Yorhaq 11
11
Laqzaqlur Shir-awr Ghofdaef Lar-euq
1Khoerngae, Laqzaqlur laer kur-eu tiq ghaq narluf-eu mae. Aqyawf-aq, Maqliv hawr-eu Maqta aqnyafnmr jawr-eu Beqtaqnir pu-anr jawr-eu mae. 2Maqliv heughaq-aq, arnan, Sanqpaq Yeqsur-anr tsir yawsaw laef-awr, tsaerkanr nae aqyawf-euq aqkuir-anr sivshawr naeq-eu khoerghaq mae. Narluf-eu Laqzaqlur-aq, Maqliv-euq aqmanr mae. 3Aqnyafnmr, Yeqsur-anr dawqtsaf tsafanr lef-euq, “Sanqpaq-or! Nawr zawr gaq-eu ghaq narluf-eu mae.”
4Yeqsur dawq khoerdawq-anr yagaq ngae aer-eu, “Nar-eu khoer-aq, shir-eu gar maqkeuv-ar. Aerkhawf, Miqyaer-euq yawshaef khanqsaer bi dovlar-eu gharduq mae. Nar-eu khoer baqda’nae Miqyaer-euq Zaqyo yawshaef khanqsaer za taef-a.”
5Yeqsur-aq, dzeurlaf ngae nae, Maqta aqnyafnmr hawr-eu Laqzaqlur-anr gaq-eu mae. 6Aqyawf, Laqzaqlur nar-eu garkawv yagaq-euq khawf, aqyawf jawrluf-eu gar nyiq nan parjawr-euq mae. 7Khoernar-aq, Yeqsur, zaqlanr deuq-anr cawq-eu, “Aqduimaf, Yurdav mirkhanq-anr parle kar-eur.”
8Zaqlanr deuq, aqyawf-anr aernaeq-eu, “Laqbir-or! Nymq-mr kaq-anr, Yurdav tsawrhaq, nawq-anr khaqlo nae biqsaef-eu laer jawqluf-eu mae. Nawr khoergar parle-eu laer aer-eu le lor?”
9Yeqsur heulof-aer aerkhof naeq-euq mae, “Tiq nan-euq lafkhoer naqliq 12 laf mq bya-eu maqngeur-a laq? Tsawrhaq tiq ghaq mq bya ngae garma can nar-aq, sanqtif maq tiflar-ar. Aqjeq mirnae aernar-aq, aqyawf, mirtsaq-euq yawshaef mawrnya-eu mae. 10Aerkhawf, tsawrhaq tiq ghaq uqcif paw garma can nar-aq, aqyawf sanqtif tiflar taef-a. Aqjeq mirnae aernar-aq, aqyawf-euq lafkhoer yawshaef maqanr-a.”
11Yeqsur khoerlof-aer aerghaq-awr, aqyawf, aqyawf maf-anr par aernaeq-eu, “Aqdui-euq cawq, Laqzaqlur-aq, yufkhav luf-eu mae. Aerkhawf, ngar le-awr aqyawf-anr kurnoeqler la.”
12Khoerngae, aqyawf-euq zaqlanr deuq aer-eu, “Sanqpaq-or! Aqyawf yufkhav luf-eu ngeur nar-aq, aqyawf taqler taef-a.”
13Yeqsur khoerlof-aer aer-eu-aq, Laqzaqlur shir-euq gar aerkeuv mawf-eu mae. Aerkhawf, aqyawf ghaqnaq naq-eu lafkhoer yufkhav-euq gar aer-eu nga laer aqyawfmaf noeq-euq mae. 14Khoerngae, Yeqsur, aqyawf maf-anr dawrcoeni heulof-aer aernaeq-euq mae, “Laqzaqlur shir-euq mae. 15Nawmaf janni, ngar khoergar maqjawr-euq mirnae, nawmaf-euq gharduq ngar laqkhaqcaer nya. Aerkhawf, nymq-mr-aq, dzawq, aqduimaf, aqyawf jawr-eu gar le kar-eur.”
