Yorhaq 10
10
Yawr Bo-eu Ghaq Hawr-eu Yawr
1Yeqsur heulof-aer aer-eu mae, “Ngar, nawmaf-anr aqdir aqmar aernaeq nyar, yawr, yawrkuv-anr urlar ngae, ghovkhaeq-anr nae maq urlarni, yawqpawyawq nae davurlar-eu ghaq-aq, smrkhoeq hawr-eu tanrjoe mae. 2Ghovkhaeq-anr nae urlar-eu ghaq-aq, yawr bo-eu ghaq mae. 3Ghovkhaeq-anr lof-eu ghaq, aqyawf-anr larghov pannaeq taef-a. Yawrdeuq khawf aqyawf-euq tersar-anr narhaq-eu mae. Aqyawf-aq, aqyawf-euq yawr-euq armyanr kurkur-aer, yawr khoerdeuq-anr sheuqdov ghae-eu mae. 4Aqyawf-euq yawrdeuq-anr sheuqdov jir-euq nar-aq, aqyawf, yawrdeuq-euq maeqhu can-awr, yawrdeuq khawf aqyawf-euq tersar-anr siqnya-eu mirnae, aqyawf-euq maeqnan cantae ghae-eu mae. 5Yawrdeuq-aq, tiqjeq ghaenae-iq maqsiq maqsux-eu tsawrhaq-euq maeqnan maq cantae-eu uqtaf, aqyawf jawr-eu gar nae caev-eu mae. Aqjeq mirnae aernar-aq, yawrdeuq-aq, maqsiq maqsux-eu deuq-euq tersar-anr maq siqnya-a.”
6Yeqsur yawjeq majeq dawq heudawq nae maeqnaeq-euq khawf, aqyawfmaf, Yeqsur nae aqyawf maf-anr maeqnaeq-euq garkawv khoerdeuq-anr maq ghovshaw nya-a.
Muiq-eu Yawr Bo-eu Ghaq
7Khoernar-aq, Yeqsur, aqyawf maf-anr heulof-aer par aernaeq-euq mae, “Ngar, nawmaf-anr aqdir aqmar aernaeq nyar, ngar-aq, yawrdeuq urlar-eu ghovkhaeq ma. 8Ngaq-euq maeqhu kharoe-euq tsawrhaq-aq, smrkhoeq hawr-eu tanrjoe mae. Aerkhawf, yawrdeuq, aqyawf maf-euq dawq-anr maq narhaq-aq. 9Ngar-aq, ghovkhaeq ma. Ngaq-anr ghoe-awr khar urlar-eu tsawrhaq-aq, yabuq-ir taef-a. Khoeruqtaf, aqyawf urlar-awr irdov-eu khawf gavdzaqduq ya’mawr taef-a. 10Smrkhoeq-aq, khoeq-eu, saef-eu, lavcawv-eu laer taef-aer lar-eu mae. Ngar-aq, aqyawfmaf daef-eu jeq biza-eu uqtaf, aqyawfmaf daef-eu khoer tiqbyan tiqlof biza-eu gharduq oe-euq ma.
11“Ngar-aq, muiq-eu yawr bo-eu ghaq ma. Muiq-eu yawr bo-eu ghaq-aq, aqyawf-euq daefzir yawrdeuq-euq gharduq shirdan peuq-eu mae. 12Aqdir yawr bo-eu ghaq maqngeur-aer ghaqmanr manrdzaq-eu tsawrhaq-aq, yawqha-euq yawr maqngeur-eu mirnae, khaqyaer lar-eu gar ya’mawr ngae, yawrdeuq-anr byaerdzae-awr caev-eu mae. Khaqyaer khoer yawrdeuq-anr sheu-awr, aqyawf maf-anr taebyav-eu mae. 13Ghaqmanr manrdzaq-eu tsawrhaq-aq, aqyawf ghaqmanr manrdzaq-eu taef mirnae, yawrdeuq-euq gharduq tiqpawf-iq maq sharnoeqni caev-eu mae.
