-eu jeq bif-eu khoerghaq mae.”
34Khoerngae, aqyawfmaf, aqyawf-anr aernaeq-eu, “Sanqpaq-or! Kaqmur khoer nga’maf-anr aqmyanluf bifnaeq laf-awq.”
35Yeqsur, aqyawf maf-anr heulof-aer aernaeq-euq mae: “Ngar-aq, daef-eu jeq bif-eu kaqmur ma. Ngar jawr-eu gar lar-eu tsawrhaq-aq, hawq maqpar maef-ar. Ngaq-anr jan-eu tsawrhaq-aq, ircuf tiqjawr-iq maqpar maef-ar. 36Nawmaf, ngaq-anr mawr-euq khawf, ngaq-anr maqjan nga laer ngar, nawmaf-anr aernaeq-euq ma. 37Aqda Miqyaer nae ngaq-anr kharbif-euq tsawrhaq dawqtawvluf ngar jawr-eu gar lar taef-a. Ngar jawr-eu gar kharlar-eu tsawrhaq-anr ngar tiqjeq ghaenae-iq maq taedzae. 38Aqjeq mirnae aernar-aq, ngar mq-anr nae oe-euq-aq, ngaq-euq nuima tsaq-eu lof-aer mr-eu laer oe-euq maqngeur, ngaq-anr khaerghae lef-euq ghaq nuima tsaqni mr-eu laer oe-euq ma. 39Ngaq-anr khaerghae lef-euq Aqda Miqyaer, aqyawf nae ngaq-anr khar bifnaeq laf-euq tsawrhaq tiqghaq-iq maqya byov-ir-eu uqtaf, arsaqsaq ngae nan, yawqghaq navluf-anr bi ghofdaef lar-eu nuima tsaq-eu mae. 40Zaqyo-anr mawr-awr aqyawf-anr kharjan-eu tsawrhaq yawqghaq navluf-anr, mqmaq maqbyav yarzir daef-eu jeq bi za’ni, ngaq-anr khaerghae lef-euq ghaq nuima tsaq-eu mae. Khoeruqtaf, arsaqsaq ngae nan, ngar, aqyawf-anr bi ghofdaeflar ma.”
Aqcawq, Yeqsur-anr Byaerdzae-euq
41Yeqsur, “Ngar-aq, mq-euq khoertav nae oe-euq kaqmur ma” laer aer-eu mirnae, Yurdav tsawrhaq, aqyawf-anr dawqghof dov-eu mae. 42Aqyawfmaf aer-eu, “Teughaq-aq, Yorsaev-euq zaqyo Yeqsur maqngeur-a lor? Aqdui, aqyawf-euq aqma aqda-anr siqnya-eu maqngeur laq? Tox-aer mar-iq, aqyawf, ‘Ngar-aq, mq-anr nae oe-euq ma’ laer aqjox-aer aernya-eu nga?”
43Khoerngae, Yeqsur, aqyawf maf-anr aerkhof naeq-eu, “Nawmaf-euq yawkaq dawqghof taqdov. 44Ngaq-anr khaerghae lef-euq Aqda Miqyaer nae ngar jawr-eu gar maq gheulaf-euq nar-aq, tsawrhaq tiqghaq-iq ngar jawr-eu gar maq larnya-a! Khoeruqtaf, arsaqsaq ngae nan, ngar, aqyawf-anr bi ghofdaeflar ma. 45Miqyaer gharduq ngaeqdan-eu deuq-euq sanqbof-euq lafkhoer,
‘Miqyaer, tsawrhaq yawqghaq navluf-anr maeqnaeq taef-a,’ (Isy 54:13)
laer boftaq-euq mae. Khoermirnae, Aqda Miqyaer maeq-eu dawq-anr yagaq-awr dzawgeuf-euq tsawrhaq yawqghaq navluf ngar jawr-eu gar lar taef-a. 46Tsawrhaq tiqghaq-iq Aqda Miqyaer-anr maq mawrhaw-aq, Miqyaer jawr-eu gar nae oe-euq ghaq taef-aer Aqda Miqyaer-anr mawrhaw-euq mae. 47Ngar, nawmaf-anr aqdir aqmar aernaeq nyar, ngaq-anr jan-eu tsawrhaq-aq, mqmaq maqbyav yarzir daef-eu jeq za-eu mae. 48Ngar-aq, daef-eu jeq bif-eu kaqmur ma. 49Nawmaf-euq aqpoeq deuq bawrtsanq bawrdanr-anr jawr ngae, maqnav kaqmur yadzaq-euq khawf shir-euq mae. 50Aerkhawf, kaqmur heu-aq, mq-anr nae oe-euq kaqmur mae. Kaqmur heu khardzaq-eu tsawrhaq maqya shir-ar. 51Ngar-aq, mq-anr nae oe-euq daef-eu jeq bif-eu kaqmur ma. Kaqmur heu-anr khardzaq-eu tsawrhaq-aq, mqmaq maqbyav yarzir yadaef-eu mae. Mirtsaqzaq yadaefni ngar yabif-eu kaqmur-aq, ngaq-euq shiqshaq yabif-eu mae.”
52Khoerngae, Yurdav tsawrhaq, aqyawf maf-euq yawkaq pyaer-eu, “Tsawrhaq teughaq, aqdui maf-anr aqyawf-euq shaqjir aqjox-aer bi dzaqnya-eu gar aer-eu nga?”
