Proverbios 8
8
Tjetꞌèya ti kjuaxrexinkaon jína
1 #
Pr. 1:20, 21. *¿Á jehya tjetꞌèya ti kjuaxrexinkaon ní?
¿Á jehya tjenixja itsen ti kjuaxrexinkaon jína ní?
2Éxi ijnko nkexro itjen chrínta nti̱a ti chjasin
o̱ nko̱siñe nti̱a kixin jína tsꞌikon kaín chojni,
3tíha mé tjetꞌèya
ti ikon chjasin chjino ti puerta kuènté ti chjasin, ti tꞌixenxín chojni,
4La ndáchro: “Janhan mé nixjahára kaínra,
janhan mé tjénixja̱ha̱ kaín chojni.
5Jahara ndasoára noehña ninkehó, chrókꞌuitjára tsjenka̱yáxinra jína;
jahara chojni lo̱nti̱, chrókjuénka̱yáxinra jína.
6Chrokuihínra ti nkehe tjetoan tsondáxrja̱n
kixin kaín nkehe tsondáxrja̱n la nkehe ndoá.
7Ti nkehe tsꞌaxrjexín irꞌua̱ la chaxín ndoá,
kixin tóxrìnahña tsondáxrja̱n nkehe chaxínhña.
8Kaín nkehe níxja la chaxín ndoá;
ninkehó kjuachꞌia níxjahya.
9Kaín ti nkehe níxja tienxín jína ti nkexro nohe.
Ti sin nohe la tienxín kixin chaxín ti nkehe ndáxrja̱n.
10A̱ntsí chrókóxríhanra ti itan tjákohára ke ti plata,
la a̱ntsí chrókjuéyára kixin chrókónohara jína ke ti oro.”
11Kixin a̱ntsí sínkí ti kjuaxrexinkaon jína ke ti ixro̱ náxrjón tsjehe.
Kohya íjnko nkehe chrókóyóhe̱ tíha.
12“Janhan éxi ti chojni chónta kjuaxrexinkaon jína la tjéki̱a̱n ti nkexro tjenka̱yáxin jína,
la ko ó jína nona la ko tjénka̱yáxian jína nkexrín si̱tꞌa ixra̱.
13Ti chojni tjikosáyehe Itꞌéni Díos la tóxrìe̱nhña ti nkehe jínahña;
méxra̱ janhan la nínka̱konha̱n ti kjuahnke la ko ti ixri chojni nchejié a̱sén
la ko ti nkehe náxrjónhña nixja chojni.
14Méxra̱ janhan tjénka̱yáxian jína la ko tjánjua kjuaxrexinkaon jína,
la ko jína tia̱nxia̱n kaín nkehe la ko chonta kaín kjuachaxin.
15Ti kjuachaxin chonta janhan mé tꞌe̱to̱axín ti sin rey
la ko janhan tjínki̱tsa ti sin tꞌe̱to̱an kixin jína tsꞌe̱to̱an sin.
16Ti kjuachaxin kuénta̱na mé tꞌe̱to̱axín ti sin tꞌe̱to̱an,
la ko janhan tjínki̱tsa kaín ti sin nchekito̱exín ijie̱ kixin ndoá sichꞌe sin ti ixra̱.
17Janhan mé tjua̱ha̱ ti nkexro tjua̱na,
la ko ti nkexro xritjeyá ti janhan mé tsꞌitja sin.
18Ti nkehe tjete la ko ti kjuasàya la mé janhan tsjánjua,
la ko ti nkehe tjete tsjeje̱hya.
19A̱ntsí sínkí ti nkehe tso̱tja̱hára ke ti oro kjónté imá náxrjón,
la ko a̱ntsí jína ti nkehe tso̱tja̱hára ke ti plata imá tjete.
20Janhan mé xria ti nti̱e ti sin ndoá tjenka̱yáxin
la ko ti nti̱a jína.
21Ti sin tjue̱he ti janhan mé tsotjaha̱ sin nkehe jína,
la ko tso̱kaón ndo̱e sin ti nkehe tjete.
22 #
Ap. 3:14. *Itꞌéni Díos mé kjuíchꞌéna chꞌan ti janhan,
ti xránkíxixín kjuíchꞌéna chꞌan kaín nkehe.
23Janhan mé ti xránkíxixín kꞌóna,
la xráxín itjén ti na̱xa̱ kꞌónahña chjasintajni.
24Ti na̱xa̱ kꞌónahña ti nda̱ñao imá ijié mé kꞌóna janhan
la ko ti na̱xa̱ kohya nda̱río la ko ti sítꞌaxrje ìnta̱.
25Ti na̱xa̱ kjuákꞌehya ti ijna̱ la ko ti nte̱je̱
la xráxín kjuakꞌé.
26Ti na̱xa̱ kjuíchꞌénahña Itꞌéni Díos ti chjasintajni
la ko ti nonte la ko ti inche chjasintajni la ó xráxín itjén janhan.
27A̱ndá ti ó kjuakꞌe Díos ti nka̱jní éxi ijnko ika ijié
la ko kjuakꞌe ti nda̱ñao imá ijié la ó ntiha tjétsjaha̱.
28Kja̱xin ti kꞌóna ti itji̱ siín nka̱jní
la ko ti kjuíchꞌéna Díos ti tjiá ìnta̱ la kja̱xin tjéntaxián janhan.
29Janhan kjuakꞌé ti kꞌuítuehen ti nda̱ñao
kixin sátsjihya ókjé,
la ko ti kjuákꞌe ti xránkíxixín ti chjasintajni.
30La ntiha kjuakꞌé janhan la kjuínki̱tsa ti ixra̱
la imá kóchána
la ko kóxrìna kjuakꞌé ti itjen Díos.
31Chàna itjén kixin ti chjasintajni kjuíchꞌéna chꞌan,
la ko chàna kixin kjuíchꞌéna chꞌan ti chojni siín.
32A̱ndá ijie, xje̱eni, tihín ti nkehe tsondáxrja̱n,
náxrjón tsjakꞌe ti nkexro chréhe̱ ti nti̱a kuénta̱na.
33Chrokiénxian ti nkehe kuétua̱han la chrókónoha,
la chrókuíto̱ehya tíha.
34Náxrjón chrókjuákꞌe ti nkexro tihin ti nkehe ndáxrja̱n
la tsjakꞌechóhen ndója puerta
ti ndo̱na nkojnko ña̱o.
35Ti nkexro tsꞌitja ti janhan mé tsꞌitja ti kjuachón,
a̱ndá Itꞌéni Díos tso̱xríhi̱n tíha.
36A̱ndá ti nkexro tsíto̱he ti janhan, mé jehó sincheníhi a̱sén,
la kaín ti nkexro nínkakohen ti janhan mé tjinkaon sin itsꞌen sin.”
Цяпер абрана:
Proverbios 8: poeNTplus
Пазнака
Падзяліцца
Параўнаць
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 2016, Wycliffe Bible Translators, Inc. All rights reserved.