Yorhaq 7

7
Yeqsur-euq Maernmr Deuq Maqjan-eu
1Khoernar-aq, Yeqsur, Gaqliqlaer mirkhanq doedoe-aer can-euq mae. Yurdav tsawrhaq, aqyawf-anr saef-eu laer jawq-eu mirnae, aqyawf, Yurdav mirkhanq-anr maq canmawf-a. 2Khoerngae, Yurdav tsawrhaq, Saeqghawv yawbui bui-eu aryamq paelar-euq mae. 3Khoerngae, aqyawf-euq maernmr deuq, aqyawf-anr heulof-aer aernaeq-euq mae, “Nawq-euq zaqlanr deuq khawf, nawr mrluf-eu deuq-anr ya’mawrni, heugar nae dov-ir-awr, Yurdav mirkhanq-anr ir-awq. 4Aqjeq mirnae aernar-aq, yawqha-euq mawrdo, aqcawq-anr byacaevni bisiq-eu laer sharpov luf-eu tsawrhaq-aq, aqjeq mr-eu khawf barzaf-anr tiqjeq-iq maqmr-ar. Nawr heudeuq mr-eu le laer nar-aq, nawq-euq mawrdo, mirtsaqzaq-anr bimawr-awq lawr.”
5Aqyawf-euq maernmr deuq, aqyawf-anr maqjan-eu mirnae, khoerlof-aer aer-eu mae. 6Khoerngae, Yeqsur, aqyawf maf-anr heulof-aer aernaeq-euq mae, “Ngaq-euq aryamq maq tsaqlar-aq siq. Aerkhawf, nawmaf-euq aryamq-aq, aqmyanluf tsaq-eu mae. 7Mirtsaqzaq, nawmaf-anr maqbyae nya-ar. Aerkhawf, ngar, aqyawfmaf nae mr-euq deuq yawdoer nga laer sarkir kamq-eu mirnae, aqyawfmaf, ngaq-anr byae-eu mae. 8Nawmaf yawbui bui-eu gar le-awq. Ngaq-euq aryamq yawmuiq-aer maq tsaqlar-euq mirnae, ngar yawbui bui-eu gar maqle siq.”
9Yeqsur, aqyawf maf-anr heulof-aer aernaeq ghaq-awr nae, Gaqliqlaer mirkhanq-anr jawryaf-euq mae.
Yeqsur, Saeqghawv Yawbui-anr Le-euq
10Aerkhawf, aqyawf-euq maernmr deuq ledzeur-euq nar-aq, Yeqsur khawf aqcawq-anr maqbi siqnya’ni yawzaf zaf-aer yawbui bui-eu gar le-euq mae. 11Yawbuibui ngae, Yurdav tsawrhaq, “Aqyawf aqgeugar jawr-eu la?” laer narhaq narhaq-aer povluf-eu mae.
12Tsawrhaq armaf deuq-euq yawkaq, aqyawf-euq garkawv lawflawf-aer jaluf-eu mae. Tiqpavnav deuq aer-eu, “Aqyawf-aq, yawmuiq mae.” Yawqdeuqyawq aer-eu, “Maqngeur-a, aqyawf-aq, tsawrhaq-anr sheuqbanq-eu tsawrhaq mae.” 13Aerkhawf, aqyawfmaf, Yurdav tsawrhaq-anr guv-eu mirnae, tiqghaq-iq Yeqsur-euq garkawv byacaevni maq japeuq-a.
14Yawbui bui-eu tiqpav pavlar ngae, Yeqsur, uqduq tanqnymr nymrma-anr le-awr maeqnaeq tsovnaeq-euq mae. 15Yurdav tsawrhaq zanqler-awr aer-eu, “Tsawrhaq teughaq-aq, sanqbof maq dzawhaw-euq gar nae, sanqbof aqjox-aer siqnya-eu nga?”
