Zabbu̱li̱ 25
25
Zabbu̱li̱ gya Dau̱di̱.
1Hali weewe, Ai̱ Mukama, nku̱hayo mutima gwange.
2Ai̱ Ruhanga wange, weewe ginyeesiga,
otandekanga kubba kyamuswaru,
oteikiriza banyanzigwa bange kunyeeb̯ugiraho.
3Mu mananu tihaloho akwesiga alikwatwa nsoni̱,
bei̱tu̱ baliswara bab̯wo bendya kukora bibiibi.
4Ai̱ Mukama, ndagiira makuute gaamu,
onzegesya kwetegereza mihanda myamu.
5Nzegesye, onyeetegeresesye mananu gaamu,
hab̯wakubba weewe Ruhanga anjuna,
weewe ginyeesiga biro byensei̱.
6Ai̱ Mukama, i̱zu̱ka kisa kyamu na ngonzi zaamu zinene,
hab̯wakubba za biro bya kadei.
7B̯webeera bibii bya b̯usigazi b̯wange na ngesu zange za b̯u̱jeemu̱,
onzi̱zu̱kenge, ai̱ Mukama,
hab̯wa ngonzi zaamu zinene na b̯urungi b̯wamu!
8 Mukama murungi kandi wa mananu,
kyokyo yeebembera babiibi mu muhanda gwamwe.
9Aterekereerya bakweb̯undaza mu kukora birungi,
naabeegesya kuhondera mihanda myamwe.
10Mihanda myensei̱ mya Mukama mibbamwona ngonzi zinene na mananu,
hali bab̯wo bahondere ndagaanu gyamwe na bigambu byamwe.
11Ai̱ Mukama, ku̱si̱gi̱ki̱ra heibara lyamu,
nganyira bibii byange, hab̯wakubba binene.
12Yogwo atamwona Mukama ki̱ti̱i̱ni̱sa yo alahi yo?
Yooyo wa Mukama giyaahab̯uranga muhanda gwakuhondera.
13Yooyo wa mwozo gwamwe guliicala mu b̯u̱si̱nge,
kandi baana baamwe baligweterwa nsi.
14 Mukama anywana bab̯wo bamutamwo ki̱ti̱i̱ni̱sa,
kandi abaha kwega bya mu ndagaanu gyamwe.
15Mei̱so gange geicalanga hali Mukama, hab̯wakubba anjuna ku̱gwa mu mutegu.
16Nnzi̱raho, ai̱ Mukama, ongiire mbabazi̱,
hab̯wakubba ndi mu b̯u̱ru̱mi̱ kandi ndi hahwo nyankei.
17Bizib̯u byange bi̱kanyi̱ri̱,
njuna bi̱byo bintuntwi̱ze mutima.
18Taho mutima ku b̯u̱ru̱mi̱ b̯wange na bizib̯u byange,
onganyire bibii byange byensei̱.
19Wona banyanzigwa bange nka kubali banene,
kandi nka ku̱bannobi̱ri̱ hoi̱.
20Ndinda kandi oncungure, otampa kuswara,
hab̯wakubba nyeesiga weewe.
21Leka b̯urungi na mananu bindindenge,
hab̯wakubba nyeesiga weewe.
22Ai̱ Ruhanga, cungura I̱saleeri̱
hali bizib̯u byamwe byensei̱!
Цяпер абрана:
Zabbu̱li̱ 25: LUGUNGU
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 2025, Wycliffe Bible Translators, Inc. All rights reserved.