53Khoerngae, Yeqsur, aqyawf maf-anr heulof-aer aernaeq-euq mae, “Ngar, nawmaf-anr aqdir aqmar aernaeq nyar, nawmaf, Tsawrhaq-euq Zaqyo-euq shaqjir maqdzaq-aer, aqyawf-euq shiq maqdawr nar-aq, nawmaf-euq lafkhoer daef-eu jeq maqanr-a. 54Ngaq-euq shaqjir dzaq-awr, ngaq-euq shiq dawr-eu aqsur ghaq maqkaq, mqmaq maqbyav yarzir daef-eu jeq za-eu mae. Arsaqsaq ngae nan, ngar, aqyawf-anr bi ghofdaeflar ma. 55Ngaq-euq shaqjir-aq, aqdir aqmar dzaq-eu jeq pyeuf-awr, ngaq-euq shiq khawf aqdir aqmar dawr-eu jeq pyeuf-eu mae. 56Ngaq-euq shaqjir dzaq-awr ngaq-euq shiq dawr-eu tsawrhaq-aq, ngaq-euq lafkhoer jawr-awr, ngar khawf aqyawf-euq lafkhoer jawr-eu ma. 57Daefluf-eu Aqda Miqyaer, ngaq-anr khaerghae lef-awr, ngar khawf aqyawf-euq baqda’nae daefluf-eu ma. Khoerlof-aer durni, ngaq-euq shaqjir dzaq-eu tsawrhaq khawf, ngaq-euq baqda’nae yadaef taef-a. 58Kaqmur heu-aq, nawmaf-euq aqpoeq deuq nae dzaq-euq maqnav kaqmur khoer-anr maqdur-a. Aqyawfmaf yadzaq-euq khawf shir-euq mae. Kaqmur heu-aq, mq-anr nae oe-euq mae. Kaqmur heu dzaq-eu tsawrhaq-aq, mqmaq maqbyav yarzir yadaef taef-a.”
59Dawq heudeuq-aq, Yeqsur, Gaqbeqneqoq-anr jav-eu zanrdawq khawqnymr-euq lafkhoer maeqnaeq tsovnaeqluf ngae ngaeq-euq mae.
Daef-eu Jeq Bif-eu Dawq
60Khoerngae, aqyawf-euq zaqlanr ghawqmya ghaq dawq khoerdeuq-anr yagaq ngae aer-eu, “Dawq teudawq-aq, khav duidui-eu nya, aqsur ghaq ghovshaw nya-eu?”
61Zaqlanr deuq garkawv khoer-anr dawqghof dovluf-eu gar Yeqsur nuima-euq lafkhoer siqnya-awr, aqyawf maf-anr heulof-aer aernaeq-euq mae, “Dawq heudawq, nawmaf-euq gharduq sanqtif tif-eu jeq pyeuf-eu nya lor? 62Tsawrhaq-euq Zaqyo, aqyawf-euq jawrduq-anr ghofdav ler-eu gar nawmaf ya’mawr nar-aq, aqjox-aer noeq nmr-mq? 63Muiq-eu Saflar taef-aer daef-eu jeq bif-eu ghaq pyeuf-eu mae. Shiqshaq-aq, tiqjeq-iq gardanr maqtsoeq-a. Ngaq nae nawmaf-anr aernaeq-euq dawq-aq, saflar hawr-eu daef-eu jeq pyeuf-eu mae. 64Aerkhawf, nawmaf-euq lafkhoer tiqpavnav deuq maqjan-a.”
Yeqsur-aq, yawbae ngae nae, aqyawf-anr maqjan-eu tsawrhaq deuq hawr-eu aqyawf-anr anqdzaq-eu ghaq-anr khawf siqnya luf-eu mae. 65Yeqsur aer-eu, “Khoermirnae, ngaqDa nae maqbi lar-euq nar-aq, tsawrhaq tiqghaq-iq ngar jawr-eu gar maq larnya-a laer ngar, nawmaf-anr aernaeq-euq ma.”
66Khoerngae nae nar-aq, aqyawf-euq zaqlanr ghawqmya ghaq, aqyawf-anr nae ghawq-ir-awr, aqyawf naeq-aer maqpar can-euq mae.
67Khoerngae, Yeqsur, ghaqkhaer 12 ghaq-anr narhaq-eu, “Nawmaf khawf ghawq-ir mawf-eu nya lor?”
68Khoerngae, Sirmoq Beqtuvluv, aqyawf-anr heulof-aer aerkhof naeq-euq mae, “Sanqpaq-or! Nawq-euq lafkhoer mqmaq maqbyav yarzir daef-eu jeq bif-eu dawq anr-eu mae. Nga’maf aqsur ghaq-euq maeqnan par cantae-ir nmr-mq? 69Khoeruqtaf, nawr-aq, daefluf-eu Miqyaer-euq Zaqyo Kali ngar-a laer, nga’maf siqnya lar-awr janlar-euq ma.”
70Khoerngae, Yeqsur, aqyawf maf-anr aernaeq-eu, “Nawmaf 12 ghaq-anr ngaq nae tserdov taq-euq maqngeur-a lor? Aerkhawf, nawmaf-euq lafkhoer keuq-eu tiq ghaq-aq, naef sanqpaq mae.”
71Yeqsur khoerlof-aer aer-eu-aq, ghaqkhaer 12 ghaq-euq lafkhoer keuq-eu, aqyawf-anr anqdzaq-eu laer ghae-eu Sirmoq-euq zaqyo, Yurdav Irsaqgaqliqoq-anr aermawf-eu mae.
Цяпер абрана:
Yorhaq 6: AKA
Пазнака
Падзяліцца
Капіяваць
Want to have your highlights saved across all your devices? Sign up or sign in
2018 ©
Bibles International ®
The Bible Society of Baptist Mid-Missions