16Yeqsur, aqyawf maf-anr heulof-aer aerkhof naeq-euq mae, “Ngar maeq-eu dawqmaeq dawqtsov heu-aq, ngaq-euq dawq maqngeur, ngaq-anr khaerghae lef-euq ghaq-euq dawq mae. 17Miqyaer nuima tsaqni mrmawf-eu tsawrhaq-aq, ngar maeq-eu dawqmaeq dawqtsov heu, Miqyaer nae bimaeq-euq nga lor? Maqngeur nar-aq, ngar yawqha yawqha ngaeq-eu nga laq laer siqnya taef-a. 18Yawqha-anr nae dovlar-euq jeq ngaeq-eu tsawrhaq-aq, yawqha-euq yawshaef khanqsaer pov-eu mae. Aerkhawf, aqyawf-anr khaerghae lef-euq ghaq-euq yawshaef khanqsaer-anr pov-eu ghaq-aq, tsaq-awr dawr-awr, aqyawf-euq lafkhoer maqtsaq maqdawr-eu jeq maqanr-a. 19Morseq, nawmaf-anr zanrdawq bif-euq maqngeur-a lor? Aerkhawf, nawmaf tiqghaq-iq zanrdawq-euq maeqnan maq cantae-a. Ngaq-anr aqjeq mirnae saef-eu laer jawq-eu le?”
20Tsawrhaq khoerdeuq aerkhof naeq-eu, “Nawr-aq, naef ur-eu ngar-a. Aqsur ghaq, nawq-anr saef-eu laer jawqluf-eu la?”
21Yeqsur, aqyawf maf-anr heulof-aer aerkhof naeq-euq mae, “Ngar tiq jeq mr-euq gar, nawmaf dawqtawvluf zanqler-eu mae. 22Khoermirnae, Morseq, nawmaf-anr bawkhov maeqdzaq yaeq-eu zanr bijanr-euq mae. Nawmaf, landaw jawrnan ngae nan khawf, zaqyo aqli-anr bawkhov maeqdzaq yaeqnaeq-eu mae. (Zanr heu-aq, Morseq-anr nae ardanq bae-euq maqngeur-a. Aqpoeq aqbawr deuq nae tawqka lef-euq mae). 23Landaw jawrnan ngae nan, tsawrhaq tiq ghaq bawkhov maeqdzaq yaeq-eu khoer, Morseq-euq zanrdawq-anr maqbanqni mrkhmq-eu ngeur nar-aq, landaw jawrnan ngae nan, ngar, tsawrhaq tiq ghaq-euq mawrdo dolan-aer bi taqler jir-euq gar, nawmaf, ngaq-anr nuima paer-eu le lor? 24Lafnyir paw mawrlar-eu jeq-anr haw-awr nae yarkhaq maqdar-aer, tsaq-awr dawr-eu yarkhaq dar-eu jeq nae dar-awq.”
Teughaq Kali Mae Lor?
25Yeqlursaqlaeq-anr jawr-eu tsawrhaq tiqpavnav deuq heulof-aer aer-eu mae, “Aqyawfmaf saef-eu laer jawqluf-eu khoerghaq, teughaq maqngeur-a lor? 26Aerkhawf, hawsher-eq! Aqyawf khaqduqni maeqluf-eu gar aqyawfmaf, aqyawf-anr tiqjeq-iq maqaer nga. Tsawrhaq teughaq aqdir Kali mae laer uvlanr-eu deuq aqdir siqnya-eu maqsiq. 27Tsawrhaq teughaq aqgeugar nae oe-euq la laer aqduimaf siqnya-eu beu. Aerkhawf, Kali oe ngae-aq, aqyawf aqgeugar nae oe-euq la laer tiqghaq-iq maqsiq nya-ar.”