16Zaqdzm laer kur-eu Tormav khoerghaq, aqyawf-euq cawq zaqlanr deuq-anr aernaeq-eu, “Aqduimaf khawf aqyawf naeq-aer yashirni le kar-eur.”
Yeqsur-aq, Daef-eu Jeq Pyeuf-eu Mae
17Yeqsur lekeuv ngae, Laqzaqlur, lmqbymr-anr bafpanq taq-euq oeq nan keuvlar-euq mae laer yasiq-euq mae. 18Beqtaqnir pu-aq, Yeqlursaqlaeq-euq dawqpae jav-eu mae. Smq lotsov aerghaqni kaq-eu taef mae. 19Yurdav tsawrhaq ghawqmya’ni, Maqliv hawr-eu Maqta jawr-eu gar lar-awr, aqnyaf nmr-euq aqmanr shir-euq mirnae, aqyawfnyaf nuima bi sarlar-eu gharduq lartaq-euq mae. 20Yeqsur larluf-eu garkawv Maqta yagaq-euq naeq-aer, aqyawf dov-ir-awr Yeqsur-anr mawr-ir-euq mae. Aerkhawf, Maqliv-aq, irkanr-euq lafkhoer nuirluf-eu mae.
21Khoerngae, Maqta, Yeqsur-anr heulof-aer aernaeq-euq mae, “Sanqpaq-or! Nawr heugar jawr lawnmr-aq, ngaq-euq aqmanr maqshir-ar. 22Nymq-mr khawf, nawr, Miqyaer-anr aqjeq shar-eu maqkaq, Miqyaer, nawq-anr bifnaeq taef-a laer ngar siqnya ma.”
23Yeqsur, aqyawf-anr aernaeq-eu, “Nawq-euq aqmanr ghofdaeflar taef-a.”
24Maqta, aqyawf-anr aernaeq-eu, “Arsaqsaq ngae nan ghofdaef lar-eu aryamq keuvlar nar-aq, aqyawf ghofdaeflar taef-a laer ngar siqnya ma.” 25Yeqsur, aqyawf-anr heulof-aer aernaeq-euq mae, “Ngar-aq, ghofdaef lar-eu jeq hawr-eu daef-eu jeq pyeuf-eu ma. Ngaq-anr jan-eu tsawrhaq-aq, shir-euq khawf ghofdaeflar taef-a. 26Ngaq-euq lafkhoer jawr-awr, ngaq-anr kharjan-eu tsawrhaq-aq, tiqjawr-iq maqya shir-ar. Nawr dawq heudawq-anr jan ma laq?”
27Maqta, aqyawf-anr aernaeq-eu, “Sanqpaq-or! Jan ma. Nawr-aq, mirtsaq-euq khoertav oe mae laer aer-eu Miqyaer-euq Zaqyo Kali mae laer, ngar jan ma.”
Yeqsur Myavbir Dovle-euq
28Maqta khoerlof-aer aerghaq ngae, aqyawf ghofler-awr, aqyawf-euq aqnyir Maqliv-anr yawzaf zaf-aer kur-awr aer-eu, “Saqlaq larkeuv taq-awr nawq-anr kurluf-eu mae.”
29Maqliv khoerlof-aer yagaq-euq naeq-aer yawkawr-aer tur-awr, aqyawf jawr-eu gar ir-euq mae. 30Khoerngae keuvni, Yeqsur pu-anr maq urlerni, Maqta, aqyawf-anr mawrle-euq tsanr-anr jawrluf-eu mae. 31Khoerngae, Yurdav tsawrhaq deuq, Maqliv naeq-aer irkanr-euq lafkhoer jawr-awr, aqyawf nuima sarlarni janrluf-eu mae. Maqliv yawkawr-aer tur-awr dov-ir gar ya’mawr ngae, aqyawf-euq maeqnan cantae ghae-awr aer-eu, “Aqyawf, lmqbymr-anr ir-awr ngoer-ir-eu nga.”
