Proverbios 21
21
1Éxi Díos tꞌe̱to̱an nketí sátsji ti nda̱río la mé kja̱xin xi̱kaha tꞌe̱tue̱hen chꞌan a̱sén ijnko rey
kixin tsjenka̱yáxin éxi tjinkaon Itꞌéni Díos.
2Kaín chojni tjenka̱yáxin kixin jína tjejó sin,
kjánchó Itꞌéni Díos mé nohe ti nkehe tjenka̱yáxin sin.
3A̱ntsí tóxríhi̱n Itꞌéni Díos ti sinchexiteyá chojni ti nkehe jína la ko ndoá
ke ti tsjajon sin iko tsíchján tsjikosáyexín sin chꞌan.
4Ti chojni nchehnke la ko nchejié a̱sén,
la kaín ti ijie̱ tjasin ti sin jínahña,
mé ijie̱ tíha.
5Ti nkexro tjenka̱yáxin jína la kaín ti ixra̱ ichꞌe la tsꞌaxrje jína;
a̱ndá ti nkexro tóxakohen tjoka tso̱hen ixra̱ la jehó tso̱nóa.
6Ti nkehe tjete kjuacha sin kixin kjuíchꞌia sin
la tíha tsꞌitjáñaxín sin éxi ti ihnchi.
7Ti chojni jínahña xritje kjuanínkaon mé tíha tsꞌitjáñaxín
kixin tjinkakonhña sichꞌe ti nkehe jína.
8Ti chojni tjasin ijie̱ la éxi nti̱a tsíxrèya tjejó sin;
a̱ndá ti nkehe ichꞌe ti chojni jína la ijnko nkehe ndoá tíha.
9Ícha jína jahuá chrókjuakꞌe ijnko chríhnko tja̱tꞌo̱;
ke chrókjuakꞌeko̱a ijnko tjan imá nta̱xratꞌóka nkaxehen jnko nchia jína.
10Ti chojni jínahña la jehó tjenka̱yáxin sin ti nkehe jínahña
la ti̱konoéhya sin ti íso chojni.
11Ti ó tsjasóte ti chojni chóntahya kjuasàya
la mé xi̱kaha tsꞌitja ti nkexro na̱xa̱ noehña;
a̱ndá ti nkexro nohe la tihón la tsitekaon.
12Díos, ti nkexro jína, la nohe chꞌan nkehe tjenka̱yáxin chojni jínahña,
la sinchekꞌitjáña chꞌan ti jehe sin.
13Ti chojni tienhña ti tsꞌèya ti nkexro nóa,
la kja̱xin sin ti ó tsꞌèya sin nkojín ña̱o la tso̱kohya nkexro tsihin.
14Ti nkehe ómó tsi̱to̱he̱n sin,
la tíha tsꞌitjáñaxín ijnko kjuanínkaon.
15Chéhe̱ ti chojni jína ti ndoá títo̱exín nkojín ijie̱;
a̱ndá ti chojni tjenka̱yáxin ti nkehe jínahña la sixrànka̱ sin, chrakon sin.
16Ti chojni tsíto̱he ti nti̱a kuènté ti kjuaxrexinkaon jína
la sátsji sin ti siín ti sin tsíkꞌen.
17Ti nkexro jehó chréhe̱ ti nkehe ndáchro a̱sén,
la ti xran la ko ti perfume náxrjón
la jehó tso̱nóa sin.
18Ti chojni jínahña la tsjasóte sin
kixin tsaá ti sin jína la ko sin ndoá tjejó.
19Ícha jína jahuá chrókjuakꞌe nte̱je̱
ke chróchónta ijnko chojnichjin jie̱he la ko xra̱hya tónínkaon.
20Ndo̱e ti chojni nohe la chónta itsjé nkehe tjete la ko perfume náxrjón xraxé;
a̱ndá ti chojni lo̱nti̱ la kaín nkehe chónta la jehó nchekꞌitjáña.
21Ti nkexro xritjeyá ti nkehe chaxín ndoá la ko tjue̱he kícho
la mé jína tsꞌejó sin,
tsochónta sin kaín nkehe la ko tsꞌáyéhe̱ sin kjuasàya.
22Ijnko chojni jína nohe la tsjacha tsꞌe̱to̱an ijnko chjasin siín ti sin tse̱he̱
la ko tsjacha sin sinchekꞌitjáña sin ti tja̱tꞌo̱ tsíka̱ntatjen ntiha.
23Ti nkexro chji̱ñéhña nixja
la kanhñó tsochónta kjuanínkaon.
24Ti chojni nchejié a̱sén,
la tíha mé ijnko chojni chóntahya kjuasàya la ko ihnke.
25Ti nkehe tjinkaon tsochónta ti sin séhe la jehó tsji̱ka̱o ti itsꞌen chojni,
kixin jehe sin tjinkakonhña sichꞌe sin ixra̱.
26Kuenté ña̱o tjenka̱yáxin sin ti nkehe tjinkaon sin chróchónta sin;
a̱ndá ti chojni jína la tóxríhi̱n sin tjajon sin nkehe.
27Itꞌéni Díos la tóxriènhña ti iko tꞌóñá ti chojni jínahña
ti kaínhña a̱sén sin tjajon sin.
28Ti nkexro nduáhya chronka ti nkehe tsíkóhen nkayakon ti juez la itsꞌen;
a̱ndá ti nkexro jína tihin la nkochríxín ndoá tsochronka.
29Ti chojni jínahña la tja̱ko̱xi̱n éxi jína tjejó,
a̱ndá ti chojni jína la chaxín jína tjejó sin.
30Itꞌéni Díos la tꞌikon kixin ti kjuaxrexinkaon kuènté chojni la ko ti imá nohe sin,
la tóyóe̱hya éxi kaín ti noexin chꞌan.
31Ti soldado tóxakohen ncheyaxíhin ti koka̱te̱ kixin sátsji sin guerra,
kjánchó jehó Itꞌéni Díos mé nohe nkexro tsjacha.
Цяпер абрана:
Proverbios 21: poeNTplus
Пазнака
Падзяліцца
Параўнаць
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 2016, Wycliffe Bible Translators, Inc. All rights reserved.