28Khoerngae, Yeqsur, uqduq tanqnymr nymrma-euq lafkhoer maeq-awr tsov-eu lafkhoer, tersar yawkhav-aer heulof-aer aer-eu mae, “Nawmaf, ngaq-anr siqnya-awr, ngar aqgeugar nae oe-euq la laer khawf siqnya-eu mae. Aerkhawf, ngar-aq, yawqha yawqha oe-euq maqngeur. Ngaq-anr khaerghae lef-euq ghaq tsaq-awr dawr-eu mae. Nawmaf, aqyawf-anr maq siqnya-a. 29Aerkhawf, ngar-aq, aqyawf-anr siqnya ma. Aqjeq mirnae aernar-aq, aqyawf, ngaq-anr khaerghae lef-awr, ngar-aq, aqyawf jawr-eu gar nae oe-euq ma.”
30Khoer-euq baqda’nae, aqyawfmaf, aqyawf-anr nyaef-eu laer jawq-eu mae. Aerkhawf, aqyawf-euq aryamq maq tsaqlar-euq mirnae, aqyawf-anr tiqghaq-iq maqnyaef-a. 31Tsawrhaq khoerdeuq-euq lafkhoer ghawqmya ghaq aqyawf-anr janlar-awr aer-eu, “Kali oe ngae, tsawrhaq heughaq nae mr-euq bisiq bimawr-euq deuq myavmaqtser aqyawf mr taef-a lor?”
Yeqsur-anr Binyaef-ir-euq
32Tsawrhaq armaf deuq, Yeqsur-euq garkawv lawflawf-aer jaluf-eu gar Paqliqsaer deuq yagaq-euq mirnae, Yeqsur-anr binyaef-ir-eu laer pirma aqyuif deuq hawr-eu Paqliqsaer deuq, lofpir-eu kuirlaf#7:32 Lofpir-eu kuirlaf Heu-aq, uqduq tanqmymr nymrma-anr lofpir-eu pirma-euq kuirlaf deuq-anr aer-eu mae.deuq-anr khaerghae-euq mae.
33Khoerngae, Yeqsur, aqyawf maf-anr aernaeq-eu, “Ngar, nawmaf naeq-aer tiqkhaeq jawr nar-aq, ngaq-anr khaerghae lef-euq ghaq jawr-eu gar ghofler ma. 34Nawmaf, ngaq-anr pov taef-a. Aerkhawf, maq povmawr nya-ar. Nawmaf, ngar jawr-eu gar maq larnya-a.”
35Khoerngae, Yurdav tsawrhaq-euq yawkaq heulof-aer aer-eu mae, “Aqduimaf, aqyawf-anr maq povmawr nya’ni, aqyawf aqgeugar ir-eu laer aer-eu nga? Heqlaqsar tsawrhaq-euq ghanrcae jawrbyav taq-euq deuq jawr-eu gar ir-awr, Heqlaqsar tsawrhaq deuq-anr maeqnaeq tsovnaeq-ir-eu laer aer-eu nga lor? 36‘Nawmaf, ngaq-anr pov taef-a. Aerkhawf, maq povmawr nya-ar. Ngar jawr-eu gar nawmaf maq larnya-a’ laer aqyawf aer-eu khoer aqjeq-anr aermawf-eu nga?”
Daef-eu Jeq Bif-eu Lawrgawv
37Yawbui bui-eu arsaqsaq ngae nan-aq, huiqdzaeq-eu nan mae. Yeqsur gawqyawf yawf-awr, tersar yawkhav-aer heulof-aer aer-eu mae, “Ircuf kharmaef-eu tsawrhaq, ngar jawr-eu gar lar-awr dawrlar-awq. 38Ngaq-anr jan-eu tsawrhaq-aq, Yaerbof boftaq-euq lof-aer, ‘Aqyawf-euq nuima-anr nae daef-eu jeq bif-eu ircuf lawrgawv yoerdovlef taef-a.’ ”
39Yeqsur heulof-aer aer-eu-aq, aqyawf-anr jan-eu tsawrhaq deuq aqkar muiq-eu Saflar za-eu gar aermawf-eu mae. Aqjeq mirnae aqkar za-eu laer aernar-aq, Yeqsur yawshaef khanqsaer maqza-euq siq mirnae, aqyawf maf-anr Yawshawr Saflar maq bifdan-aq siq.