32Khoernar-aq, Maqliv, Yeqsur jawr-eu gar irkeuv-awr, aqyawf-anr ya’mawr ngae, Yeqsur-euq aqkuir-euq dawqpae awbyav-awr aer-eu, “Sanqpaq-or! Nawr heugar jawr lawnmr-aq, ngaq-euq aqmanr maqshir-ar.”
33Maqliv hawr-eu aqyawf-euq maeqnan cantae lef-euq Yurdav tsawrhaq deuq ngoer-eu gar Yeqsur ya’mawr ngae, aqyawf-euq nuima-anr zawler-awr nuima tiqpawf-iq maqsar-a. 34Khoerngae, aqyawf aer-eu, “Nawmaf, aqyawf-anr aqgeugar bafpanq taq-euq le?” Aqyawfmaf, aqyawf-anr aernaeq-eu, “Sanqpaq-or! Oe-awr hawle-awq.”
35Yeqsur ngoer-euq mae. 36Khoerngae, Yurdav tsawrhaq deuq aer-eu, “Hawsher-eq, aqyawf, Laqzaqlur-anr arnavni gaq-eu nga.”
37Tiqpavnav deuq aer-eu, “Aqyawf myavbaef-anr myavnuiv bi mawrnya lar-euq mar-iq, Laqzaqlur maqya shirni maq janrnya-a lor?”
Laqzaqlur-anr Bi Ghofdaef Lar-euq
38Khoerngae, Yeqsur, nuima shaqzanq mr-eu lafkhoer, lmqbymr-anr irkeuv-euq mae. Lmqbymr khoer-aq, lokhanq pyeuf-awr, ghaqkhaeq-anr khaqlo nae ngawqtsoeq taq-euq mae. 39Yeqsur aer-eu, “Khaqlo ngawqdzae-awq.” Shir-euq khoerghaq-euq dmrma Maqta, aqyawf-anr aernaeq-eu, “Sanqpaq-or! Aqyawf shir-euq oeq nan keuvlar-euq mirnae, yawbuf baeflaf-ir-euq mae.”
40Yeqsur, aqyawf-anr aernaeq-eu, “Nawr jan nar-aq, Miqyaer-euq yawshaef khanqsaer-anr ya’mawr taef-a laer ngar, nawq-anr aernaeq-euq maqngeur-a lor?”
41Khoerngae, aqyawfmaf, shir-euq khoerghaq bafpanq taq-euq gar nae, khaqlo ngawqdzae-euq mae. Yeqsur mq paw ghawrleur-awr heulof-aer aer-eu mae, “Aqda-or! Nawr, ngaq-euq shardawq-anr narhaq-eu mirnae, ngar, nawq-anr jaceuq ma. 42Nawr, ngaq-euq shardawq-anr aqmyanluf narhaq mae laer ngar siqnya ma. Aerkhawf, nawq nae ngaq-anr khaerghae lef-euq nga laer, heugar yawfluf-eu tsawrhaq deuq janlarni, aqyawf maf-euq gharduq ngar heulof-aer aer-eu ma.”
43Khoerlof-aer aerghaq-euq nar-aq, aqyawf tersar yawkhav-aer gur-eu, “Laqzaqlur-or! Dovle-awq.” 44Khoerngae, shirtaq-euq khoerghaq aqkuir aqlaf-anr mawrtawv tawvtaq-awr, myavpyawq-anr saqpar lanrcuf taq-awr nae dovle-euq mae. Yeqsur, aqyawf maf-anr aernaeq-eu, “Aqyawf-anr puirnaeq-awr bican-awq.”