14“Ngar-aq, muiq-eu yawr bo-eu ghaq ma. Ngar, ngaq-euq yawr-anr siqnya-awr, ngaq-euq yawr khawf ngaq-anr siqnya-eu mae. 15Khoerlof-aer durni, Aqda, ngaq-anr siqnya-awr, ngar khawf Aqda-anr siqnya-eu ma. Ngar, ngaq-euq daefzir yawrdeuq-euq gharduq shirdan peuq-eu ma. 16Ngar-aq, yawr yawrkuv heukuv-anr maqtaf-eu yawr nuideuq khawf jawr-eu le siq. Ngar, yawr khoerdeuq-anr khawf yasheuq laq-ir-awr, aqyawfmaf, ngaq-euq tersar-anr narhaq taef-a. Khoernar-aq, yawr yawrmaf tiq maf hawr-eu yawr bo-eu ghaq tiq ghaq taef-aer pyeuflar taef-a.
17“Ngar ghofdaef larni ngaq-euq daefzir shirdan peuq-eu mirnae, ngaqDa, ngaq-anr gaq-eu mae. 18Ngaq-anr tiqghaq-iq maq lavsaef nya-a. Aerkhawf, ngar, yawqha yawqha shirdan-eu ma. Ngar shirdan-eu baoq jav-awr, ngar ghofdaef lar-eu baoq khawf jav-eu ma. Biftaq-euq dawq heudawq-aq, ngar, ngaqDa-anr nae za-euq ma.”
19Khoerngae, dawq khoerdeuq-euq baqda’nae, Yurdav tsawrhaq-euq yawkaq parpav-ir-euq mae. 20Aqyawfmaf ghawqmya ghaq aer-eu, “Aqyawf-aq, naef ur-awr uqtsaev-euq nga. Nawmaf, aqyawf-euq dawq-anr aqjeq mirnae narhaq-eu le?”
21Aerkhawf, tiqpavnav deuq paraer-eu, “Aqyawf-euq dawq-aq, naef ur-eu tsawrhaq-euq dawq maqngeur nya. Naef-aq, myavbaef-anr bi mawrlarnya taef-a lor?”
Yurdav Tsawrhaq, Yeqsur-anr Byaerdzae-euq
22Khoerngae tsanqgav yamq tsaq-awr, Yeqlursaqlaeq-anr uqduq tanqnymr nymrma a’naeq-euq yawbui#10:22 Uqduq tanqnymr nymrma a’naeq-euq yawbui Uqduq tanqnymr nymrma a’naeq-euq gar noeqkeuv-eu yawbui-anr aer-eu mae. builuf-eu mae. 23Yeqsur, uqduq tanqnymr nymrma-euq lanr-euq lafkhoer tsovtaq-euq, Sorlaqmoq-euq saeqghawv-euq lafkhoer canluf-eu mae. 24Khoerngae, Yurdav tsawrhaq, aqyawf-euq tiqjawq uiqlar-awr aqyawf-anr aernaeq-eu, “Nawr, nga’maf-anr yawduq maqbaw-aer aqmyan keuvni bidawq-eu laer ghae-eu le? Nawr, Kali ngeur nar-aq, nga’maf-anr dawrcoeni aernaeq laf-awq.”
25Yeqsur, aqyawf maf-anr heulof-aer aerkhof naeq-euq mae, “Ngar, nawmaf-anr aernaeq-euq ma. Aerkhawf, nawmaf maqjan-a. Ngaq nae ngaqDa-euq tsawrmyanr-euq uqmov mr-euq gardeuq-aq, ngaq-euq garkawv sarkir kamq-eu mae. 26Aerkhawf, nawmaf, ngaq-euq yawrdeuq maqngeur-eu mirnae, ngaq nae nawmaf-anr aernaeq-euq gar nawmaf maqjan-a. 27Ngaq-euq yawrdeuq-aq, ngaq-euq tersar-anr narhaq-eu mae. Ngar, aqyawf maf-anr siqnya-awr, aqyawfmaf khawf ngaq-euq maeqnan cantae-eu mae. 28Khoeruqtaf, ngar, aqyawf maf-anr mqmaq maqbyav yarzir daef-eu jeq bif-awr, aqyawfmaf tiqjawr-iq maqya cawv-ir-ar. Ngaq-euq aqlaf-anr nae tiqghaq-iq yawr khoerdeuq-anr maq ludov nya-ar. 29Dawqtawv luf-euq khoertav huiqdzaeq-eu ngaqDa nae yawr khoerdeuq, ngaq-anr a’naeq laf-euq mae. NgaqDa-euq aqlaf-euq lafkhoer nae tiqghaq-iq yawr khoerdeuq-anr maq ludov nya-ar. 30Ngar hawr-eu ngaqDa-aq, tiq ghaq taef ma.”