Yeqsur Baqda’nae Armur Pav-ir-euq
40Tsawrhaq armaf deuq dawq khoerdawq-anr yagaq ngae ghawqmya ghaq aer-eu, “Heughaq-aq, aqdirma-aer Miqyaer gharduq ngaeqdan-eu khoerghaq ngar-a.”
41Tiqpavnav deuq aer-eu, “Heughaq-aq, Kali ngar-a.” Aerkhawf, tiqpavnav deuq aer-eu, “Kali, Gaqliqlaer mirkhanq-anr nae dovlar-a lor? 42Yaerbof-euq lafkhoer, ‘Kali-aq, Daqbir-euq aryoeq-anr nae dovle-awr, Daqbir-euq jawrduq Baeqlaeqhaeq-anr nae dovlar taef-a’ laer boftaq-euq maqngeur-a laq?”
43Khoerngae, Yeqsur-euq baqda’nae, aqyawf maf-euq yawkaq pav-ir-euq mae. 44Tiqpavnav deuq, aqyawf-anr nyaefmawf-eu mae. Aerkhawf, tiqghaq-iq aqyawf-anr maqnyaef-a.
Aqyuif Aqtsu Deuq Maqjan-a
45Khoerngae, pirma aqyuif deuq hawr-eu Paqliqsaer deuq, lofpir-eu kuirlaf deuq ghoflar-euq gar narhaq-eu, “Nawmaf aqjeq mirnae aqyawf-anr maq nyaeflaf-euq le?”
46Lofpir-eu kuirlaf khoerdeuq aerkhof-eu, “Tsawrhaq heughaq lof-aer tiqghaq-iq maq ngaeqhaw-aq.”
47Khoerngae, Paqliqsaer deuq, aqyawf maf-anr heulof-aer aerkhof naeq-euq mae, “Nawmaf khawf bi sheuqbanq ghae-euq le lor? 48Uvlanr-eu deuq hawr-eu Paqliqsaer deuq, aqyawf-anr janlar-euq tsawrhaq tiqghaqnav jawr mae lor? 49Aerkhawf, zanrdawq-anr maq siqnya-eu tsawrhaq armaf heudeuq-aq, yaqkhaer yaq-eu gar yadaq taef-a.”
50Uqcif paw Yeqsur jawr-eu gar irhaw-euq aqyawf maf-euq lafkhoer keuq-eu Nirgawrdiq, aqyawf maf-anr aernaeq-eu, 51“Aqdui-euq zanrdawq, aqyawf ngaeq-eu gar jeqhu maq narhaq-aer, aqyawf mrluf-eu jeq-anr jeqhu maqya siq-euq gar, tsawrhaq tiq ghaq-anr yarkhaqdar taef-a lor?”
52Aqyawfmaf, aqyawf-anr aerkhof naeq-eu, “Nawr khawf, Gaqliqlaer mirkhanq-anr nae oe-euq le lor? Nawr povtser haw-ir sher-eq. Gaqliqlaer mirkhanq-anr nae Miqyaer gharduq ngaeqdan-eu tsawrhaq tiqghaq-iq maq dovlar haw-aq.” 53Khoernar-aq, yawqghaq navluf yawqha-euq nymr-anr yawqha ghof-ir jir-euq mae.

Цяпер абрана:

Yorhaq 7: AKA

Пазнака

Падзяліцца

Капіяваць

None

Want to have your highlights saved across all your devices? Sign up or sign in

YouVersion выкарыстоўвае файлы cookie для персаналізацыі вашага акаунта. Выкарыстоўваючы наш вэб-сайт, вы згаджаецеся на выкарыстанне намі файлаў cookie, як апісана ў нашай Палітыцы прыватнасці