Yeqsur-anr Saef-eu Laer Jawq-eu
Mt 26:1-5; Mk 14:1-2; Lk 22:1-2
45Khoernar-aq, Maqliv naeq-aer oe-euq Yurdav tsawrhaq ghawqmya ghaq, Yeqsur nae mr-euq gar ya’mawr ngae, aqyawf-anr janlar-euq mae. 46Aerkhawf, tiqpavnav deuq-aq, Paqliqsaer deuq jawr-eu gar ir-awr Yeqsur nae mr-euq deuq, aqyawf maf-anr ja’naeq-ir-euq mae. 47Khoerngae, Paqliqsaer deuq hawr-eu pirma aqyuif deuq, khavma armur#11:47 Khavma armur Armur heumur-euq lafkhoer tsawrhaq heudeuq keuq-eu mae: pirma aqyuif deuq, aqyuif aqtsu deuq hawr-eu zanr maeq-eu deuq.-anr kuruiq-awr aer-eu, “Aqduimaf aqjox-aer janr nmr-mq? Tsawrhaq heughaq-aq, bisiq bimawr-eu jeq ghawqmya’ni mrluf-eu mae. 48Aqyawf-anr khoerlof-aer mrmr-aer bijawr nar-aq, tsawrhaq dawqtawvluf, aqyawf-anr janler jir-eu ngar-a. Khoernar-aq, Lormav tsawrhaq lar-awr, aqdui-euq jawrduq hawr-eu aqdui-euq mirkhanq-anr yurgeuf jirlar taef-a.”
49Aqyawf maf-euq lafkhoer, khoerngae khof pirma yawhuiq ghaq geufluf-eu Gaqyaqpar, aqyawf maf-anr heulof-aer aernaeq-euq mae, “Nawmaf tiqjeq-iq maq siqnya nga. 50Tsawrjeuq tiqjeuq jeuqlan-aer maqya cawv-ir ni, tsawrhaq armaf-euq gharduq, tsawrhaq tiq ghaq shirdan nar-aq, aqdui-euq gharduq muiq taef-a laer nawmaf maq sharnoeq-eu le lor?”
51Aqyawf dawq khoerdawq ngaeq-eu-aq, aqyawxyawf noeqdov-awr ngaeq-eu maqngeur-a. Khoerngae khof, aqyawf, pirma yawhuiq ghaq geufluf-eu mirnae, Yeqsur, tsawrjeuq khoerjeuq-euq gharduq ya shirdan taef-a laer Miqyaer gharduq ngaeqdan-eu jeq pyeuf-eu mae. 52Tsawrjeuq khoerjeuq-euq gharduq taef-aer maqngeur-a. Aerkhawf, jawrbyav taq-euq Miqyaer-euq zaqdeuq, tiq mur taef-aer pyeuflarni aqyawf lavuiq-eu mae. 53Khoerngae nan-anr nae nar-aq, aqyawfmaf, Yeqsur-anr saef ma laer bawqdzaq tsaev-euq mae.
54Khoermirnae, Yeqsur, Yurdav mirkhanq-euq lafkhoer byacaevni maqpar can-aq. Aqyawf khoergar nae dov-ir-awr, bawrtsanq bawrdanr-euq dawqpae jav-eu Erpaqleq laer kur-eu meuq meuqzaq tiq meuq-anr irkeuv-awr, khoergar aqyawf-euq zaqlanr deuq naeq-aer jawr-euq mae.
55Yurdav tsawrhaq-euq Baqsaqkaq yawbui maq keuvlar-euq minav-aer, yawqha-euq mawrdo shawr-eu laer, danrtav jawr-eu tsawrhaq ghawqmya’ni Yeqlursaqlaeq-anr le-euq mae. 56Aqyawfmaf, Yeqsur-anr povluf-eu mae. Aqyawfmaf, uqduq tanqnymr nymrma-euq lafkhoer yawfluf ngae, aqyawf maf-euq yawkaq aer-eu, “Nawmaf aqjox-aer noeq-eu nya? Aqyawf yawbui bui-eu gar maqlar-a lor?”
57Khoerngae, Aqsur ghaq maqkaq, Yeqsur aqgeugar jawr-a laer siqnya nar-aq, aqyawfmaf, Yeqsur-anr ya’nyaefni dawqtsaf yatsaf lar-eu mae laer pirma aqyuif deuq hawr-eu Paqliqsaer deuq dawq biftaq-euq mae.
Цяпер абрана:
Yorhaq 11: AKA
Пазнака
Падзяліцца
Капіяваць
Want to have your highlights saved across all your devices? Sign up or sign in
2018 ©
Bibles International ®
The Bible Society of Baptist Mid-Missions