31Khoerngae, Yurdav tsawrhaq khaqlo parghov-awr, aqyawf-anr biqsaef-eu laer ghae-eu mae. 32Yeqsur, aqyawf maf-anr aernaeq-eu, “Aqda-anr nae oe-euq gar yawmuiq ghawqmya jeq, ngar, nawmaf-anr bimawr-euq ma. Ngaq nae mr-euq aqgeu jeq-euq baqda’nae, nawmaf, ngaq-anr khaqlo nae biqsaef-eu laer ghae-eu le?”
33Yurdav tsawrhaq, aqyawf-anr aerkhof naeq-eu, “Nga’maf, nawr gar yawmuiq jeq mr-euq baqda’nae nawq-anr khaqlo biq-eu laer ghae-eu maqngeur. Nawr, tsawrhaqzaq pyeuf-eu taef khawf yaeqbawq saerlu-aer Miqyaer ma laer aer-eu mirnae, biqsaef-eu laer ghae-eu ma.”
34Yeqsur, aqyawf maf-anr heulof-aer aerkhof naeq-euq mae, “Nawmaf-euq zanrdawq-euq lafkhoer,
‘Ngar aer-eu, “Nawmaf-aq, miqyaer deuq mae,” (Jc 82:6)
laer boftaq-euq maqngeur-a lor’? 35Miqyaer, khoerdeuq-anr miqyaer deuq laer kur-eu ngeur nar-aq, Miqyaer-euq dawq aqsur ghaq jawr-eu gar keuvle-euq la? (Yaerbof-euq lafkhoer boftaq-euq dawq-aq, maqcawv-ir nya-a.) 36Aqda nae tserdov-awr, mirtsaq-euq khoertav bi’oe-euq khoerghaq, ‘Ngar-aq, Miqyaer-euq Zaqyo ma’ laer aer-eu mirnae, nawmaf, ‘Nawr, Miqyaer-anr yaeqbawq saerlu-aer aer-eu nga’ laer aer-eu le lor? 37Ngar, ngaqDa-euq gardeuq maqmr nar-aq, ngaq-anr taqjan. 38Aerkhawf, ngar mrluf-eu ngeur nar-aq, ngaq-anr maqjan-eu khawf, ngar mrluf-eu gardeuq-anr jan-awq. Khoerlof-aer nar-aq, Aqda, ngaq-euq lafkhoer jawr-awr, ngar khawf Aqda-euq lafkhoer jawr-eu nga laer nawmaf ya siqnya-awr yajan taef-a.”
39Khoerngae, aqyawfmaf, aqyawf-anr nyaef-eu laer parghae-eu mae. Aerkhawf, aqyawf, aqyawf maf-euq aqlaf-anr nae dzeur-ir-euq mae.
40Khoernar-aq, Yeqsur, Yorhaq nae bartirsaq mrnaeq baebae-euq Yawrdaq lawrbaq-euq nuibaq paw parir-awr, khoergar jawr-euq mae. 41Tsawrhaq ghawqmya’ni aqyawf jawr-eu gar oe-awr aer-eu, “Yorhaq-aq, bisiq bimawr-eu tiqjeq-iq maqmr-aq. Aerkhawf, Yorhaq nae heughaq-euq garkawv aertaq-euq jeq dawqtawvluf tsaq duidui nga.” 42Khoergar, tsawrhaq ghawqmya’ni Yeqsur-anr janlar-euq mae.
Цяпер абрана:
Yorhaq 10: AKA
Пазнака
Падзяліцца
Капіяваць
Want to have your highlights saved across all your devices? Sign up or sign in
2018 ©
Bibles International ®
The Bible Society of Baptist Mid-Missions